នៅព្រឹកថ្ងៃទី៣០ ខែកញ្ញា ឆ្នាំ២០២២នេះ លេខាធិការដ្ឋាននៃគណៈកម្មាធិការប្រយុទ្ឋប្រឆាំងអំពើជួញដូរមនុស្សខេត្តសៀមរាប គ.ខ.ប.ជ បានរៀបចំកិច្ចប្រជុំការងារត្រីមាសទី៣ ឆ្នាំ២០២២ ដែលដឹកនាំកិច្ចប្រជុំដោយលោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ និងមានអញ្ជើញចូលរួមពីសមាជិក សមាជិកា លេខាធិការដ្ឋាន គ.ខ.ប.ជ មន្ទីរអង្គភាពពាក់ព័ន្ធ ព្រមទាំងតំណាងអង្គការដៃគូជាច្រើនរូបចូលរួម។
កិច្ចប្រជុំនាពេលនេះដើម្បីពិនិត្យទៅលើកំណត់ហេតុ និងត្រួតពិនិត្យលើផែនការដែលបានដាក់ចេញកាលពីពេលកិច្ចប្រជុំប្រចាំកន្លងមក ដោយបានធ្វើការពិភាក្សា ផ្តោតទៅលើបញ្ហាប្រឈមនៃការអនុវត្ត និងការកសាងសំណុំរឿងបទល្មើសពាក់ព័ន្ធនឹងច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ដោយក្នុងនោះកិច្ចប្រជុំក៏បានលើកយកបញ្ហាមួយចំនួនទៀតយកមកពិភាក្សា ដើម្បីស្វែងរកដំណោះស្រាយរួមគ្នាសម្រាប់ការពារជនរងគ្រោះ និងងាយរងគ្រោះ ដោយអំពើហឹង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទផងដែរ។
លោកស្រី យូ សុភា មានប្រសាសន៍ថា អំពើជួញដូរមនុស្ស គឺជាវិបត្តិសកលមួយ ដែលបណ្តាប្រទេសជាច្រើនបានជួបប្រទះ ដោយក្នុងនោះដែរប្រទេសកម្ពុជា ក៏បានទទួលរងនូវវិបត្តិនេះ ដែលធ្វើឲ្យរាជរដ្ឋាភិបាល ក៏ដូចជាប្រជាពលរដ្ឋទាំងអស់មានការព្រួយបារម្ភជាខ្លាំង។ អំពើជួញដូរមនុស្ស ឬបទល្មើសជួញដូរមនុស្ស គឺជាការផ្សាភ្ជាប់ទៅនឹងភូមិសាស្រ្តនយោបាយ ក៏ដូចជាការលាងសម្អាតប្រាក់កង្វក់ដែលមានលក្ខណៈសាំញាំ និងស្មុកស្មាញ ក្នុងការកំណត់ជាក់លាក់ អំពីបទល្មើស ពិសេសបទល្មើសដែលប្រព្រឹត្តតាមប្រព័ន្ធអនឡាញ។ លោកស្រី ក៏បាជម្រុញដល់គ្រប់អ្នកពាក់ព័ន្ធទាំងអស់ ត្រូវបន្តកិច្ចសហការគ្នាឲ្យបានកាន់ស្អិតរមួត លើការអនុវត្តនីតិវិធីនានា ការបង្ក្រាបបទល្មើស ការជួយសង្គ្រោះជនរងគ្រោះឲ្យបានទាន់ពេលវេលា ពងឹ្រងសមត្ថភាព និងពង្រីកការផ្សព្វផ្សាយឲ្យបានទូលំទូលាយ ក៏ដូចជាការពន្លាតការស៊ើបអង្កេត ស្រាវជ្រាវឲ្យកាន់តែស៊ីជម្រៅ ដើម្បីបង្រ្កាប និងផ្តន្ទាទោសដល់ជនល្មើសឲ្យខានតែបាន។
ព័ត៌មានជាតិ ថ្មីៗ
សូមជម្រាបថា នៅក្នុងកិច្ចប្រជុំនាពេលនេះ បានលើកយកនូវរបៀបវារៈមួយចំនួន៧ យកមកពិភាក្សា និងការត្រួតពិនិត្យលើបញ្ហាពាក់ព័ន្ធ ដើម្បីអនុវត្ត និងដោះស្រាយ រួមមាន៖១.សូមមន្ទីរកិច្ចការនារី អង្គការ Lac អាជ្ញាធរមូលដ្ឋានស្រុកពួក ស្រុកវ៉ារិន និងស្រុកអង្គធំ ធ្វើបច្ចុប្បន្នភាពករណីទំនាស់គ្រួសារ នៅស្រុកអង្គរធំ និងស្រុកពួក។ ២.ក្រុមការងារលេខាធិការដ្ឋាន គ.ខ.ប.ជ ដឹកនាំដោយលោក វរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្ត ចុះទៅជួបជាមួយស្ត្រី ដែលមានកូនតាមម្តាយ ដើម្បីធ្វើការផ្សព្វផ្សាយ អំពីការយកកូនតាមម្តាយ ចេញពីពន្ធនាគារ។ ៣.រៀបចំកិច្ចប្រជុំយុត្តិធម៌ព្រហ្មទណ្ឌ កិច្ចប្រជុំរវាងអង្គការដៃគូរ ជាមួយស្ថាប័នតុលាការ និងរៀបចំកិច្ចប្រជុំយុត្តិធម៌ព្រហ្មទណ្ឌ។ ៤.សូមការិយាល័យស្ថិតិ និងអត្រានុកូលដ្ឋាន ពិនិត្យរៀបចំវគ្គបណ្តុះបណ្តាលដល់ក្រុមប្រឹក្សាឃុំសង្កាត់។ ៥.ករណីនៅឃុំខ្នងភ្នំ ស្រុកស្វាយលើ ពលរដ្ឋម្នាក់បានចាញ់បោកក្រុមហ៊ុន UNISITY នៅបុរីទេសចរណ៍លក់ផលិតផលអាហារបំប៉ន់ សូមដាក់ពាក្យបណ្តឹងនៅអាវុធហត្ថស្រុក ដើម្បីធ្វើការស្រាវជ្រាវ។ ៦.ស្រុកសូទ្រនិគម៖ ករណីឪពុកយកកូនស្រី អាយុ ៦-៧ឆ្នាំ ទៅទុកចោលនៅភូមិជ្រៃខាងជើង ឃុំកៀនសង្កែ ត្រូវបានអ្នកភូមិយកទៅចិញ្ចឹម តែបែជាកូនស្រីនោះបានយកម៉ូតូទៅធ្វើបាត់ហើយពេលឪពុកមកយកកូនវិញ បែរជាម្ចាស់ម៉ូតូនោះមិនឱ្យកូនវិញ។ ករណីនេះសូមឱ្យពលរដ្ឋខាងលើដាក់ពាក្យបណ្តឹង ហើយកុមារីខាងលើត្រូវប្រគល់ជូនទៅមន្ទីរសង្គមកិច្ច។ ៧.ករណីកុមារអាយុ៣ខែ នៅឃុំកែវពណ៌ ត្រូវធ្វើការវះកាត់នៅមន្ទីរពេទ្យអង្គរ ដែលតម្រូវបង់ថវិកាចំនួន ៥០០ដុល្លារ សូមរដ្ឋបាលស្រុកពួក ធ្វើការជាមួយមន្ទីរពេទ្យកុមារអង្គរ និងមួយចំណុចទៀតសូមធ្វើការដាក់ពាក្យបណ្តឹង ដើម្បីការពារកិត្តិយសសា្ថប័ន៕
អត្ថបទ និង រូបភាព៖ ទ្រា ពន្លឺ
កែសម្រួល៖ លោក អ៊ុន ណារាជ្យ
