ថ្លែងបិទវគ្គបណ្តុះបណ្តាលស្តីពីភាពជាអ្នកដឹកនាំលើកទី៧ ដែលរៀបចំឡើងដោយសភាយុវពាណិជ្ជករអន្តរជាតិ កម្ពុជា ហៅកាត់ថា JCI Cambodia នៅខេត្តសៀមរាប កាលពីរាត្រីថ្ងៃទី០៣ ខែតុលា ឆ្នាំ២០២២ ឯកឧត្តម ទៀ សីហា អភិបាលខេត្តសៀមរាប បានលើកទឹកចិត្ត និងជំរុញដល់បណ្ដាអ្នកវិនិយោគ ដែលមានបំណងចង់បើកអាជីវកម្មក្នុងខេត្ត គួរសម្លឹងមើលវិស័យសំខាន់ៗផ្សេងៗ ក្រៅពីវិស័យទេសចរណ៍ និងកសិកម្ម ដើម្បីជ្វើឱ្យសេដ្ឋកិច្ចក្នុងខេត្តមួយនេះកាន់តែមានភាពសំបូរបែប។
ឯកឧត្តម ទៀ សីហា លើកឡើងថា ក្រោយវិបត្តជំងឺកូវីដ ១៩ មានសភាពធូរស្រាល ក្រោមការដឹកនាំរបស់រាជរដ្ឋាភិបាលកម្ពុជា ដែលមានគោលនយោបាយច្បាស់លាស់នៅក្នុងការជំរុញការចាក់វ៉ាក់សាំងបង្ការជំងឺកូវីដ១៩ បានធ្វើឱ្យខេត្តសៀមរាប មានលទ្ធភាពងើបឡើងវិញនូវវិស័យទេសចរណ៍ ដែលជាវិស័យគោល រួមនិងវិស័កសិកម្ម។ ក្នុងនោះ វិស័យមួយចំនួនទៀត នៅពុំទាន់មានការលេចធ្លោនៅឡើយ ស្របពេលការបើកប្រទេសឡើងវិញ និងការអភិវឌ្ឍសមិទ្ធផលធំៗដូចជាផ្លូវ៣៨ខ្សែ ការស្ដារសោភណ្ឌភាពដងស្ទឹងសៀមរាប ព្រលានយន្តហោះអន្តរជាតិសៀមរាបថ្មី កំពុងលេចរូបរាងជាបន្តបន្ទាប់។
លោក ឃឹម ប៊ុនឡែន នាយកកម្មវិធីវគ្គបណ្ដុះបណ្ដាល និងជាអនុប្រធានប្រតិបត្ដិថ្នាក់ជាតិ នៃសភាយុវពានិជ្ជករអន្ដរជាតិកម្ពុជា លើកឡើងថា ដោយមើលឃើញពីសក្ដានុពលសំខាន់ៗក្នុងខេត្តសៀមរាប JCI Cambodia បាននាំយកវគ្គបណ្ដុះបណ្ដាលភាពជាអ្នកដឹកនាំលើកទី៧ ដើម្បីឆ្លុះបញ្ចាំងពីការទំនាក់ទំនងគ្នា ដកបទពិសោធន៍គ្នាទៅវិញទៅមក និងអាចឱ្យយុវជនជំនាន់ក្រោយចូលរួមជាមួយរាជរដ្ឋាភិបាល និងក្រុមហ៊ុនឯកជន ឬស្ថាប័នផ្សេងៗទៀត ដែលពួកគាត់ពេញចិត្ដ ដើម្បីដោះស្រាយបញ្ហាសង្គមជាតិ។
លោក ឃឹម ប៊ុនឡែន បានបន្ដថា ព្រឹត្ដិការណ៍សម្រាប់ភាពជាអ្នកដឹកនាំនេះ មានយុវជនប្រមាណជិត១០០នាក់ចូលរួម ក្នុងនោះសិក្ខាកាមក្នុងវគ្គបណ្ដុះបណ្ដាលនេះ សហគ្រិនមកពីអង្គការJCI Cambodia ចំនួន៥០ភាគរយ អ្នកធ្វើការក្នុងអង្គការ ស្ថាប័នឯកជន ស្ថាប័នរាជរដ្ឋាភិបាលចំនួន៣០ភាគរយ និង២០ភាគរយទៀតជាសិស្សានុសិស្សបំពេញការងារស្ម័គ្រចិត្ដ។
អត្ថបទ និងរូបភាព៖ លោក ជា ស្រស់ និងលោក បូ សាវី
កែសម្រួល៖ លោក សេង ផល្លី
