នៅព្រឹកថ្ងៃទី៦ ខែកញ្ញា ឆ្នាំ២០២២នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានដឹកនាំកិច្ចប្រជុំសាមញ្ញលើកទី៤១ ក្នុងឆ្នាំទី៤ នៃអាណត្តិទី៣ របស់ក្រុមប្រឹក្សាខេត្តសៀមរាប នៅសាលប្រជុំសាលាខេត្តសៀមរាប និងមានការអញ្ជើញចូលរួមរបស់លោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប ព្រមទាំងឯកឧត្តម លោកជំទាវជាសមាជិក សមាជិកានៃក្រុមប្រឹក្សាខេត្ត អាជ្ញាធរជាតិអប្សរា ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក នាយកទីចាត់ការ អង្គភាពចំណុះសាលាខេត្ត និងវិស័យឯកជនផងដែរ។
ឆ្លងទៅតាមរបៀបវារៈនៃកិច្ចប្រជុំសាមញ្ញលើកទី៤១ របស់ក្រុមប្រឹក្សាខេត្ត ដែលបានគ្រោងទុកនោះ សមាជិក នៃក្រុមប្រឹក្សាខេត្ត បានធ្វើការពិនិត្យ ពិភាក្សា ព្រមទាំងបានលើកនូវចំណុចមួយចំនួន ពាក់ព័ន្ធលើការទៅចុះឈ្មោះបោះឆ្នោតនៅឃុំសង្កាត់ បញ្ហាទឹកជំនន់ និងការគ្រប់គ្រងទឹកក្រោយពេលទឹកស្រក ការគ្រប់គ្រងរបស់អាជ្ញាធរអប្សរា អំពីបញ្ហាបាក់រលំដើមឈើក្នុងតំបន់រមណីយដ្ឋានអង្គរ ការផ្ទុះការតវ៉ារបស់ប្រជាពលរដ្ឋរស់នៅក្នុងតំបន់១ និង តំបន់២ បញ្ហាផ្លូវមិត្តភាពកម្ពុជា.កូរ៉េ ដែលរងការខូចខាត ព្រមទាំងណែនាំដល់បណ្តាមន្ទីរ អង្គភាព ក្រុង ស្រុក ការផ្តល់របាយការណ៍ ប្រចាំខែឱ្យបាន់ទាន់ពេលវេលា។
បន្ទាប់ពីបណ្តាមន្ទីរ អង្គភាពបានធ្វើការបកស្រាយបំភ្លឺរួចមក លោក ពិន ប្រាកដ អភិបាលរងខេត្ត ក៏បានធ្វើការ ណែនាំ និង ផ្តល់នូវអនុសាសន៍មួយចំនួន ដល់បណ្តាមន្ទីរ អង្គភាព ព្រមទាំងធ្វើការកែតម្រូវ នូវរាល់ខ្លឹមសារក្នុងរបាយការណ៍ប្រចាំត្រីមាសទី៣របស់ខេត្ត និង បានជំរុញដល់អាជ្ញាធរក្រុង ស្រុក លើការផ្សព្វផ្សាយដល់ប្រជាពលរដ្ឋ មានអាយុ១៨ ទៅចុះឈ្មោះបោះឆ្នោត និង ពិនិត្យឈ្មោះក្នុងបញ្ជីបោះឆ្នាតតាមឃុំ សង្កាត់ ព្រមទាំងយកចិត្តទុកដាក់បងប្អូនដែលស្ម័ត្រចិត្តចាកចេញពីតំបន់រមណីដ្ឋានអង្គរ ទៅទីតាំងថ្មីភូមិធម្មជាតិរុនតាឯក និងជំរុញដល់ប្រជាពលរដ្ឋទៅចាក់វ៉ាក់សាំង ដូសជំរុញនៅតាមមណ្ឌលសុខភាពក្នុងមូលដ្ឋានខ្លួនផងដែរ។
ថ្លែងក្នុងកិច្ចប្រជុំនោះ ឯកឧត្តម អ៊ាន ឃុន បានលើកឡើងថា ព្រឹត្តិការណ៍សំខាន់ៗក្នុងខេត្ត រដ្ឋបាលខេត្តបានខិតខំបំពេញការងារ យ៉ាងយកចិត្តទុកដាក់ ទាំងកិច្ចការរដ្ឋបាល ការងារសន្តិសុខ សណ្តាប់ធ្នាប់សាធារណៈ ការងារអភិវឌ្ឍន៍ការងារបរិស្ថាន ការសម្អាតសួនតាមទីសាធារណៈ ការដោះស្រាយបញ្ហាប្រឈមនានា ការទប់ស្កាត់បទល្មើសផ្សេងៗ ការអនុវត្តបទបញ្ជានានារបស់រាជរដ្ឋាភិបាល និងការគ្រប់គ្រងគ្រោះមហន្តរាយដោយសារទឹកជំនន់ទឹកភ្លៀង។ ក្រោមការដឹកនាំរបស់ ឯកឧត្តម អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត បានអនុវត្តកិច្ចការសំខាន់ៗជាច្រើន ដែលបានឆ្លើយតបទៅនឹងសភាពការណ៍ជាក់ស្តែងដែលកើតមានឡើង។
ក្នុងនោះឯកឧត្តម បានកោតសរសើរ និង ថ្លែងអំណរគុណចំពោះការខិតខំប្រឹងប្រែងរបស់ គណៈអភិបាលខេត្ត លោក លោកស្រី ព្រមទាំងសមត្ថកិច្ចទាំងអស់ ដែលបានយកអស់កម្លាំងកាយ ស្មារតីក្នុងការអនុវត្តតួនាទី ភារកិច្ចបានយ៉ាងល្អប្រសើរ ។ កត្តាសំខាន់នោះ លើកការងារសន្តិសុខសង្គម ជូនដល់ថ្នាក់ដឹកនាំកំពូល ថ្នាក់ជាតិ អន្តរជាតិ ភ្ញៀវទេសចរណ៍ និង លើការបង្រ្កាបលុបបំបាត់នូវល្បែងស៊ីសងគ្រប់ប្រភេទក្នុងមូលដ្ឋាន ព្រមទាំងព្រឹត្តិការណ៍នៅចំការម្រេចភ្នំគូលែន និង បងប្អូនស្ម័ត្រចិត្តចាកចេញពីតំបន់រមណីដ្ឋានអង្គរ ទៅទីតាំងថ្មីភូមិធម្មជាតិរុនតាឯក។
ជាមួយនោះ ឯកឧត្តមក៏បាន អបអរសាទរចំពោះការអនុវត្តការងារសេវាសង្គមឆ្នាំ២០២០-២០២១ ដែលខេត្តសៀមរាបទទួលបានពានរង្វាន់ជើងឯកលេខ១ នៅ ទូទាំងប្រទេស និង ឃុំបាគង ស្រុកប្រាសាទបាគងទទួលបានលេខ២ទូទាំងប្រទេស ដែលបានប្រកាសជ័យលាភី កាលពីថ្ងៃទី២២ ខែកញ្ញា ឆ្នាំ២០២២ នៅក្រសួងមហាផ្ទៃ។
ឯកឧត្តមក៏បានផ្តាំផ្ញើដល់អាជ្ញាធរក្រុង ស្រុក ជំរុញដល់គ្រប់ឃុំ សង្កាត់ ត្រូវយកចិត្តទុកដាក់ផ្សព្វផ្សាយដល់ប្រជាពលរដ្ឋក្នុងមូលដ្ឋាន ទៅពិនិត្យឈ្មោះបោះឆ្នោត និង ទៅចុះឈ្មោះបោះ ឆ្នោត ព្រមទាំងបង្កើនការយកចិត្តទុកដាក់ខ្ពស់ចំពោះប្រជាពលរដ្ឋ រងគ្រោះទឺកជំនន់ និង រាល់ផលប៉ះពាល់នូវផលដំណាំរបស់បងប្អូនផងដែរ ។ ក្នុងនោះឯកឧត្តមប្រធាន ក៏បានធ្វើការថ្លែងអំណរគុណ ចំពោះឯកឧត្តមអភិបាលខេត្ត និង ជាប្រធានគណៈបញ្ជាការឯកភាពរដ្ឋបាលខេត្ត និង កងកម្លាំងទាំងបី ព្រមទាំងមន្ត្រីពាក់ព័ន្ធ ដែលបានដោះស្រាយបញ្ហាសំខាន់ៗដែលកើតឡើងក្នុងខេត្ត ធ្វើឲ្យមានស្ថេរភាព ស្ថានភាពក្នុងខេត្ត មានលក្ខណៈល្អប្រក្រតីប្រកបដោយក្តីមោទភាពទៀតផង៕
អត្ថបទ និង រូបភាព៖ លោក ជា ស្រស់
កែសម្រួល៖ លោក សេង ផល្លី
