ប្រជាពលរដ្ឋរស់នៅភូមិទាំង៦ ក្នុងឃុំព្រះដាក់ ស្រុកបន្ទាយស្រី ខេត្តសៀមរាប មិនតម្រូវឱ្យរុះរើសំណង់ ឬលំនៅឋានឡើង ប៉ុន្តែប្រជាពលរដ្ឋ មិនត្រូវបានអនុញ្ញាតឱ្យសាងសង់សំណង់ខុសច្បាប់ថ្មី និងលក់ដីទៅបុគ្គលដទៃឡើយ នេះបើតាមការបញ្ជាក់របស់ឯកឧត្ដម ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដីនគររូបនីយកម្ម និងសំណង់ នៅឃុំព្រះដាក់ ព្រឹកថ្ងៃទី៧ ខែតុលា ឆ្នាំ២០២២នេះ។
ឯកឧត្តម ជា សុផារ៉ា បានបញ្ជាក់ជូនប្រជាពលរដ្ឋថា ករណីប្រជាពលរដ្ឋនៅឃុំព្រះដាក់ គឺឈរលើករណីស្ម័គ្រចិត្តតែប៉ុណ្ណោះ ដោយរាជរដ្ឋាភិបាលមិនបានបង្ខំឱ្យចេញពីមូលដ្ឋានចាស់នេះទេ។ កន្លងមក រាជរដ្ឋាភិបាលមានបំណងដាក់បញ្ចូលទឹកក្នុងបារាយណ៍ខាងកើតឡើងវិញ ដែលអាចមានទឹកប្រើប្រាស់ចំនួន ៣០លានម៉ែត្រគីប តែដោយករណីប៉ះពាល់ច្រើន ទើបរាជរដ្ឋាភិបាលពិចារណាដាក់បញ្ចូលទឹកតែមួយផ្នែកប៉ុណ្ណោះ គឺនៅផ្នែកខាងលិច ដែលភាគច្រើនជាដីស្រែ។
តែទោះជាយ៉ាងនេះក្ដី ឯកឧត្តម ជា សុផារ៉ា បានសង្កត់ធ្ងន់ផងដែរ ដល់ប្រជាពលរដ្ឋម្ចាស់ស្រុកធ្វើយ៉ាងណា ទប់ស្កាត់កុំឱ្យមានសំណង់ថ្មីកើនឡើង រក្សាទំនៀមទម្លាប់ពីបុរាណ និងកុំប៉ះពាល់ដល់ទីបុរាណដ្ឋាននានានៅក្នុងភូមិ ដើម្បីរក្សាតម្លៃជាសកលនៃរមណីយដ្ឋានអង្គរ។
ព័ត៌មានជាតិ ថ្មីៗ
គួរជម្រាបថា ការកើនឡើងនៃសំណង់ខុសច្បាប់ បាននិងកំពុងកើតមាននៅភូមិទាំង៦ ក្នុងឃុំព្រះដាក់ ក្នុងរួមមាន នៅក្នុងភូមិព្រះដាក់កើនឡើង៥០៩គ្រួសារ ភូមិថ្នល់បណ្ដោយកើនឡើង១១៤គ្រួសារ ភូមិថ្នល់ទទឹង២៨០គ្រួសារ នៅភូមិតាត្រៃកើនឡើង៣៣២ គ្រួសារ នៅភូមិតាកុះកើន៦៨៤ នៅអូរទទឹងកើន៣៩១គ្រួសារ៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
