អគ្គនាយកដ្ឋានអប់រំ បណ្តុះបណ្ដាលបច្ចេកទេស និងវិជ្ជាជីវៈ (អ.ប.វ) នៃក្រសួងការងារ និងបណ្តុះបណ្ដាលវិជ្ជាជីវៈ នៅព្រឹកថ្ងៃទី២៥ ខែធ្នូ ឆ្នាំ២០២៣នេះ បានរៀបចំសិក្ខាសាលាស្ដីពីការចែករំលែកសមិទ្ធផល និងលទ្ធផលនៃការវាយតម្លៃគម្រោង “ជំនាញដើម្បីភាពជោគជ័យ” នៅខេត្តសៀមរាប ជូនដល់អ្នកពាក់ព័ន្ធទាំងអស់នៃគម្រោងបានដឹងពីការងារអនុវត្តកន្លងមក ជាមួយនឹងបញ្ហាមួយចំនួនដែលបានជួបប្រទះ ដែលអនុវត្តដោយសមាគមបណ្តុះកុមារ។
លោក សុក សុទ្ធីរក្ស នាយកប្រតិបត្តិសមាគមបណ្តុះកុមារ បានបញ្ជាក់ថា គម្រោង “ជំនាញដើម្បីភាពជោគជ័យ” បានអនុវត្តរយៈពេលជាង ៣ឆ្នាំមកហើយ ដើម្បីរួមចំណែកលើកម្ពស់សេដ្ឋកិច្ចយុវជនងាយរងគ្រោះ តាមរយៈការផ្ដល់ជំនាញឆ្លើយតបទៅនឹងតម្រូវការទីផ្សារការងារ និងសមភាពយេនឌ័រ សម្រាប់ខេត្តគោលដៅចំនួន២ គឺខេត្តសៀមរាប និងខេត្តរតនគីរី ដោយមានអ្នកទទួលផលចំនួន ៦.៤៧៥នាក់ និងអ្នកទទួលផលប្រយោលជាង ១ម៉ឹននាក់។ គម្រោងនេះដែរ សមគមបណ្តុះកុមារ បានសហការគ្នាជាមួយអគ្គនាយកដ្ឋានអប់រំ បណ្តុះបណ្ដាលបច្ចេកទេស និងវិជ្ជាជីវៈ និងបានដាក់ឱ្យអនុវត្តក្នុងភាពជាដៃគូជាមួយ វិទ្យាស្ថានពហុបច្ចេកទេសភូមិភាគតេជោសែនសៀមរាប (RTC) និង មជ្ឈមណ្ឌលបណ្តុះបណ្តាលបបច្ចេកទេសវិជ្ជាជីវៈខេត្តរតនគិរី (PTC) ក្រោមការផ្ដល់ជំនួយពីអង្គការភ្លែនអន្តរជាតិ ដែលមានយុវជនមកពី ១៥ស្រុក ៨៧ឃុំ និងក្រុមគោលដៅ ហើយជាយុវជនងាយរងគ្រោះ វ័យក្មេង ជាពិសេសយុវជនបោះបង់ការសិក្សា យុវជនមកពីគ្រួសារក្រីក្រ និងគ្រួសារងាយរងហានិភ័យ។
លោក សុក សុទ្ធីរក្ស បញ្ជាក់ទៀតថា គិតត្រឹមខែវិច្ឆិកា ឆ្នាំ២០២៣នេះ វិទ្យាស្ថាន និងមជ្ឈមណ្ឌល មានសមត្ថភាពក្នុងការផ្តល់ជំនាញវិជ្ជាជីវៈដល់យុវជនងាយរងគ្រោះប្រកបដោយគុណភាព ឆ្លើយតបទៅនឹងតម្រូវការទីផ្សារការងារ និងសមភាពយេនឌ័រ ទាំងមុនពេល អំឡុងពេល និងក្រោយពេលបណ្តុះបណ្តាលសម្រាប់មុខរបរចំនួន៥ ក្នុងចំណោមមុខរបរអាទិភាពទាំង១២ ដែលបានកំណត់ក្រោយការសិក្សាទីផ្សារការងារក្នុងនោះរួមមាន៖ ១.ជួសជុលម៉ូតូ ២.ការផលិតនំខ្មែរ ៣.សំអាងកាយ (សាឡន) ៤.កាត់សក់បុរស និង៥.កាត់ដេរសម្លៀកបំពាក់ ដែលការអភិវឌ្ឍកញ្ចប់ស្តង់ដារសម្រាប់មុខរបរទាំង៥ បានបញ្ចប់នៅខែមិថុនា ឆ្នាំ២០២២។ ជាមួយគ្នានោះគម្រោងក៏បានបន្តការផ្សព្វផ្សាយ ជ្រើសរើស និងចុះឈ្មោះយុវជនចូលរៀនជំនាញវិជ្ជាជីវៈបន្ថែមចំនួន ៤២៦នាក់ ស្ត្រី២២៥នាក់ លើជំនាញសម្អាងកាយ កាត់ដេរ កាត់សក់ ជួសជុលម៉ូតូ ជួសជុលម៉ាស៊ីធុនតូច អគ្គិសនី បរិក្ខាត្រជាក់ ផ្សាដែក និងជួសជុលរថយន្តដោយក្នុងនោះមានយុវជនបញ្ចប់វគ្គចំនួន ៣៧៩នាក់ ស្ត្រី២០០នាក់ ហើយយុវជនមានការងារធ្វើចំនួន ៣៣៥នាក់ ស្ត្រី ១៧៧នាក់ រួមមានបើកមុខរបរដោយខ្លួនឯង ធ្វើការនៅតាមសហគ្រាស/ក្រុមហ៊ុន ធ្វើការងារមិនត្រូវជំនាញ និងមិនទាន់មានការងារធ្វើចំនួន ៤៤នាក់។
ក្នុងនាមអាជ្ញាធរខេត្ត លោក ចឹក គឹមជុន នាយករងរដ្ឋបាលសាលាខេត្តសៀមរាប បានមានប្រសាសន៍ថា យោងតាមលទ្ធផលខាងលើបានបង្ហាញពីភាពជោគជ័យរបស់អ្នកពាក់ព័ន្ធក្នុងការជួយជម្រុញដល់យុវជនមានជីវភាពក្រីក្រ បោះបង់ការសិក្សា ងាកមកចាប់យកនូវជំនាញ និងវិជ្ជាជីវៈ ដើម្បីជួយដល់សេដ្ឋកិច្ចខ្លួនឯង និងគ្រួសារ តាមរយៈការជ្រើសរើសយកជំនាញមួយមកសិក្សាបង្កើនសមត្ថភាពក្នុងការរកការងារធ្វើ និងប្រកបរបរដោយខ្លួនឯងប្រកបដោយភាពជោគជ័យ។ ក្នុងនោះដែរខេត្តសៀមរាប នៅតាមបណ្តាស្រុកជនបទក៏នៅមានយុវជនជាច្រើនបានបោះបង់ការសិក្សា និងគ្មានការងារធ្វើ ហើយកត្តានេះវាមានសារៈសំខាន់ណាស់សម្រាប់ពួកគាត់ក្នុងការស្វែងរកឱកាសចាប់យកជំនាញណាមួយដែលត្រូវទីផ្សារបច្ចុប្បន្ន។ តាមរយៈនេះសូមជំរុញដល់អ្នកពាក់ព័ន្ធបន្តជម្រុញការអភិវឌ្ឍជំនាញតាមរយៈការបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។ ស្នើអង្គការអន្តរជាតិភ្លែនកម្ពុជា និងសមាគមបណ្តុះកុមារ បន្តកិច្ចសហការជាមួយអគ្គនាយកដ្ឋាន អ.ប.វ. ដើម្បីពង្រីកវិសាលភាពគម្រោងនេះបន្ថែមទៀតដើម្បីជួយដល់ក្រុមគោលដៅ និងសូមសំណូមពរក្រសួងការងារ បើកយុទ្ធនាការផ្សព្វផ្សាយអំពីការរៀន ជាពិសេសយុវជនបោះបង់ការសិក្សា យុវជនងាយរងគ្រោះ និងស្វែងរកការងារជូនយុវជន។
លោកស្រី ឡាយ ផល្លីន អគ្គនាយិការងអគ្គនាយកដ្ឋានអប់រំ បណ្តុះបណ្ដាលបច្ចេកទេស និងវិជ្ជាជីវៈ (អ.ប.វ) នៃក្រសួងការងារ និងបណ្តុះបណ្ដាលវិជ្ជាជីវៈ បានឲ្យដឹងថា TVET (អ.ប.វ) សម្រាប់ការសិក្សាជំនាញនេះ យុវជនមិនត្រឹមតែទទួលបានការបណ្តុះបណ្ដាលប៉ុណ្ណោះទេ តែយុវជនដែលមានជីវភាពខ្វះខាត់ទទួលបាននូវប្រាប់ឧបត្ថម្ភថែមពីរាជរដ្ឋាភិបាល។ ក្រៅពីនេះលោកស្រី ក៏បានអំពាវនាវដល់គ្រប់អ្នកពាក់ព័ន្ធរួមគ្នាបន្តផ្សព្វផ្សាយទៅលើការងារនេះឲ្យជ្រួលជ្រាបទៅដល់មហាជនទូទៅផ្ដោតទៅតាមគោលការណ៍របស់រាជរដ្ឋាភិបាល “មនុស្សម្នាក់ជំនាញមួយមុខ” ជាពិសេសលើកទឹកចិត្តដល់ស្ត្រីក្នុងការចាប់យកជំនាញនេះឲ្យបានច្រើន ព្រោះស្ត្រីក៏អាចមានសមត្ថភាពខ្ពស់ជាបុរសក្នុងការងារនេះផងដែរ។ ជាមួយគ្នានោះលោកស្រី ក៏សូមស្នើរដល់អង្គការភ្លែន សូមបន្តចូលរួមក្នុងការនេះបន្តទៀត ទាំងការផ្ដល់ថវិការ ក៏ដូចជាបច្ចេកទេស ជាពិសេសការផ្ដល់ជំនាញច្បាស់លាស់បន្ថែមទៀត ដែលជួយជម្រុញដល់សេដ្ឋកិច្ចរបស់យើងស្របតាមចក្ខុវិស័យរបស់រាជរដ្ឋាភិបាលនៅឆ្នាំ២០៥០។
ឯកឧត្តម កុយ សង សមាជិកក្រុមប្រឹក្សាខេត្ត មានប្រសាសន៍ថា ការងារទាំងអស់អាចសម្រេចទៅបានមកដល់ពេលនេះ គឺដោយសារប្រទេសជាតិយើងទាំងមូលមានសុខសន្តិភាពពេញពេញ។ សុខសន្តិភាពនេះហើយ បានធ្វើឲ្យប្រទេសជាតិយើងមានការរីកចម្រើនលើគ្រប់វិស័យឆ្ពោះទៅមុខឥតឈប់ឈរ កត្តានេះដែរក៏ទាមទារដល់ប្រជាពលរដ្ឋយើងចូលរួមទាំងអស់គ្នាក្នុងការចូលរួមថែរក្សាសន្តិភាពឲ្យបានគង់វង្ស ព្រោះបើយើងមានសន្តិភាព នោះយើងនឹងមានការរីកចម្រើនទោមុខទៀតផងដែរ៕
អត្ថបទ និងរូបភាព៖ លោក អ៊ុន ណារាជ្យ
