ក្រោយស្ម័គ្រចិត្តរុះរើលំនៅឋាន និងចាកចេញពីស្ទឹងសៀមរាប កាលពីដើមឆ្នាំ២០២១ ដើម្បីចូលរួមអភិវឌ្ឍន៍ទីក្រុងទេសចរណ៍ប្រវត្តិសាស្រ្ត ប្រកបដោយសោភ័ណភាពប្រជាប្រិយភាព និងទាក់ទាញភ្ញៀវទេសចរមកទស្សនាឱ្យបានជាអតិបរិមាក្រោយពីបញ្ចប់វិបត្តិជំងឺកូវីដ-១៩ ប្រជាពលរដ្ឋនៅតាមមាត់ស្ទឹងសៀមរាប បានទទួលយកគោលនយោបាយរបស់រាជរដ្ឋាភិបាល ដោយចាប់ឆ្នោតរើសទីតាំងដីឡូត៍ថ្មី ទំហំ២០ គុណនឹង ៣០ម៉ែត្រ ស្ថិតនៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ជាមួយនិងការអភិវឌ្ឍហេដ្ឋារចនាសម្ព័ន្ធផ្លូវ ថ្នល់ សាលារៀន អណ្ដូងទឹក និងប្រព័ន្ធភ្លើងជាដើម។
អ្នកស្រី វ៉ា ចាន់ណារិទ្ធ អតីតប្រជាពលរដ្ឋនៅមាត់ស្ទឹងសៀមរាប និងស្ម័គ្រចិត្តមករស់នៅភូមិធម្មជាតិរុនតាឯក បានលើកឡើងពីអារម្មណ៍មករស់នៅទីនេះថា តំបន់នេះ វាស្ថិតនៅឆ្ងាយបន្តិចមែន មិនដូចកន្លែងរស់ចាស់នោះទេ ប៉ុន្តែនៅទីនេះ អ្នកស្រីមានកម្មសិទ្ធពេញលេញចាត់ចែងលើដីផ្ទាល់ខ្លួន ដែលខុសពីដីមាត់ស្ទឹងដែលជាសម្បត្តិរបស់រដ្ឋ។ ជាមួយនោះ សាលារៀន វត្តអារាម ទីផ្សារ មណ្ឌលសុខភាព ជាមួយហេដ្ឋារចនាសម្ព័ន្ធខ្វាត់ខ្វែងជាច្រើនទៀត។
អ្នកស្រី បានបង្ហាញនូវទឹកចិត្តរីករាយ ក្រោយទទួលបានការយកចិត្តទុកដាក់ខ្ពស់ ពីប្រមុខរាជរដ្ឋាភិបាល ដែលបានជួយឧបត្ថម្ភថវិកា ធ្វើបណ្ណសមធម៌សម្រាប់ប្រជាពលរដ្ឋក្រីក្រ និងបណ្ណស្ត្រីមានផ្ទៃពោះផងដែរ។ អ្នកស្រី ចង់ឱ្យប្រជាពលរដ្ឋ ដែលទទួលបានគោលនយោបាយមករស់នៅភូមិធម្មជាតិរុនតាឯក មករស់នៅទីនេះ ដើម្បីស្វែងយល់ពីសក្ដានុពល និងការអភិវឌ្ឍជាច្រើន ដែលសម្រេចបាននាពេលថ្មីនេះ និងពេលអនាគតផងដែរ។
លោក មឿន មិត្ដ សមាជិកក្រុមប្រឹក្សាឃុំរុនតាឯក ស្រុកបន្ទាយស្រី បង្ហាញថា រយៈពេលពីរឆ្នាំនេះ ដែលប្រជាពលរដ្ឋស្ម័គ្រចិត្តមករស់នៅភូមិធម្មជាតិរុនតាឯកនេះ អាជ្ញាធរបានយកចិត្តទុកដាក់ និងលើកទឹកចិត្តដំណាំ និងចិញ្ចឹមសត្វជាលក្ខណៈគ្រួសារ ប៉ុន្តែប្រជាពលរដ្ឋមួយចំនួន ដែលមានការងារនៅក្នុងក្រុងសៀមរាប មានការលំបាកខ្លះៗ ដោយសារឆ្ងាយពីលំនៅឋាន។
សូមរំលឹកថា ប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន បានដាក់ចេញនូវគោលនយោបាយមួយចំនួនដើម្បីអភិវឌ្ឍនិងលើកកម្ពស់សុខុមាលភាពប្រជាពលរដ្ឋ ដែលនឹងត្រូវផ្លាស់មកតាំងទីថ្មីនៅតំបន់ភូមិធម្មជាតិរុនតាឯកនេះ។ គោលនយោបាយទាំងនោះ រួមមានការធានានូវការដឹកជញ្ជូនសម្ភារពីទីតាំងចាស់មកទីតាំងថ្មី, ផ្តល់ថវិកា ១ ២០០ ០០០រៀល ស័ង្កសី៣០សន្លឹក ក្នុងមួយគ្រួសារ ដើម្បីរួមចំណែកកសាងលំនៅឋាន និងផ្តល់សមធម៌ (បណ្ណក្រីក្រ) ទាំងសម្រាប់ពលរដ្ឋទើបស្ម័គ្រចិត្តចេញពីតំបន់រមណីយដ្ឋានអង្គរផងដែរ៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
