នៅព្រឹកថ្ងៃទី៣១ ខែកក្កដា ឆ្នាំ២០២៣នេះ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានដឹកនាំក្រុមការងារចុះពិនិត្យស្ថានភាពជំនន់ទឹកភ្លៀងស្ថិតក្នុងឃុំតាសោម និងឃុំចារឈូក នៃស្រុកអង្គរជុំ ដើម្បីត្រៀមបង្ការ ជួយដល់បងប្អូនប្រជាកសិករ អំឡុងពេលដំណាំស្រូវកំពុងមានការលូតលាស់។
តាមការបញ្ជាក់របស់ លោក ទា គឹមសុទ្ធ បង្ហាញថា ស្រុកអង្គរជុំជារៀងរាល់ឆ្នាំ តែងទទួលជំនន់ទឹកភ្លៀងពីខាងសណ្ឋានដីខាងលើ គឺស្រុកវ៉ារិន និងអាចមកពីខេត្តឧត្តរមានជ័យ ប្រសិនបើមានភ្លៀងធ្លាក់ខ្លាំង។ តាមរបាយការណ៍នៅទូទាំងខេត្ត ផលប៉ះពាល់ដោយសារជំនន់ទឹកភ្លៀងគិតត្រឹមថ្ងៃម្សិលមិញនេះ បានបណ្ដាលឱ្យផ្ទៃដីដាំដុះដំណាំស្រូវ ប្រមាណជិត១០០០ហិកតា ក្នុងឃុំចំនួន៤ នៃស្រុកវ៉ារិន និងស្រុកអង្គរជុំ រងការខូចខាត ប៉ុន្តែមិនទាំងស្រុងនោះទេ។
លោកប្រធានមន្ទីរ ក៏បានបង្ហាញដែរថា ការលិចដោយជំនន់ទឹកភ្លៀងជារឿយៗកន្លងមកនេះ គឺបណ្ដាលមកពីការរៀបចំហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងនៅក្នុងស្រុក មិនទាន់សមស្របទៅនឹងប្រព័ន្ធទឹក។ លោកបន្ថែមថា នៅខែសីហានេះ ប្រទេសកម្ពុជា កំពុងស្ថិតនៅក្នុងកូនរដូវប្រាំងនៅឡើយ ប៉ុន្តែដោយសារឥទ្ធិពលខ្សល់ព្យុះមកពីប្រទេសចិន និងវៀតណាម បានបង្កឱ្យមានភ្លៀងធ្លាក់ពីមធ្យមទៅបង្គួរ ដែលទាមទារអាជ្ញាធរស្រុកធ្វើការបើកមុខទឹកឱ្យបានធំ ដើម្បីត្រៀមរំដោះទឹក។
តាមការប៉ាន់ស្មានរបស់លោកប្រធានមន្ទីរ ប្រសិនបើមានភ្លៀងធ្លាក់ក្នុងខេត្តសៀមរាប ក្នុងកម្រិតចន្លោះពី១០០មម ទៅ ១៥០មម បណ្ដារាជធានីភ្នំពេញ ខេត្តកំពង់ស្ពឺ និងកែបនោះ វានឹងបង្កឱ្យមានជំនន់ទឹកភ្លៀងលិចនៅតាមបណ្ដាស្រុកក្នុងខេត្ត ប៉ុន្តែប៉ុន្មានថ្ងៃកន្លងមកនេះ ខេត្តសៀមរាបទទួលទឹកភ្លៀងត្រឹមកម្រិតពី៣០មម ទៅ ៥០មមប៉ុណ្ណោះ ដែលកម្រិតនេះពុំបង្កឱ្យមានការលិចលង់ធ្ងន់ធ្ងរឡើយ។
អត្ថបទ និងរូបភាព៖ លោក សេង ផល្លី និងលោក ហ៊ុន ឆៃលាង
