ដំណាំស្រូវរបស់ប្រជាពលរដ្ឋក្នុងស្រុកចំនួន៤ ខេត្តសៀមរាប ប្រមាណជា ១ម៉ឺនហិកតា បានទទួលរងការខូចខាតទាំងស្រុងដោយសារជំនន់ទឹកភ្លៀង និងជំនន់នៃទឹកបឹងទន្លេសាប។
យោងតាមរបាយកាណ៍ របស់គណៈកម្មាធិការគ្រប់គ្រងគ្រោះមហន្តរាយ ខេត្តសៀមរាប នៅថ្ងៃទី១១ ខែតុលា ឆ្នាំ២០២២ បានឲ្យដឹងថា ចាប់តាំងពីថ្ងៃទី១៧ ខែកញ្ញា មកដល់ថ្ងៃទី១១ ខែតុលាឆ្នាំ២០២២នេះ ជំនន់ទឹកភ្លៀងបានធ្វើឲ្យប៉ះពាល់ដល់ស្រុកចំនួន៩ នៃខេត្តសៀមរាប និងធ្វើឲ្យប៉ះពាល់ដល់ដំណាំស្រូវ របស់ប្រជាពលរដ្ឋមកពីស្រុកចំនួន៦ ប្រមាណជាង ៣៥ពាន់ហិកតា ដែលក្នុងចំណោមនោះដំណាំស្រូវរបស់ប្រជាពលរដ្ឋ ក្នុងស្រុកចំនួន៤ មានស្រុកក្រឡាញ់ ស្រុកស្រីស្នំ ស្រុកពួក និងស្រុកអង្គរជុំ ជាង ៩ពាន់ហិកតា ត្រូវខូចខាតទាំងស្រុង។
ជាមួយនឹងជំនន់ទឹកភ្លៀងនេះ ជំនន់នៃបឹងទន្លេសាប ក៏បានបង្កផលប៉ះពាលដល់ដំណាំស្រូវរបស់ប្រជាពលរដ្ឋក្នុងស្រុកជីក្រែង និងស្រុកពួក ប្រមាណជា ២,២០០ហិកតាផងដែរ។ ជាមួយនឹងផលប៉ះពាល់នេះ មន្ទីរកសិកម្មខេត្តសៀមរាប ក៏បានត្រៀមស្តារឡើងវិញនូវដំណាំស្រូវដែលខូចខាតលើផ្ទៃដីប្រមាណជា ៤ពាន់ហិកតាផងដែរ៕
អត្ថបទ និងរូបភាព៖ លោក ជា ស្រស់
