នៅរសៀលថ្ងៃទី០៩ ខែកក្កដា ឆ្នាំ២០២៣ ព្រះចៅអធិការ គណៈកម្មការ អាចារ្យវត្តនិងប្រជាពុទ្ឋបរិស័ទចំណុះជើងវត្តអារញ្ញសាគរ ស្ថិតក្នុងភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាប បានមូលមតិគ្នាជាឯកច្ឆ័ន្ទផ្តើម រៀបចំបុណ្យផ្កាសាមគ្គីប្រមូលបច្ច័យបានចំនួន ៤០លាននិង ៦០ម៉ឺនរៀល សម្រាប់បន្តការសាងសង់ដំបូលនៃកុដិថែវ ស្ថិតនៅក្នុងទីតាំងវត្ត។
បើតាម ព្រះវិសារទោ ហ៊ាក់ គឹមហ៊ត់ ចៅអធិការវត្តអារញ្ញសាគរ មនសង្ឃដីកាថា មានបណ្តោយ៣៦ម និងទទឹង២១ម កំពស់មួយជាន់ ដោយបានបុកគ្រឺះ បណ្តុះជើងសសរ និងរៀបជញ្ជាំងរួចរាល់ ជារួមគឺសាងសង់បានប្រមាណប្រហែលជា ៤៥%ហើយ តែនៅមិនទាន់ប្រក់ដំបូល មិនទាន់ចាប់ក្បាច់ មិនទាន់ក្រាលការ៉ូនិងបំពាក់គ្រឿងសង្ហារឹមផ្សេងៗនៅឡើយ។ កុដិនេះចាប់ដំណើរការសាងសង់ក្នុងឆ្នាំ២០២១ គ្រោងចំណាយថវិកាប្រមាណជា ៣០ម៉ឺនដុល្លារ នៅពេលសាងសង់រួចរាល់សមិទ្ឋផលមួយនេះនឹងក្លាយជាទីសេនាសនៈគរុភណ្ឌរបស់វត្ត សម្រាប់ជាទីស្នាក់អាស្រ័យរបស់ភិក្ខុសាមណេរ និងជាទីកន្លែងបដិសណ្ឋារកិច្ច ដល់ញាតិញោមជិតឆ្ងាយដែលមកបំពេញបុណ្យនៅទីអារាមនេះ។
ព្រះអង្គបន្តថា បច្ច័យដែលទទួលបានពីបុណ្យផ្កាប្រាក់នេះ នឹងយកទៅបន្តការសាងសង់នៃកុដិថែវនេះជាជំហ៊ានៗទៅតាមលទ្ឋភាពដែលអាចធ្វើបាន ដើម្បីឱ្យសមិទ្ឋផលនេះឆាប់បានរួចរាល់ជាស្ថាពរ។ ព្រះអង្គ ក៏សង្ឃឹមថាកុដិនេះនឹងបានរួចរាល់ក្នុងពេលខាងមុខឆាប់ៗ តាមរយៈការចូលរួមបរិច្ចាគពីញាតិញោមពុទ្ឋបរិស័ទជិតឆ្ងាយ ព្រោះថាព្រះសង្ឃពុំមានជំនួញឬអាជីវកម្មអ្វីទេ មានតែពឹងអាស្រ័យលើទាននិងបច្ច័យពីញាតិញោម ជាមួយគ្នានោះទីវត្តអារាមដែលមានការរីកចំរើនទៅបានគឺមិនអាចខ្វះបានពីការចូលរួមរបស់ប្រជាពុទ្ឋបរិស័ទដែលមានសទ្ឋាជឿជាក់លើព្រះពុទ្ឋសាសនា ក្រោមគោលការណ៍ជាមូលដ្ឋាន ព្រះពុទ្ធសាសនា ផ្សារភ្ជាប់នឹង សង្គម ទើបអាចអភិវឌ្ឍន៍និងកសាងសមិទ្ឋផលបានសមរម្យ។
ព័ត៌មានជាតិ ថ្មីៗ
សូមជំរាបថា៖ក្នុងសម័យបុរាណកាលបុណ្យផ្កាបុណ្យនេះមាន ពីរបែបគឺ បុណ្យផ្ការុក្ខជាតិ និងផ្កាវារីជាតិ គឺគេបេះតែផ្កាឈើ និងផ្កាឈូកថ្វាយព្រះពុទ្ធរូប និងមួយទៀតជាបុណ្យផ្កាប្រាក់ គឺគេសន្មតប្រាក់ថាជាផ្កាសម្រាប់វេរចំពោះព្រះសង្ឃដើម្បីសាងទីសេនាសេនៈឬវត្ថុអ្វីមួយ។ សព្វថ្ងៃដោយគេយល់ថា វត្តអារាមនីមួយៗតែងកសាងទីសេនាសនៈ ដូច្នេះទើបនិយមយកក្រដាសប្រាក់មកចងក្រងជាផ្កា រួចបានវេរប្រគេនដល់ព្រះសង្ឃ ហើយបុណ្យផ្កាប្រាក់នេះគេទុកថា ជាបុណ្យធំមួយរបស់ព្រះពុទ្ឋសាសនា និងអាចយកទៅ កសាងហេដ្ឋារចនាសម្ព័ន្ឋផ្សេងៗ បានទាំងខាងពុទ្ធចក្រ និងអាណាចក្រ មានកុដិ ព្រះវិហារ សាលាបុណ្យ សាលារៀន ស្ពាន ស្រះជាដើមផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
