នាព្រឹកថ្ងៃទី០៧ ខែតុលា ឆ្នាំ២០២២នេះ ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប និង លោកជំទាវ អ៊ុន វុនលី សៀង ណាំ អមដំណើរដោយ អស់លោក លោកស្រី ក្រុមការងារខេត្ត និងអាជ្ញាធរស្រុកបានចុះសួរសុខទុក្ខ និងនាំយកអំណោយរបស់សម្ដេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារចុះមូលដ្ឋានខេត្តសៀមរាប ជូនដល់គ្រួសារដែល រងគ្រោះដោយសារទឹកជំនន់ ដែលប្រឈមនឹងការខ្វះខាតស្បៀងអាហារចំនួន ៤៥០គ្រួសារក្នុងឃុំតាអានស្រុកក្រឡាញ់។
តាមរបាយការណ៍របស់ លោក សុខ ណារ៉េត អភិបាលស្រុកក្រឡាញ់ស្តីទី បង្ហាញថា៖ គិតមកដល់ពេលនេះ ស្រុកក្រឡាញ់ បានរងគ្រោះដោយសារទឹកជំនន់ចំនួន ២លើក គឺលើកទី១ ចាប់ពីថ្ងៃទី ៧ ដល់ថ្ងៃទី៣០ ខែកញ្ញា ឆ្នាំ២០២២ លិចឃុំចំនួន០៨ ក្នុងចំណោមឃុំទំាង១០ ស្មើនឹង៥៨ភូមិ លិចផ្ទះកម្រិតស្រាលចំនួន ជិត២ពាន់ខ្នងផ្ទះ ស្មើនឹងចំនួនជិត២ពាន់គ្រួសារ ក្នុងនោះរងគ្រោះខ្លាំង និងប៉ះពាល់ដល់គ្រួសារមានជីវភាពក្រីក្រសរុបចំនួន៧៦១ គ្រួសារ ព្រមទាំងប៉ះពាល់ដំណាំកសិកម្ម និងហេដ្ឋារចនាសម្ព័ន្ឋក្នុងស្រុកជាច្រើនទៀត។ ដោយឡែក ទឹកជំនន់លើកទី២ គឺនៅថ្ងៃទី២ ខែតុលា ឆ្នំា២០២២ រហូតមកដល់បច្ចុប្បន្ន និងកំពុងលិចឃុំចំនួន ៤។ គិតមកទល់ពេលនេះដែរ ស្ថានភាពទឹកនៅឃុំមួយចំនួននឹងដដែល និងមួយចំនួនទៀតបានស្រកចុះជាបណ្តើរៗ។
ជាមួយនឹងផលប៉ះពាល់នេះដែរ ឯកឧត្តម អ្នកឧកញ៉ា សៀង ណាំ បានសម្តែងការសោកស្តាយ ចំពោះការបាត់បង់ទ្រព្យសម្បត្តិរបស់បងប្អូនប្រជាពលរដ្ឋ នៅក្នុងគ្រោះធម្មជាតិនាពេលនេះ។ ឯកឧត្តម បានផ្ដាំផ្ញើដល់ប្រជាពលរដ្ឋទាំងអស់ ត្រូវមានការប្រុងប្រយ័ត្ន ចំពោះសត្វអសិរពិស និងកូនចៅតូចៗ អំឡុងពេលទឹកជំនន់។ ក្នុងនោះ ត្រូវរក្សាអនាម័យ ហូបស្អាត ផឹកស្អាត បង្ការនូវជំងឺឆ្លងផ្សេងៗ។
ព័ត៌មានជាតិ ថ្មីៗ
សូមជម្រាបថា អំណោយសប្បុរសរបស់សម្ដេចពិជ័យសេនា ទៀ បាញ់ ដែលបានប្រគល់ជូនដល់ប្រជាពលរដ្ឋ តាមរយៈឯកឧត្តម អ្នកឧកញ៉ា សៀង ណាំ នាពេលនោះ ក្នុងមួយគ្រួសារៗទទួលបាន៖ អង្ករចំនួន២៥គ.ក្រ ត្រីខ១យួរ និងថវិកាចំនួន៥ពាន់រៀល៕
.
អត្ថបទ និង រូបភាព៖ លោក យូ វង្ស និងលោក ទ្រា ពន្លឺ
កែសម្រួល៖ លោក សេង ផល្លី
