នៅវត្តចន្លោង ព្រឹកថ្ងៃទី១២ ខែកក្កដា ឆ្នាំ២០២៣នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលក្រុងសៀមរាប បានធ្វើការចែកជូននូវវិញ្ញាបនបត្រ សម្គាល់ម្ចាស់អចលនវត្ថុ ឬហៅថាប្លង់រឹង សរុបចំនួន ២៥១៨បណ្ណ នៃក្បាលដីសរុប ២៩០១ក្បាលដី ស្ថិតក្នុងភូមិចំនួន ៣នៃសង្កាត់ស្រង៉ែ រួមមាន ភូមិស្រង៉ែ ភូមិថ្នល់ និងភូមិតាចេក។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប លើកឡើងថា ចំពោះក្បាលដីដែលសម្រេចចេញប័ណ្ណបាននាពេលនេះ គឺសុទ្ធតែជាក្បាលដី ដែលមិនមានទំនាស់តវ៉ា ឬជាប់ពាក់ព័ន្ធនឹងដីបុរាណដ្ឋាន និងគោរពតាមលក្ខខណ្ឌបានត្រឹមត្រូវទៅតាមផ្លូវច្បាប់។ ដោយឡែកក្បាលដី ដែលមិនទាន់អាចចេញបណ្ណជូនបងប្អូនប្រជាពលរដ្ឋ គណៈកម្មការរដ្ឋបាល នឹងបន្តពិនិត្យ និងដោះស្រាយតាមនីតិវិធី ជាបន្តបន្ទាប់ ដើម្បីឈានទៅដល់ការចេញបណ្ណជូនម្ចាស់ដីជាបន្តទៀត។ ជាមួយនោះ ក្បាលដី ដែលមានជាប់ពាក់ព័ន្ធនឹងតំបន់បុរាណដ្ឋាន ដែលបានការពារដោយអាជ្ញាធរជាតិអប្សរា និង មន្ទីរវប្បធម៌ និងវិចិត្រសិល្បៈ រដ្ឋបាលខេត្តបាននិងកំពុងបន្តសហការណ៍ ដោះស្រាយតាមនីតិវិធីបន្ថែមទៀតជូនប្រជាពលរដ្ឋផងដែរ។
អញ្ជើញជាអធិបតីក្នុងឱកាសនោះ លោក ពិន ប្រាកដ អភិបាលរងខេត្តសៀមរាប លើកឡើងថា យោងតាមលទ្ធផលនៃដំណើរការសម្រេចចេញបណ្ណសម្គាល់ម្ចាស់អចលនវត្ថុនាពេលនេះ បានបង្ហាញឱ្យឃើញថា បច្ចុប្បន្នរដ្ឋបាលខេត្ត បានបន្តខិតខំបំពេញការងាររបស់ខ្លួនលើការងារចុះបញ្ជីដីធ្លីនេះ ឱ្យទទួលបានលទ្ធផលជាអតិបរមា។ ដូចនេះ ដើម្បីជំរុញឱ្យកិច្ចការនេះដំណើរការបានកាន់តែល្អប្រសើរ សូមបងប្អូនប្រជាពលរដ្ឋចូលរួមសហការជាមួយអាជ្ញាធរមាន សមត្ថកិច្ច និងក្រុមការងាររបស់មន្ទីរជំនាញក្នុងការងារចុះបញ្ជីដីធ្លីនេះ និងមានយោគយល់ខ្ពស់ ចំពោះការដោះស្រាយតាមនីតិវិធីពីមួយជំហាន ទៅមួយជំហាន។
ទន្ទឹមនោះ លោកអភិបាលរងខេត្ត ក៏បានអំពាវនាវដល់ប្រជាពលរដ្ឋនៅទូទាំងខេត្តសៀមរាប សូមអញ្ជើញទៅបោះឆ្នោតនៅថ្ងៃទី២៣ ខែកក្កដាខាងមុខនេះឲ្យបានគ្រប់ៗគ្នា ដើម្បីបំពេញតួនាទីជាពលរដ្ឋល្អ និងបញ្ចេញសិទ្ធក្នុងការជ្រើសរើសតំណាងប្រជាពលរដ្ឋ ដែលខ្លួនពេញចិត្ត និងអភិវឌ្ឍប្រទេសជាតិឱ្យកាន់តែរីកចម្រើន និងលើកកម្ពស់ជីវភាពឱ្យកាន់តែល្អប្រសើរបន្ថែមទៀត។
គួរជម្រាបថា ចំពោះក្បាលដីដែលទទួលបណ្ណសម្គាល់ម្ចាស់អចលនវត្ថុ ក្នុងភូមិចំនួន ៣នោះរួមមាន ភូមិថ្នល់ក្រុមការងារចុះបញ្ជីដីធ្លី ចុះប្រមូលទិន្នន័យបានសរុបចំនួន ៩២០ ក្បាលដី សម្រេចចេញបណ្ណបាន ចំនួន ៧៤៦ ក្បាលដី មិនទាន់ចេញប័ណ្ណបានចំនួន ១៧៤ក្បាលដី។ ភូមិស្រង៉ែ ចុះប្រមូលទិន្នន័យបានសរុបចំនួន ៧០៤ ក្បាលដី សម្រេចចេញប័ណ្ណបានចំនួន៥៨០ក្បាលដី មិនទាន់ចេញប័ណ្ណបានចំនួន១២៣ក្បាលដី ។ ភូមិតាចេក ចុះប្រមូលទិន្នន័យបានសរុប ចំនួន ១២៧៧ ក្បាលដី សម្រេចចេញប័ណ្ណបានចំនួន ១១៩២ក្បាលដី មិនទាន់ចេញប័ ណ្ណបានចំនួន ៨៥ក្បាលដី ។
អត្ថបទ និងរូបភាព៖ លោក ស៊ាន សុផាត
កែសម្រួល៖ សេង ផល្លី
