យោងតាមរបាយការណ៍របស់មន្ទីរទេសចរណ៍ខេត្ដសៀមរាប បានឱ្យដឹងថា រយៈពេល៣ថ្ងៃ ចាប់ពីថ្ងៃទី២៤-២៦ ខែកញ្ញា ឆ្នាំ២០២២ ក្នុងឱកាសថ្ងៃឈប់សម្រាក នៃពិធីបុណ្យភ្ជុំបិណ្ឌប្រពៃណីជាតិខ្មែរ មានភ្ញៀវទេសចរជាតិ និងអន្ដរជាតិចំនួន ១៤៣,៤៧០នាក់ បានមកដើរកំសាន្ដនៅតាមរមណីយដ្ឋាននានា ក្នុងខេត្តសៀមរាប។
របាយណ៍ការណ៍ដដែលបានបង្ហាញថា ក្នុងចំណោមអ្នកទេសចរ ១៤៣.៤៧០នាក់ ដែលបានមកកំសាន្ដនៅតាមរមណីយដ្ឋាននានាក្នុងខេត្តសៀមរាប ក្នុងភ្ញៀវទេសចរណ៍ជាតិ និងប្រជាពលរដ្ឋក្នុងខេត្តមានចំនួនប្រមាណ ១៤០,០០០នាក់ ដែលភ្ញៀវទេសចរមកពីតាមបណ្តាខេត្ត មានប្រមាណ ៥៥-៦០% ពោលចន្លោះពី ៧ម៉ឹន ទៅ ៨ម៉ឹននាក់ដែលធ្វើដំណើរកម្សាន្តជាលក្ខណៈគ្រួសារ។ ជាមួយគ្នានោះភ្ញៀវដែលចូលទស្សនារមណីយដ្ឋានអង្គរ មានចំនួនប្រមាណ ៨៥,០០០នាក់, រមណីយដ្ឋានឧទ្យានជាតិភ្នំគូលែន មានចំនួប្រមាណ ៤,៦០០នាក់, តំបន់ទន្លេសាបមានប្រមាណ ១,៥០០០នាក់ សហគមន៍ទេសចរណ៍-អេកូទេសចរណ៍ និងតំបន់ផ្សេងៗ មានចំនួនប្រមាណ ៣៥,៤០០នាក់ និងភ្ញៀវទេសចរបរទេសផ្ទៃក្នុងមានចំនួន ៣,៤៧០នាក់។
ជាមួយនឹងការដើរកំសាន្តនាឱកាសឈប់សម្រាកនៃពិធីបុណ្យភ្ជុំបិណ្ឌនេះដែរ អ្នកទេសចរបានសម្ដែងការសប្បាយរីករាយក្នុងការដើរកំសាន្ដនៅតាមរមណីយដ្ឋាន នានាក្នុងខេត្តសៀមរាប បន្ទាប់ពីខកខានរយៈពេល ២ឆ្នាំកន្លងមក ដោយសារការរីករាលដាល់នៃជំងឺកូវីដ-១៩។ ហើយដំណើរកំសាន្ដបានសប្បាយនាឆ្នាំនេះដែរ បានបង្ហាញថា រាជរដ្ឋាភិបាលបានយកចិត្ដទុកដាក់ខ្ពស់ ចំពោះផ្លូវថ្នល់ ព្រោះពីមួយឆ្នាំទៅមួយឆ្នាំពួកគេងាយស្រួលធ្វើដំណើរទេសចរណ៍។ ពួកគាត់ដើរកំសាន្ដជាច្រើនកន្លែង ជាពិសេសនៅប្រាសាទអង្គរវត្ត មានការជួយសម្រួលសណ្ដាប់ធ្នាប់ល្អ ពីមន្ដ្រីសន្ដាប់ធ្នាប់អាជ្ញាធរជាតិអប្សរា ខណៈដែលអ្នកដំណើរកំសាន្ដនៅប្រាសាទអង្គរវត្ដនាឆ្នាំនេះ កើនឡើងគួរឱ្យកត់សំគាល់។ ពួកគាត់រំពឹងថា ប្រជាពលរដ្ឋនៅមូលដ្ឋាន នឹងទទួលបានចំណូលច្រើនពីវិស័យទេសចរណ៍នេះ ដោយសារប្រទេសជាតិមានសន្ដិភាព និងមានការអភិវឌ្ឍទើបធ្វើឱ្យមានកំណើននូវវិស័យទេសចរណ៍។
អត្ថបទ និងរូបភាព៖ លោក បូ សាវី
