បើយោងតាមសេចក្ដីប្រកាសរបស់គ្រឹះស្ថានអង្គរ ដែឡចេញផ្សាយកាលពីថ្ងៃទី១ ខែកក្កដា ឆ្នាំ២០២៣នេះ បានឲ្យដឹងថា គិតត្រឹមរយៈពេល ៦ខែ ដើមឆ្នាំ២០២៣នេះ កម្ពុជាទទួលបានចំណូលប្រមាណជាង ១៧លានដុល្លាអាម៉េរិក ពីការលក់សំបុទ្រចូលទស្សនារមណីយដ្ឋានអង្គរ។
សេចក្តីប្រកាសដដែលបានឲ្យដឹងថា ក្នុងរយៈពេល ៦ខែ ឆ្នាំ២០២៣នេះ មានភ្ញៀវទេសចរសរុប ៣៨៥.៧៦៩នាក់ បានទិញសំបុត្រចូលរមណីយដ្ឋានអង្គរ ដែលចំណូលបានពីការលក់សំបុត្រនេះ មានចំនួន ១៧.៨៧៧.៤១៨ដុល្លាអាម៉េរិក ដែលកើនជាង ៦ពាន់ភាគរយ ធៀបនឹងរយៈពេលដូចគ្នាក្នុងឆ្នាំ២០២២។ ដោយឡែកក្នុងខែមិថុនា កន្លងទៅនេះ មានភ្ញៀវទេសចរចំនួន ៤១.០១២នាក់ បានទិញបណ្ណចូលទស្សនារមណីយដ្ឋានអង្គរ និងចំណូលលក់សំបុត្រនោះមានចំនួន ១.៨១១.៥៨៩ដុល្លារអាម៉េរិក។
សេចក្តីប្រកាសដដែលបានឲ្យដឹងទៀតថា ក្រៅពីនេះគ្រឹះស្ថានអង្គរ ក៏បានលក់សំបុត្រចូលទស្សនាតំបន់កោះកែរ បានចំនួន ៩៥.៥៣៥ដុល្លារ ដល់ទេសចរអន្តរជាតិចំនួន ៦.៣៦៩នាក់ និងរកចំណូលពីការលក់សំបុត្រទូក នៅកំពង់ផែចុងឃ្នៀស បានចំនួន ២៩២.៩៤០ដុល្លារ ក្នុងរយៈពេល៦ខែនេះ។ ជាមួយគ្នានោះចំណូលពីការលក់សំបុត្រនេះ គ្រឹះស្ថានអង្គរក៏បានឧបត្ថម្ភទៅមូលនិធិគន្ធបុប្ផា បានចំនួន ៧៧១.៥៣៨ដុល្លារអាម៉េរិកផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ អ៊ុន ណារាជ្យ
