ថ្ងៃទី២៥ ខែកញ្ញាឆ្នាំ ២០២២ ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប អមដំណើរដោយរដ្ឋបាលស្រុក លោក លោកស្រី មកពីមន្ទីរ អង្គភាពពាក់ព័ន្ធជុំវិញខេត្ត ចុះពិនិត្យស្ថានភាពទឹកជំនន់ សួរសុខទុក្ខ នាំយកអំណោយមនុស្សធម៌ជូនដល់ប្រជាពលរដ្ឋ ដែលបានរងគ្រោះដោយទឹកជំនន់ និងមានការខ្វះខាតចំនួន ៤៨៥គ្រួសារ ក្នុងនោះនៅស្រុកអង្គរជុំ ចំនួន ១៣២គ្រួសារ និងស្រុកស្រីស្នំ ចំនួន ៣៥៣គ្រួសារ។
គួររំលឹកថា ទឹកជំនន់នៅក្នុងខេត្តសៀមរាបនេះ បង្កឡើងដោយជំនន់ទឹកភ្លៀងធ្លាក់មកពីស្រុកត្រពាំងប្រាសាទ ស្រុកអន្លង់វែង និង ស្រុកចុងកាល់ ខេត្តឧត្ដរមានជ័យ ពិសេសទំនប់អាតោ។ គិតត្រឹមថ្ងៃទី២២ ខែកញ្ញា ជំនន់ទឹកភ្លៀងនេះ បានប៉ះពាល់ដល់ប្រជាពលរដ្ឋចំនួន ៥,៨៧២គ្រួសារ ភូមិចំនួន ១៨៤ភូមិ ឃុំចំនួន៤១ នៃស្រុកចំនួន៨ ក្នុងចំណោម១២ក្រុង ស្រុក រួមមាន ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុក សូទ្រនិគម និងស្រុកប្រាសាទបាគង ក្នុងនោះស្រុកក្រឡាញ់ និង ស្រុកស្រីស្នំ មានសភាពធ្ងន់ធ្ងរជាងគេ។
ថ្លែងសំណេះសំណាលនាពេលនោះ ឯកឧត្តម ទៀ សីហា បាននាំយកនូវប្រសាសន៍ផ្ដាំផ្ញើសុខទុក្ខនិងការយកចិត្តទុកដាក់ពីសំណាក់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចទាំងពីរតែងតែបានគិតគូរខ្ពស់បំផុត និងមុនគេបង្អស់ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់ វណ្ណៈ ពូជសាសន៍ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ជាពិសេស នៅពេលបងប្អូនប្រជាពលរដ្ឋ ជួបទុក្ខលំបាក។
ព័ត៌មានជាតិ ថ្មីៗ
ឯកឧត្តមប្រធាន ក៏បានអំពាវនាវ និងផ្តាំផ្ញើ ដល់បងប្អូនប្រជាពលរដ្ឋ ត្រូវបន្តប្រុងប្រយ័ត្នចំពោះកម្រិតទឹកជំនន់ ទោះបីមានស្ថានភាពទឹកមានការស្រកចុះខ្លះ ជាពិសេសការឆ្លងចរន្តអគ្គិសនី សត្វអសិរពិស និងកុំមានការធ្វេប្រហែសចំពោះកូនចៅតូចៗ ព្រមទាំងយកចិត្តលើអនាម័យ ចៀសវាងជំងឺឆ្លងផ្សេងៗ។
គួរជម្រាបថា អំណោយមនុស្សធម៌ ដែលបានចែកជូនគ្រួសារក្នុងស្រុកទាំង២នោះ ក្នុង១គ្រួសារទទួលបាន អង្ករ ៣០គ.ក មុង១ ភួយ១ សារុង១ ក្រមា១ មី១កេស ត្រីខ១យួរ ទឹកត្រី១យួរ និងថវិកាចំនួន ៥ម៉ឺនរៀល។ ក្នុងនោះដែរ ឯកឧត្តម ទៀ សីហា ក៏បានចុះពិនិត្យ និងសិក្សាពីស្ថានភាពទឹកជំនន់ក្នុងស្រុកក្រឡាញ់ផងដែរ។
អត្ថបទ និង រូបភាព៖ លោក យូ វង្ស និងលោក ស៊ាន សុផាត
កែសម្រួល៖ លោក សេង ផល្លី
