យុវជនជាង៥០០នាក់ មកពីទូទាំង ២៥រាជធានី/ខេត្ដ បានទទួលបានការបណ្ដុះបណ្ដាល ស្ដីពីការស្ម័គ្រចិត្ដដើម្បីសហគមន៍ខ្ញុំ និងផ្សព្វផ្សាយសៀវភៅណែនាំ ដើម្បីអភិវឌ្ឍន៍សមត្ថភាពរបស់យុវជន សហគមន៍ និងស្ថាប័ន តាមរយៈយន្តការការងារស្ម័គ្រចិត្ត ដែលវគ្គបណ្ដុះបណ្ដាលនេះ ធ្វើឡើងនៅខេត្ដសៀមរាប មានរយៈពេល៣ថ្ងៃ ចាប់ពីថ្ងៃទី២២-២៤ ខែឧសភា ឆ្នាំ២០២៣នេះ។
ថ្លែងបិទវគ្គបណ្ដុះបណ្ដាល នៅល្ងាចថ្ងៃទី២៤ ខែឧសភា ឆ្នាំ២០២៣នេះ ឯកឧត្ដម សិរី ជំនៈ រដ្ឋលេខាធិការក្រសួងអប់រំ យុវជន និងកីឡា បានបញ្ជាក់ថា ក្រសួងអប់រំបានធ្វើកំណែទម្រង់សំដៅលើកកម្ពស់គុណភាពអប់រំ ដើម្បីអភិវឌ្ឍធនធានមនុស្សប្រកបដោយចំណេះដឹង ជំនាញ សមត្ថភាព និងសីលធម៌ មានគំនិតផ្តួចផ្តើម គំនិតបង្កើតថ្មី គំនិតច្នៃប្រឌិត មានភាពជាអ្នកដឹកនាំ មានជំនឿជាក់លើខ្លូនឯង តាមរយៈកំណែទម្រង់នានាក្នុងវិស័យអប់រំ ក្នុងនោះ អនុវិស័យការអភិវឌ្ឍយុវជន ក៏ត្រូវបានកំណត់អាទិភាពសម្រាប់កំណែទម្រង់ផងដែរ។ ជាមួយគ្នានោះ ក្រសួងក៍បានសហការជាមួយអង្គការមិនមែនរដ្ឋាភិបាល ដែលធ្វើការងារស្ម័គ្រចិត្ត រៀបចំវគ្គបណ្ដុះបណ្ដាលស្ដីពីកម្មវិធីការស្ម័គ្រចិត្តដើម្បីសហគមន៍ខ្ញុំ។
ឯកឧត្តមបន្ថែមថា លើសពីនេះទៅទៀត ក្រសួងអប់រំ យុវជន និងកីឡា បានផ្តល់គោលការណ៍ស្តីពីការបង្កើតក្របខណ្ឌស្តង់ដារការងារស្ម័គ្រចិត្តនៅកម្ពុជា និងសៀវភៅណែនាំស្តីពីការអនុវត្ត ការសម្របសម្រួល និងការគាំទ្រដល់កម្មវិធីការស្ម័គ្រចិត្ត ដើម្បីសហគមន៍ខ្ញុំ (ស.ស.ខ) ហើយឯកសារទាំងនេះ មានការចូលរួមពីសិក្ខាកាមដែលអញ្ជើញមកពីស្ថាប័នរបស់រាជរដ្ឋាភិបាល ដៃគូអភិវឌ្ឍន៍ អង្គការមិនមែនរដ្ឋាភិបាល ក្រុមបណ្តាញយុវជន និងតំណាងយុវជន ដើម្បីផ្តល់ធាតុចូលសំដៅសម្រេចឱ្យបាននូវសេចក្ដីព្រាងនៃក្របខណ្ឌការទទួលស្គាល់ការស្ម័គ្រចិត្ត ដែលជាឯកសារដ៏មានតម្លៃសម្រាប់ការអភិវឌ្ឍវិស័យយុវជនកម្ពុជា។ តាមរយៈការលើកកម្ពស់ និងការឱ្យតម្លៃទៅលើស្មារតីស្ម័គ្រចិត្ត ដែលជាយុទ្ធសាស្ត្រអាទិភាពរបស់ក្រសួងអប់រំ យុវជន និងកីឡា ដើម្បីឱ្យស្មារតីស្ម័គ្រចិត្តនេះ ត្រូវបានយល់ ដឹងទូលំទូលាយ និងទទួលស្គាល់ជាផ្លូវការពីគ្រប់ស្ថាប័នពាក់ព័ន្ធទាំងអស់។
ឯកឧត្ដមរដ្ឋលេខាធិការ បានបញ្ជាក់ទៀតថា ដើម្បីរួមចំណែកក្នុងការអភិវឌ្ឍក្របខណ្ឌការទទួលស្គាល់ការស្ម័គ្រចិត្ត និងការប្រើប្រាស់សៀវភៅណែនាំ ស្តីពីការអនុវត្ត ការសម្របសម្រួល និងការគាំទ្រដល់កម្មវិធីការស្ម័គ្រចិត្តដើម្បីសហគមន៍ខ្ញុំ (ស.ស.ខ) ឱ្យមានប្រសិទ្ធភាព នៅក្នុវគ្គបណ្តុះបណ្តាលនេះ ថ្នាក់ដឹកនាំគ្រប់លំដាប់ថ្នាក់នៃមន្ទីរអប់រំ យុវជន និងកីឡារាជធានី/ខេត្ត មេត្តាយកចិត្តទុកដាក់ អនុវត្តឱ្យសកម្មលើខ្លឹមសារ និងការប្រើប្រាស់សៀវភៅណែនាំនេះ ឱ្យមានលក្ខណៈគ្របដណ្ដប់គ្រប់ជ្រុងជ្រោយ ព្រោះថាសៀវភៅណែនាំនេះសាមញ្ញ ខ្លី ងាយយល់ អាចអនុវត្តបាន និងអាចទទួលយកបានពីគ្រប់អ្នកពាក់ព័ន្ធទាំងអស់ ក្នុងបរិបទកម្ពុជា។ ផ្តោតការយកចិត្តទុកដាក់ទៅលើការអភិវឌ្ឍជំនាញទន់ ដែលជាជំនាញសតវត្សទី២១ សម្រាប់យុវជនកម្ពុជា បន្ថែមលើជំនាញរឹងដែលស្ថាប័នពាក់ព័ន្ធជាច្រើនបាន និងកំពុងតែអនុវត្ត។
សូមជម្រាបថា កម្មវិធីការស្ម័គ្រចិត្តដើម្បីសហគមន៍ខ្ញុំ ត្រូវបានង្កើតឡើងនៅឆ្នាំ២០១៩ ដើម្បីផ្ដល់ឱកាសឱ្យយុវជនតាមមូលដ្ឋានស្វែងរក និងផ្តួចផ្តើមនូវគម្រោងថ្មីៗ ដើម្បីចូលរួមនៅក្នុងការកសាង និងអភិវឌ្ឍសហគមន៍ ដែលពួកគេកំពុងរស់នៅ ក៏ដូចជាកសាងសមត្ថភាពផ្ទាល់ខ្លួន សម្រាប់ការងារនាពេលអនាគត។ គម្រោងសហគមន៍របស់យុវជនស្ម័គ្រចិត្តរាជធានី/ខេត្ត ត្រូវផ្តោតលើវិស័យធំៗចំនួន ៨ រួមមាន៖ ការអប់រំ សុខាភិបាល សេវារដ្ឋបាល ទេសចរណ៍ កសិកម្ម បរិស្ថាន សហគ្រិនភាព និងឧស្សាហកម្ម៤.០។ យុវជនស្ម័គ្រចិត្តរាជធានី/ខេត្ត ដោយមានការសម្របសម្រួលពីមន្ត្រីទទួលបន្ទុក និងការប្រឹក្សាយោបល់ជាមួយអ្នកស្ម័គ្រចិត្តបង្គោលរាជធានី សហគមន៍ មន្ត្រីជំនាញ និងអាជ្ញាធរមូលដ្ឋាន ជ្រើសរើសវិស័យណាមួយដែលជាបញ្ហា ឬតម្រូវការអាទិភាព សម្រាប់រៀបចំសំណើឯកសារគម្រោង៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
