ចាប់ពីថ្ងៃទី៦ ខែតុលា ឆ្នាំ២០២២នេះទៅ ក្រសួងផែនការ នឹងចាប់ផ្ដើមបើកយុទ្ធនាការកំណត់ និងផ្ដល់បណ្ណសមធម៌ ជូនប្រជាពលរដ្ឋរស់នៅក្នុងតំបន់រមណីយដ្ឋានអង្គរ ដែលបានស្ម័គ្រចិត្តទៅរស់នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្ដសៀមរាប ដែលស្ថិតនៅខាងមុខអង្គរវត្ដ ក្រុងសៀមរាប។
ឯកឧត្ដម ថេង បញ្ញាធន ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានផែនការ និងជាប្រធានក្រុមការងារធ្វើបណ្ណសមធម៌ លើកឡើងថា ប្រជាពលរដ្ឋរស់នៅតំបន់រមណីយដ្ឋានអង្គរ ដែលបានស្ម័គ្រចិត្តទៅរស់នៅភូមិធម្មជាតិរុនតាឯក សរុបចំនួន ៤,២២៩គ្រួសារ នឹងត្រូវទទួលបានបណ្ណសមធម៌ ស្របតាមគោលនយោបាយរបស់រាជរដ្ឋាភិបាល ហើយការរៀបចំជាប្រព័ន្ធនេះ នឹងមិនធ្វើឱ្យប្រជាពលរដ្ឋរង់ចាំយូរនោះទេ។
ឯកឧត្ដម បញ្ជាក់ថា ចំពោះនីតិវិធី ក្រុមការងារធ្វើការសម្ភាសន៍ក្នុងមួយលើកចំនួន ៣០គ្រួសារ និងប្រើពេលតែប៉ុន្មាននាទីប៉ុណ្ណោះ ក្នុងនោះលោកស្រីមេឃុំរុនតាឯក ក៏នៅជាមួយផ្ទាល់ដើម្បីចុះហត្ថលេខា។ ជាពិសេស ពួកគាត់ក្រោយពីទទួលបានបណ្ណសមធម៌ភ្លាម គឺអាចចុះបញ្ជីទទួលលេខសម្ងាត់ សម្រាប់បើកប្រាក់នៅតាមទីតាំង ដែលមានសេវាកម្មវីង នៅក្បែរផ្ទះរបស់ពួកគាត់បំផុត។ ឯកឧត្ដមបន្ថែមថា ចំពោះឯកសារដែលប្រជាពលរដ្ឋ ត្រូវយកមកធ្វើបណ្ណសមធម៌ មានដូចជា សៀវភៅគ្រួសារ សៀវភៅស្នាក់នៅ បង្កាន់ដៃទីតាំងដីឡូតិ៍ និង អត្តសញ្ញាណបណ្ណសញ្ជាតិខ្មែរ។ ទន្ទឹមនោះ ចំពោះប្រជាពលរដ្ឋ ដែលមានបណ្ណក្រីក្រប្រភេទ២ ក៏អាចយកមកប្ដូរជាបណ្ណក្រីក្រប្រភេទ១ វិញនៅទីនេះផងដែរ។
ព័ត៌មានជាតិ ថ្មីៗ
ប្រជាពលរដ្ឋដែលបានមកធ្វើបណ្ណសមធម៌ នៅខាងមុខប្រាសាទអង្គរវត្តនាពេលនោះ បានបង្ហាញចិត្តសប្បាយរីករាយ និងលើកឡើងថាបណ្ណនេះ ពិតជាមានសារៈសំខាន់ណាស់ចំពោះគាត់ ព្រោះថវិកាដែលផ្ដល់ដោយរាជរដ្ឋាភិបាលនេះ នឹងជួយសម្រួលដល់ជីវភាពរបស់គ្រួសារគាត់។
យោងតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសសំណេះសំណាលជាមួយមួយប្រជាជននៅតំបន់អង្គរដែលស្ម័គ្រចិត្តទៅរស់នៅភូមិធម្មជាតិរុនតាឯកចំនួន២លើក។ (លើកទី១ កាលពីថ្ងៃទី១៣ ខែកញ្ញា ឆ្នាំ២០២២ ចំនួន១ ១១៧គ្រួសារ និងលើកទី២ចំនួន២៨៥៣គ្រួសារ និងប្រជាជនដែលរងផលប៉ះពាល់ដោយសារគម្រោងអភិវឌ្ឍន៍ហេដ្ឋារចនាសម្ព័ន្ធចំនួន៥៩៤គ្រួសារ។ក្រសួងផែនការបានបើកយុទ្ធនាការកំណត់ និងផ្ដល់បណ្ណសមធម៌លើកទី១ កាលពីថ្ងៃទី២៩ និង៣០ ខែកញ្ញា ឆ្នាំ២០២២ នៅភូមិធម្មជាតិ រុនតាឯកផ្ទាល់ ដោយសម្រេចបានការផ្តល់បណ្ណចំនួន៤៥២គ្រួសារ ក្នុងនោះអ្នកមានបណ្ណចាស់ចំនួន១០៨ និងថ្មីចំនួន៣៤៤គ្រួសារ។ បន្ទាប់ពីស្ម័គ្រចិត្តប្តូរទៅរស់នៅភូមិធម្មជាតិរុនតាឯក គិតត្រឹមថ្ងៃទី៥ ខែតុលា ឆ្នាំ២០២២នេះ ប្រជាពលរដ្ឋ ដែលនឹងមកទទួលបណ្ណសមធម៌ មានចំនួនសរុប៤,២២៩គ្រួសារ៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
