នៅព្រឹកថ្ងៃទី២៩ ខែកញ្ញា ឆ្នាំ២០២២នេះ ឯកឧត្ដម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំក្រុមការងារ ចុះសួរសុខទុក្ខ និងនាំយកនូវអំណោយមនុស្សធម៌របស់សាខាកាកកបាទក្រហមកម្ពុជាខេត្ដ ប្រគល់ជូនប្រជាពលរដ្ឋ ចំនួន ២៨០គ្រួសារ ដែលរងគ្រោះដោយទឹកជំនន់ នៅស្រុកក្រឡាញ់ ខេត្តសៀមរាប។ ដោយអំណោយក្នុង១គ្រួសារទទួលបាន៖ អង្ករ ៣០គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ ទឹកត្រី១យួរ និងថវិកា ៥ម៉ឺនរៀល។
បើតាមលោក លោក សុខ ណារ៉េត អភិបាលស្រុកក្រឡាញ់ស្ដីទី បានឱ្យដឹងថា ដោយមានភ្លៀងធ្លាក់ជាហូរហែ ជំនន់ទឹកភ្លៀងបានហូរមកពីស្រុកស្រីស្នំ និងស្រុកវ៉ារិន បណ្តាលលិចដំណាំស្រូវ ដំណាំរួមផ្សំ លិចក្រោមផ្ទះ លិចបរិវេណទីធ្លារផ្សេងៗ លិចផ្លូវ លិចសាលារៀន មន្ទីរពេទ្យ អគារដ្ឋបាលសាធារណៈ ធ្វើឲ្យប៉ះពាល់ឃុំចំនួន ១០ឃុំ ស្មើនឹង ៥៨ភូមិ និងប៉ះពាល់ដល់ប្រជាពលរដ្ឋ ១,៨៩៧គ្រួសារ។ កន្លងមកប្រជាពលរដ្ឋដែលបានរងគ្រោះដោយទឹកជំនន់ ប្រឈមនឹងការខ្វះខាតស្បៀងចំនួន ៥១១គ្រួសារ ត្រូវបានទទួលអំណោយហើយ និងប្រជាពលរដ្ឋចំនួន ៣០០គ្រួសារទៀត នឹងទទួលបានអំណោយពីសប្បុរសជនបន្ថែមទៀត។
មានប្រសាសន៍ក្នុងឱកាសនោះ ឯកឧត្តម ទៀ សីហា បាននាំយកនូវប្រសាសន៍ផ្ដាំផ្ញើ សួរសុខទុក្ខ និងការយកចិត្តទុកដាក់ពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចទាំងទ្វេតែងគិតគូរខ្ពស់បំផុត និងមុនគេបង្អស់ ចំពោះសុខទុក្ខប្រជាលពេលរដ្ឋគ្រប់រូបដោយមិនប្រកាន់វណ្ណៈ ពូជសាសន៍ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ចំពោះអំណោយមនុស្សធម៌ដែលនាំមកជូននាពេលនេះ គឺអាចជួយសម្រាលទុក្ខលំបាករបស់លោកយាយ លោកតា បងប្អូន បានមួយរយៈខ្លីក៍ពិតមែន តែនេះជាការបង្ហាញពីការយកចិត្តទុក្ខដាក់របស់រាជរដ្ឋាភិបាល និងកាកបាទក្រហមកម្ពុជា និងរាជរដ្ឋាភិបាល ដែលជានិច្ចកាលតែងតែនៅជាមួយប្រជាពលរដ្ឋ ទោះស្ថិតក្នុងកាលៈទេសៈណាក៏ដោយ។
ឯកឧត្តមបន្ថែមថា អ្វីដែលយើងទាំងអស់គ្នាមិនអាចបំភ្លេចបាន និងចងចំាជានិច្ចនោះ គឺទីណាមានការលំបាក ទីនោះតែងតែមាន កាកបាទក្រហមកម្ពុជា និងរាជរដ្ឋាភិបាល។ ទុក្ខលំបាករបស់បងប្អូន គឺជាទុក្ខលំបាករបស់ សម្តេចតេជោ ហ៊ុន សែន និងសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន។ ឯកឧត្តម ក៏បានសំណូមពរ និងផ្តាំផ្ញើឲ្យបងប្អូនប្រជាពលរដ្ឋប្រុងប្រយ័ត្នឲ្យបានខ្ពស់ ចំពោះចរន្តអគ្គិសនីឲ្យបានខ្ពស់ ប្រុងប្រយ័ត្នចំពោះសត្វអសិរពិស និងកុំមានការធ្វេប្រហែសចំពោះកូនចៅតូចៗ ព្រោះនេះជារដូវវស្សាដែលកំពុងជួបជំនន់ទឹកភ្លៀង កុំឲ្យមានហេតុការអាក្រក់ណាមួយកើតឡើងក្នុងក្រុមគ្រួសារ និងប្រុងប្រយ័ត្នចំពោះជំងឺឆ្លងផ្សេងៗ។
បើយោងតាមរបាយការណ៍របស់គណកម្មាធិការគ្រោះមហន្ដរាយខេត្ដសៀមរាប បានបង្ហាញថា គិតចាប់ពីថ្ងៃទី១៧ ដល់ថ្ងៃទី២៨ ខែកញ្ញា ឆ្នាំ២០២២នេះ ជំនន់ទឹកភ្លៀងក្នុងខេត្តសៀមរាប បណ្តាលឱ្យមានផលប៉ះពាល់ដល់ប្រជាពលរដ្ឋចំនួន ២៥,០៣១គ្រួសារ ភូមិចំនួន ៣១៤ភូមិ ឃុំចំនួន៦១ នៃស្រុកចំនួន៩ រួមមាន ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកសូទ្រនិគម ស្រុកប្រាសាទបាគង និងស្រុកអង្គរធំ។ គ្រោះធម្មជាតិនេះ បានបង្កឱ្យមានផលប៉ះពាល់ និងការខូចខាតដំណាំស្រូវប្រជាពលរដ្ឋ ៣២,៦៥៣ហិកតា ស្មើនឹង ២៣,៥៧៨គ្រួសារ ដំឡូងមី ៤,៦២៦ហិកតា ស្មើនឹង ៣,៦២៦គ្រួសារ ព្រមទាំងហេដ្ឋារចនាសម្ព័ន្ធផ្លូវថ្នល់ និងសត្វចិញ្ចឹមផងដែរ៕
អត្ថបទ និង រូបភាព៖ លោក បូ សាវី, លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
