ឯកឧត្តម ទិន ពន្លក រដ្ឋលេខាធិការក្រសួងបរិស្ថាន បានបញ្ជាក់ថា បច្ចុប្បន្នអាស៊ាន បាននឹងកំពុងរៀបចំយុទ្ធសាស្រ្ត អភិវឌ្ឍន៍សេដ្ឋកិច្ចសង្គម ក្រោយការរាលដាលជំងឺកូវីដ-១៩ ឲ្យមានភាពធន់នឹងកត្តាគម្រាមកំហែងពីខាងក្រៅ ជាអាទិ៍ជំងឺរាតត្បាត ការប្រែប្រួលអាកាសធាតុ និងបញ្ហាភូមិសាស្ត្រនយោបាយ ក្នុងនោះវិស័យបរិស្ថាន និងការគ្រប់គ្រងធនធានធម្មជាតិ ដើរតួនាទីសំខាន់ក្នុងការអភិវឌ្ឍសេដ្ឋកិច្ចតំបន់។
ឯកឧត្តមថ្លែងបែបនេះកាលពីព្រឹកថ្ងៃទី០៥ ខែតុលា ឆ្នាំ២០២២ នៅខេត្តសៀមរាប ក្នុងកិច្ចប្រជុំឧត្តមមន្រ្តីបរិស្ថានអាស៊ាន លើកទី៣៣ និងកិច្ចប្រជុំពាក់ព័ន្ធ ដែលមានការអញ្ជើញចូលរួមពីថ្នាក់ដឹកនាំ នៃក្រសួងស្ថាប័ន នៃបណ្តាប្រទេសអាស៊ាន ទាំង១០ រួមជាមួយតំណាងលេខាធិការអាស៊ាន និងភ្ញៀវកិត្តិយសជាតិ និងអន្តរជាតិជាច្រើន។
ឯកឧត្តម ទិន ពន្លក បានបញ្ជាក់ទៀតថា រដ្ឋាភិបាលនៃបណ្តាប្រទេសសមាជិកអាស៊ាន បាននឹងកំពុងយកចិត្តទុកដាក់លើការងារបរិស្ថាន ការអភិវឌ្ឍសេដ្ឋកិច្ចបៃតង ទីក្រុងឆ្លាតវៃ ហេដ្ឋារចនាសម្ព័ន្ធប្រកបដោយនិរន្តរភាព។ល។ ទន្ទឹមនឹងនេះ មេដឹកនាំអាស៊ាន បាននឹងកំពុងស្តារសេដ្ឋកិច្ចគ្រប់ជ្រុងជ្រោយឡើងវិញ ដែលផ្តោតសំខាន់លើការផលិត និងការប្រើប្រាស់ដោយចីរភាពរួមជាមួយសេដ្ឋកិច្ចវិលជុំ។
មានប្រសាសន៍ក្នុងឱកាសនោះដែរ ក្នុងនាមរដ្ឋបាលខេត្តសៀមរាប លោក យុន លីនណេ អភិបាលរងខេត្ត បានបង្ហាញភាពជឿជាក់ថាអាស៊ាន និងដៃគូពាក់ព័ន្ឋនឹងពិភាក្សាយ៉ាងផុលផុសក្នុងស្មារតីសហប្រតិបត្តិការ និងស្ថាបនា ដើម្បីស្នើរង្វាស់សមស្រប ដើម្បីបង្កើនកិច្ចសហប្រតិបត្តិការក្នុងតំបន់ ក្នុងវិស័យបរិស្ថាន ដែលរួមចំណែកក្នុងការសម្រេចផែនការសហគមន៍សង្គម-វប្បធម៌អាស៊ាន ឆ្នាំ២០២៥ បន្តជំរុញកិច្ចសហប្រតិបត្តិការបរិស្ថាន ក្នុងរដ្ឋសមាជិកអាស៊ាន ព្រមទាំងធ្វើការកាន់តែជិតស្និទ្ធជាមួយដៃគូរបស់អាស៊ាន ដើម្បីទទួលបានការគាំទ្រយ៉ាងទូលំទូលាយ និងស៊ីជម្រៅ ដើម្បីប្រមូលការរួមចំណែកបន្ថែមទៀត លើការការពារបរិស្ថាន និងការអភិវឌ្ឍប្រកបដោយចីរភាពនៅក្នុងតំបន់។
សូមបញ្ជាក់ថា ក្នុងនាមប្រធានអាស៊ាន ដែលបានកំណត់យុទ្ធសាស្រ្ត ក្រោមមូលបទ« អាស៊ានដោះស្រាយបញ្ហាប្រឈមជាមួយគ្នា» គឺប្រទេសកម្ពុជា កំពុងពង្រឹងកិច្ចសហប្រតិបត្តិការក្នុងតំបន់ ជាមួយភាគីពាក់ព័ន្ធទាំងអស់ ដើម្បីដោះស្រាយបញ្ហាបរិស្ថាននៅក្នុងតំបន់ និងសកល។ យុទ្ធសាស្រ្តចំនួន៧ ត្រូវបានដាក់ចេញសម្រាប់ការងារបរិស្ថានគឺ មានការអប់រំបរិស្ថាន ការគ្រប់គ្រងបរិស្ថានតំបន់ឆ្នេរ ទីក្រុងនិរន្តរភាព ការគ្រប់គ្រងសារធាតុគីមី និងសំណល់ ប្រភពទឹក ការប្រែប្រួលអាកាសធាតុ និងការអភិរក្សធនធានធម្មជាតិនិងជីវៈចម្រុះ។
ចំពោះសមិទ្ធផលរបស់កម្ពុជា ដែលសម្រេចបាននាពេលកន្លងមក កម្ពុជាបានចូលរួមអនុវត្តនូវកិច្ចព្រមព្រៀងពហុភាគី ស្តីពីបរិស្ថានជាច្រើន ជាពិសេសបានពង្រឹងការប្តេជ្ញាចិត្ត ធ្វើសកម្មភាពប្រឆាំងនឹងការប្រែប្រួលអាកាសធាតុ តាមរយៈនូវការដាក់ជូននូវរបាយការណ៍ជាតិ ស្តីពីការរួមចំណែកអនុវត្តអនុសញ្ញា ប្រែប្រួលអាកាសធាតុ (NDC) យុទ្ធសាស្រ្តរយៈពេលវែងស្តីពីអព្យាក្រឹត្យកាបូន និងធ្វើសកម្មភាព និងវិធានការសមស្រប ដើម្បីគ្រប់គ្រងប្លាស្ទិក និងសំណល់ កិច្ចសហប្រិបត្តិការក្នុងស្រុកនិងអន្តរជាតិ និងការកៀរគរធនធាន ដើម្បីគ្រប់គ្រងធនធានធម្មជាតិ រួមទាំងតាមរយៈហិរញ្ញប្បទានការបូន៕
