នៅព្រឹកថ្ងៃទី០៦ ខែតុលា ឆ្នាំ២០២២នេះ រដ្ឋបាលឃុំស្វាយស ស្រុកវ៉ារិន ខេត្តសៀមរាប បានចេញសេក្តីបំភ្លឺមួយជូនដល់សាធារណជន បងប្អូន ប្រជាពលរដ្ឋ និងអ្នកប្រើប្រាស់បណ្តាញសង្គមឲ្យបានជ្រាបថា៖ កាលពីថ្ងៃទី២០ ខែកញ្ញា ឆ្នាំ២០២២ មានហ្វេសប៊ុកផេក(Facebook Pages) ឈ្មោះខ្មែរថ្ងៃនេះ និងឈ្មោះដំណឹងក្នុងស្រុក ដែលបានធ្វើការបង្ហោះចុះផ្សាយ រូបភាពវីឌីអូអត្ថាធិប្បាយមិនប្រក្រតីនូវព័ត៌មានមិនពិត ទៅលើកិច្ចប្រជុំបើកសំណើរដេញថ្លៃគម្រោងមូលនិធិឃុំ ឆ្នាំ២០២២ របស់រដ្ឋបាលឃុំស្វាយស និងឃុំប្រាសាទ នៅសាលាឃុំប្រាសាទ កាលពីថ្ងៃទី១៩ ខែកញ្ញា ឆ្នាំ ២០២២កន្លងមក ។
យោងទៅតាមសេចក្តីជូនដំណឹងលេខ៖២៣៦/២២ ស.ជ.ណ ចុះថ្ងៃទី១៩ ខែសីហា ឆ្នាំ២០២២ របស់រដ្ឋបាលឃុំស្វាយស និងឃុំប្រាសាទ ជូនដំណឹងស្តីពីការដេញថ្លៃកិច្ចសន្យាសំណង់។ គណ:កម្មការលទ្ធកម្មឃុំស្វាយស និងឃុំប្រាសាទ បានរៀបចំកិច្ចលទ្ធកម្មគម្រោងមូលនិធិឃុំ ឆ្នាំ២០២២ នៅព្រឹកថ្ងៃទី១៩ ខែកញ្ញា ឆ្នាំ២០២២ ដោយចាប់ផ្តើមទទួលសំណើរដេញថ្លៃនៅម៉ោង១០:០០នាទីព្រឹក និងពេលវេលាឈប់ទទួលសំណើរដេញថ្លៃនៅម៉ោង១០:១០នាទីព្រឹក (ដែលមានរយ:ពេលទទួលសំណើរដេញថ្លៃ១០នាទី) ទើបឈប់ទទួលសំណើរដេញថ្លៃ ដែលក្នុងនោះ មានក្រុមហ៊ុនបានដាក់សំណើរដេញថ្លៃគម្រោងមូលនិធិឃុំឆ្នាំ២០២២ គឺឃុំស្វាយស ទទួលបានសំណើរដេញថ្លៃចំនួន ៤ក្រុមហ៊ុន និងឃុំប្រាសាទ ទទួលបានសំណើរ ៤ក្រុមហ៊ុនដែរ។
បន្ទាប់មកគណ:កម្មការលទ្ធកម្មទាំងពីឃុំ បានធ្វើការបើកស្រង់តម្លៃដាក់លើក្រដាសផ្ទាំងឆាតដែលក្រុមហ៊ុននីមួយៗ បានដាក់ក្នុងសំណើរដេញថ្លៃ ហើយគណ:កម្មការលទ្ធកម្មឃុំបានពិនិត្យ និងវាយតម្លៃទៅលើសំណើររបស់ក្រុមហ៊ុននីមួយៗ ដោយមានការចូលរួមពីតំណាងទីចាត់ការផែនការ និងវិនិយោគខេត្ត មន្ត្រីបច្ចេកទេសប្រចាំស្រុកវ៉ារិន និងការិយាល័យផែនការ និងគាំទ្រឃុំសង្កាត់ នៃរដ្ឋបាលស្រុកវ៉ារិន ក្នុងការបើកសំណើដេញថ្លៃនោះមានការចូលរួមពីសំណាក់អ្នកសារព័ត៌មានចំនួនពីររូប ក្នុងនោះលោក តិ លឹមហាក់ អ្នកសារព័ត៌មានខ្មែរថ្ងៃនេះ មានមតិថា ខ្ញុំបាទមានសេចក្តីរីករាយសប្បាយចិត្តចំពោះការដេញថ្លៃគម្រោងរបស់ថ្នាក់មូលដ្ឋាន មានពីរឃុំមានពីរគម្រោង សូមឲ្យមានដំណើរការរលូន ហើយកុំឲ្យមានភាពមិនប្រក្រតី សូមឲ្យដំណើរការទៅតាមគោលការរបស់សៀវភៅរបស់ឃុំ សង្កាត់ ខ្ញុំបាទអ្នកសារព័ត៌មានមកនេះមិនមានអ្វីជំទាស់រារាំងក្នុងកិច្ចលទ្ធកម្មនោះទេ គឺមកមើលថា តើការដេញថ្លៃគម្រោងមូលនិធិឃុំ និងកម្មវិធីប្រជុំបើកសំណើដេញថ្លៃនេះ ដែលមានមតិបើកអង្គប្រជុំចាប់ពីទទួលសំណើម៉ោង ១០:០០នាទី ឈប់ទទួលសំណើម៉ោង ១០:១០នាទី ខ្ញុំបាទ ឃើញថា គណ:កម្មការបានធ្វើត្រឹមត្រូវមិនមានការខ្សឹបខ្សៀវ មិនហួសម៉ោង មិនមានការលាក់លៀម ដើម្បីហែកថវិការដ្ឋចែកគ្នាចាយនោះទេ ធ្វើទៅតាមច្បាប់ ទៅតាមគោលការរបស់រដ្ឋត្រឹមត្រូវ។ ក្រោយពីពិនិត្យធ្វើការវាយតម្លៃរួចមក ឃើញថា សំណើដេញថ្លៃនីមួយៗ គឺមានសុពលភាពគ្រប់គ្រាន់ ដែលអាចទទួលយកបាន ហើយគណ:កម្មលទ្ធកម្មឃុំបានធ្វើការប្រកាសលទ្ធផលដល់ក្រុមហ៊ុន ដែលទទួលបានជោគជ័យក្នុងការដាក់សំណើដេញថ្លៃ។
បន្ទាប់មក លោក តិ លឹមហាក់ អ្នកសារព័ត៌មានខ្មែរថ្ងៃនេះ បានលើកឡើងក្នុងអង្គប្រជុំថា ក្រុមហ៊ុនបានដេញថ្លៃបាន សូមឲ្យធ្វើទៅតាមបទដ្ឋានបច្ចេកទេសត្រឹមត្រូវតាមពេលវេលា និងសូមឲ្យគណ:កម្មការជួយមើលពន្លឿនឲ្យឆាប់រួចឲ្យតាមបទដ្ឋានបច្ចេកទេសផង។ គណ:កម្មការលទ្ធកម្មឃុំស្វាយស សូមជម្រាបជូនដល់សាធារណជន មេត្តាជ្រាបថា នៅក្នុងកិច្ចដំណើរការនៃការអនុវត្តនីតិវិធីនៃកិច្ចលទ្ធកម្ម ចាប់តាំងពីពេលដំណើរការរហូតដល់ការប្រកាសលទ្ធផល នៃការដេញថ្ល គឺពុំមានបាតុភាពអសកម្ម ឬប្រក្រតីឡើយ។ ជាមួយនោះ កិច្ចប្រជុំបើកសំណើដេញថ្លៃនោះ ក៏ពុំមានការរារាំងការបង្ខិតបង្ខំដល់អ្នកទទួលការ ឬក្រុមហ៊ុន ដែលបានចូលរួមដាក់សំណើរដេញថ្លៃនោះដែរ មិនដូចអ្វី ដែលអ្នកសារព័ត៌មាន ខ្មែរថ្ងៃនេះ និងដំណឹងក្នុងស្រុក បានចុះផ្សាយនោះទេ។ ពាក់ព័ន្ធនឹងការលើកឡើងខាងលើ រដ្ឋបាលឃុំស្វាយស សូមធ្វើការបំភ្លឺជូនសាធារណជនឲ្យបានជ្រាបថា តាមការពិនិត្យរបស់គណ:កម្មការលទ្ធកម្មឃើញថា ការអនុត្តនីតិវិធីលទ្ធកម្ម ដោយទីតាំងអនុវត្តកិច្ចលទ្ធកម្ម គឺស្ថិតនៅក្នុងអគាសាលាឃុំតែប៉ុណ្ណោះ។ ប្រសិនបើត្រួតពិនិត្យឃើញថា អ្នកទទួលការអនុវត្តមិនត្រឹមត្រូវទៅតាមលក្ខណ:បច្ចេកទេសនោះទេ គឺតម្រូវអោយអ្នកទទួលការអនុវត្តឡើងវិញតាមលក្ខណ:បច្ចេកទេស ដែលបានចុះក្នុងកិច្ចសន្យាទើបរដ្ឋបាលឃុំសម្រេចទូទាត់ថវិកា ក្នុងអនុវត្តគម្រោងដល់អ្នកទទួលការ ដែលបានអនុវត្តនោះ។ អាស្រ័យហេតុជម្រាបជូនខាងលើនេះ សូមសាធារណជន បងប្អូនប្រជាពលរដ្ឋ និងអ្នកសារព័ត៌មានមេត្តាជ្រាប៕
អត្ថបទ និងរូបភាព: លោកស៊ាន សុផាត កែសម្រួលដោយ លីវ សុខុន!!!
