ប្រជាពលរដ្ឋខ្មែរជាង៣ពាន់គ្រួសារ នៅជនបទនៃស្រុកសូទ្រនិគម និងស្រុកជីក្រែង ខេត្ដសៀមរាប ទទួលបានគម្រោងទឹកស្អាតបរិភោគ និងប្រើប្រាស់ ពីក្រុមអ្នកស្ម័គ្រចិត្ដរបស់មូលនិធិអន្ដរជាតិ ប្រទេសសឹង្ហបុរី និងអង្គការទឹកដើម្បីកម្ពុជា ខណៈដែលសិស្សជាង២ពាន់នាក់ផ្សេងទៀត ក៍ទទួលបានគម្រោងទឹកស្អាតនេះដែរ។
នៅក្នុងពិធីបើកសម្ភោធគម្រោងទឹកស្អាត”ទឹកជាជីវិត”ដែលធ្វើឡើងនៅឃុំចាន់សរ ស្រុកសូទ្រនិគមន ខេត្ដសៀមរាបក កាលពីថ្ងៃទី៥ខែតុលានេះ លោក លាន វេចូវ Lian Wee Cheow អភិបាលមូលនិធិអន្ដរជាតិសឹង្ហបុរី បានថ្លែងថា កម្ពុជាគឺជាប្រទេសដំបូងគេបង្អស់ដែលមូលនិធិអន្តរជាតិសិង្ហបុរី ដែលបានចាប់ផ្ដើមជាមួយគម្រោង ទឹកជាជីវិត ក្នុងឆ្នាំ២០១០ ហើយគម្រោងស្រដៀងគ្នានេះ ត្រូវបានបន្តអនុវត្តនៅ ក្នុងប្រទេសឥណ្ឌូនេស៊ី និងមីយ៉ាន់ម៉ាផងដែរ។លោកបន្ដថា អ្នកស្ម័គ្រចិត្តរបស់មូលនិធិអន្តរជាតិសិង្ហបុរី នឹងសហការជាមួយការទឹកដើម្បីកម្ពុជា បានដំឡើងធុងចម្រុះខ្សាច់ជីវសាស្ត្រចំនួន៦០០ចមោះ នៅស្រុកសូទ្រនិគម និង ស្រុកជីក្រែង ក្នុងខេត្តសៀមរាប ដែលមានអ្នកភូមិប្រមាណជាង៣៣០០នាក់មានទឹកស្អាត សម្រាប់បរិភោគនិងប្រើប្រាស់។
លោកបន្ថែមថា ក្នុងអំឡុងពេលជំងឺកូរីដ-១៩ គេសង្គេតឃើញថា ការលាងដៃនឹងសាប៊ូមានអនាម័យល្អ ហើយធ្វើឱ្យសុខភាពកាន់តែប្រសើរឡើង ដូចនេះ អ្នកស្ម័គ្រចិត្តរបស់មូលនិធិអន្តរជាតិសិង្ហបុរីនឹងជួយពង្រឹងការអប់រំអំពីអនាម័យនៅតាមសាលារៀនដល់សិស្សានុសិស្សប្រមាណ ២៤០០នាក់ ដើម្បីគាំទ្រអនាម័យល្អ ដែលនេះជាផ្នែកមួយនៃគម្រោងរបស់ពួកយើង។ជាមួយគ្នានោះការទទួលបានទឹកស្អាតសម្រាប់ប្រើប្រាស់ អត្រានៃជម្ងឺឆ្លងតាមទឹក ដូចជា ជំងឺគ្រុនពោះវៀន និងជំងឺរាគរូស នឹងមានការថយចុះយ៉ាងខ្លាំង ដែលធ្វើឱ្យសុខភាពកុមារកាន់តែប្រសើរឡើង ហើយពួកគេទៅរៀនបានទៀងទាត់។
លោកថា ការចែករំលែក គម្រោងទឹកជាជីវិតនេះ ជាចំណងមិត្តភាពរវាងប្រជាជនសិង្ហបុរី និងប្រជាជនកម្ពុជានឹងកើនឡើងមួយកំរិតបន្ថែមទៀត។មកទល់ពេលនេះ កម្មវិធីគម្រោង ទឹកជាជីវិត បាននាំយកទឹកស្អាតជូនដល់ប្រជាជនកម្ពុជា ជាង៧៤០០០នាក់ នៅក្នុងខេត្តសៀមរាប និងខេត្តកំពង់ស្ពឺ។
លោក ម៉ាសស៊ីម៉ូ ម៉ាអាយូ Massimo Maio នាយកប្រតិបត្ដិអង្គការទឹកដើម្បីកម្ពុជា មានប្រសាសន៍ថា អង្គការទឹកបានបង្កើតឡើងនៅឆ្នាំ២០០៦ហើយបច្ចុប្បន្ននេះ អង្គការទឹកដើម្បីកម្ពុជា បានតម្លើងធុងចម្រោះទឹកស្អាតបានចំនួន២៩០០០ចម្រោះ ដែលស្មើនឹង៣ម៉ឺនគ្រួសារ ដែលពួកគាត់រស់នៅតាមជនបទ នៃប្រទេសកម្ពុជា។លោកបន្ដថា គម្រោងទឹកជាជីវិត នឹងជួយលើកកម្ពស់ជីវភាពរស់នៅរបស់ប្រជាពលរដ្ឋជាច្រើនពាន់នាក់ នៅក្នុងស្រុក ជីក្រែង និងស្រុកសូទ្រនិគម។ការដោះស្រាយ និងផ្គត់ផ្គង់តម្រូវការ របស់ប្រជាជននៅតាមជនបទ អង្គការទឹកដើម្បីកម្ពុជា កំពុងចូលរួមចំណែកក្នុងការសម្រេចគោលដៅជាសកលមួយគឺការ ទទួលបានទឹកស្អាត និងអនាម័យទូទាំងពិភពលោកអោយបាននៅឆ្នាំ ២០៣០ដែលនេះជាគោលដៅមួយ នៃគោលដៅជាច្រើនរបស់អង្គការសហប្រជាជាតិ។
លោក នាក នេរ៉ុន អភិបាលរងខេត្ដសៀមរាប មានប្រសាសនថា ការប្រើប្រាស់ទឹកស្អាតវាមានសារៈសំខាន់ណាស់សម្រាប់សុខភាពកុមារ ក៍ដូចជាប្រជាជនកម្ពុជាផងដែរ ដែលប្រជាពលរដ្ឋគ្រប់រូបត្រូវទទួលទានទឹកស្អាតឱ្យបានគ្រប់គ្នា។លោកបន្ថែមថា អាជ្ញាធរខេត្ដ បានគាំទ្រគម្រោងទឹកស្អាតដែលជួយប្រជាពលរដ្ឋកម្ពុជា និងដើម្បីឱ្យបានសម្រេចបាននូវគោលដៅអភិវឌ្ឍន៍ ឆ្នាំ២០២៥ ដល់២០៣០ កម្ពុជា ក្លាយជាប្រទេសដែលមានទឹកស្អាតប្រើប្រាស់មួយរយភាគរយ។ជាមួយគ្នានោះ ការផ្ដល់គម្រោងទឹកស្អាត ពីអង្គការទឹកដើម្បីកម្ពុជា និងអ្នកស្ម័គ្រចិត្ដមូលនិធិអន្ដរជាតិសឹង្ហបុរីនេះ បានបង្ហាញថា ប្រទេសទាំងពីរ កម្ពុជា សឹង្ហបុរី ជាមិត្ដភាពយូរអង្វែង៕
អត្ថបទនិងរូបភាព៖ លោក ឈិត សាវី
