នៅព្រឹកថ្ងៃទី០៣ ខែតុលា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានដឹកនាំកិច្ចប្រជុំសាមញ្ញថ្នាក់ដឹកនាំក្រសួងព័ត៌មាន សម្រាប់សប្តាហ៍ទី១ ប្រចាំខែតុលា ដើម្បីពិនិត្យវឌ្ឍនភាពការងារដែលសម្រេចអនុវត្តន៍បាននាពេលកន្លងមក និងផែនការ ការងារដែលត្រូវបំពេញបន្តបន្ទាប់ខាងមុខទៀត។
ឆ្លៀងក្នុងឱកាស អង្គប្រជុំបានបង្ហាញការអបសាទរ ចំពោះ ឯកឧត្តម ខៀវ កាញារីទ្ធ ដែលទទួលបាន ពានរង្វាន់ រួមទាំងប្រកាសនីយបត្រទទួលស្គាល់«ស្នាដៃពេញមួយជីវិត» AIBD’s Lifetime Achievement Award ពីវិទ្យាស្ថានអាស៊ី-ប៉ាស៊ីហ្វិក ដើម្បីអភិវឌ្ឍប្រព័ន្ធផ្សព្វផ្សាយ ហៅកាត់ថា AIBD ដែលជាការទទួលស្គាល់ស្នាដៃដ៏ធំធេងរបស់ ក្រសួងព័ត៌មានកម្ពុជា ក្នុងការជួយកសាងវិស័យព័ត៌មានក្នុងតំបន់អាស៊ី-ប៉ាស៊ីហ្វិក ៣ ទសវត្សរ៍ កន្លងមកនេះ ។
ឯកឧត្តម ខៀវ កាញារីទ្ធ មានប្រសាសន៍បញ្ជាក់ថា ពាន«ស្នាដៃពេញមួយជីវិត» ដែល AIDB ប្រគល់ឱ្យនេះ មិនសម្រាប់តែរូប ឯកឧត្តម ផ្ទាល់ម្នាក់ឯងនោះទេ គឺដោយសារការខិតខំប្រឹងប្រែងរួមគ្នាទាំងអស់ របស់មន្រ្តីរាជការ ថ្នាក់ដឹកនាំ ក្រសួងព័ត៌មាន ក្នុងកិច្ចការងារលើកកម្ពស់វិស័យព័ត៌មាន និងផ្សព្វផ្សាយ បានយ៉ាងល្អប្រសើរ។ ទន្ទឹមនោះ ឯកឧត្តមរដ្ឋមន្ត្រី បន្ថែមថា នៅក្នុងខែតុលា និង វិច្ឆិកា មានព្រឹត្តការណ៍ធំៗ ជាច្រើន ក្នុងនោះ កម្ពុជាត្រូវធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ដែលមានប្រមុខថ្នាក់ដឹកនាំ ក្នុងតំបន់ និងពិភពលោកមកចូលរួមជាច្រើន។ ជាមួយនោះ ការត្រៀបផែនការសកម្មភាពការងារ ដែលក្រសួងព័ត៌មាន ជាអ្នកទទួលខុសត្រូវក្នុងកិច្ចការថត និងផ្សាយពីព្រឹត្តការណ៍នៃការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ក៏ជារឿងដ៏សំខាន់ និងអាទិភាពផងដែរ។ បន្ថែមពីនោះ អគ្គនាយកដ្ឋានទូរទស្សន៍ជាតិកម្ពុជា ត្រូវត្រៀមឱ្យបានគ្រប់គ្រាន់ដើម្បីរៀបចំកម្មវិធីប្រកួតរ៉ូបូត ABU Robocon លក្ខណៈអន្តរជាតិ ដែលគ្រោងធ្វើឡើងនៅក្នុងខែសីហា ឆ្នាំ២០២៣ ដោយកម្ពុជាធ្វើជាម្ចាសផ្ទះរៀបចំការប្រកួត តាមរយៈកិច្ចសហការជាមួយ ទូរទស្សន៍ជប៉ុន NHK ។
ក្នុងកិច្ចប្រជុំនោះ ឯកឧត្តម ខៀវ កាញារីទ្ធ ក្រើនរំលឹកដល់មន្ត្រីនៃក្រសួងព័ត៌មានទាំងអស់ ត្រូវបំផុស និងជំរុញមន្រ្តីក្រោមឱវាទ ដែលមានកំរិតសិក្សាទាបនៅឡើយ គួរបន្តបំពេញវិជ្ជាជីវៈបន្ថែម ដោយក្នុងនោះ វិទ្យាស្ថានខ្មែរជំនាន់ថ្មី បានផ្តល់អាហារូបករណ៍១០០ភាគរយជូនដល់ ឯកឧត្តម រដ្ឋមន្រ្តី ក្រសួងព័ត៌មាន និងលោកជំទាវ សម្រាប់និស្សិតថ្នាក់បរិញ្ញាបត្រជាន់ខ្ពស់ចំនួន ១០ កន្លែង ថ្នាក់បរិញ្ញាបត្រ និងបរិញ្ញាបត្ររងចំនួន៥០ កន្លែង ក្នុងឆ្នាំសិក្សា ២០២២-២០២៣។ ដោយឡែក ឯកឧត្តមរដ្ឋមន្រ្តី បានជំរុញដល់គណៈកម្មការបោះពុម្ពសៀវភៅ កម្ពុជាក្នុងក្រសែភ្នែកពិភពលោក ត្រូវរៀបចំឱ្យរួចរាល់ ដើម្បីធ្វើការបោះពុម្ព ជាភាសាខ្មែរជំហានដំបូងឱ្យបានមុនដំណើរការនៃកិច្ចប្រជុំកំពូលអាស៊ាន នាខែវិច្ឆិកាខាងមុខនេះ ។
ឯកឧត្តម រដ្ឋមន្រ្តី ខៀវ កាញារីទ្ធ បានជម្រុញ ដល់គ្រប់ផ្នែកពាក់ពន្ធ័ ពិសេស អគ្គនាយកដ្ឋានទូរទស្សន៍ជាតិកម្ពុជា ត្រៀមឱ្យបានគ្រប់គ្រាន់ដើម្បីរៀបចំកម្មវិធីប្រកួតរ៉ូបូត ABU Robocon លក្ខណៈអន្តរជាតិ ដែលគ្រោងធ្វើឡើងនៅក្នុងខែសីហា ឆ្នាំ២០២៣ ដោយកម្ពុជាធ្វើជាម្ចាសផ្ទះរៀបចំការប្រកួត តាមរយៈកិច្ចសហការជាមួយ ទូរទស្សន៍ជប៉ុន NHK ។
