ប្រជាពលរដ្ឋនៅភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប សម្ដែងការសប្បាយចិត្ដ និងថ្លែងអំណគុណសម្ដេចតេជោ ហ៊ុន សែន នាយករដ្ឋមន្ដ្រី ដែលបានជួយឧបត្ថម្ភទាំងសម្ភារៈថវិកា និងផ្ដល់ប័ណ្ណសមធម៌ ឬប័ណ្ណក្រីក្រ ដែលប្រជាពលរដ្ឋដែលមករស់នៅក្នុងតំពន់នេះ ខណៈដែលពួកគាត់កំពុងជួបការលំបាកលើជីវភាពគ្រួសារ បន្ទាប់ពីចាកចេញពីលំនៅឋានមិនរៀបរយនៅក្រុងសៀមរាប ទៅនៅភូមិធម្មជាតិរុនតាឯកនេះ។
ពួកគាត់បានលើកឡើងថា ប័ណ្ណក្រីក្រនេះ បានបង្ហាញថា សម្ដេចតេជោ ហ៊ុន សែន នាយករដ្ឋមន្ដ្រី មានការយកចិត្ដទុកដាក់ខ្ពស់ចំពោះជីវភាពប្រជាពលរដ្ឋ ដែលបានផ្លាស់ទីលំនៅថ្មី ហើយអាចជួយឱ្យពួកគាត់បានរួចផុតពីការលំបាកច្រើនយ៉ាង។ ពួកគាត់បានបន្ដថា មានតែសម្ដេចតេជោ ហ៊ុន សែន ទេដែលបានចុះដល់ទីលំនៅផ្ទាល់ នឹងដឹងសុខទុក្ខពីការលំបាករបស់ពួកគាត់។
សូមរំលឹកថា សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជណាចក្រកម្ពុជា បានដាក់ចេញនូវគោលនយោបាយមួយចំនួន ដើម្បីអភិវឌ្ឍនិងលើកកម្ពស់ សុខុមាលភាពប្រជាពលរដ្ឋ ដែលបានស្ម័គ្រចិត្ដចាកចេញពីតំបន់រមណីយដ្ឋានអង្គរ នឹងត្រូវផ្លាស់មកតាំងទីថ្មីនៅតំបន់ភូមិធម្មជាតិរុនតាឯកនេះ។ គោលនយោបាយទាំងនោះ រួមមានការធានានូវការដឹកជញ្ជូនសម្ភារពីទីតាំងចាស់មកទីតាំងថ្មីផ្តល់ថវិកាសម្ភារៈ ដើម្បីរួមចំណែកកសាងលំនៅឋាន និងផ្តល់សមធម៌ (បណ្ណក្រីក្រ) ទាំងប្រជាពលរដ្ឋទើបស្ម័គ្រចិត្តមកថ្មី និងប្រជាពលរដ្ឋដែលរើមកពីតំបន់មាត់ស្ទឹងសៀមរាប ក្នុងឆ្នាំ២០២០ផង។ ប្រជាពលរដ្ឋ បានមើលឃើញពីការដឹកនាំដ៏ត្រឹមត្រូវ ប្រកបដោយចក្ខុវិស័យវែងឆ្ងាយ និងភាពប្រាកដនិយមរបស់ សម្តេចអគ្គមហាសេនាបតីតេជោ ហ៊ុន សែន ដែលកម្ពុជាទទួលបានសុខសន្តិភាពពេញលេញ ការបង្រួបបង្រួមជាតិ ស្ថេរភាពនយោបាយ និងសណ្តាប់ធ្នាប់សង្គម ដែលជាបុរេលក្ខខណ្ឌដ៏ចាំបាច់មិនអាចខ្វះបាន សម្រាប់ការអភិវឌ្ឍសេដ្ឋកិច្ច-សង្គម៕
អត្ថបទ និងរូបភាព៖ លោក បូ សាវី
