នាព្រឹកថ្ងៃទី២៦ ខែធ្នូ ឆ្នាំ២០២៣នេះ ប្អូនៗសិស្សានុសិស្សដែលមានជីវភាពក្រីក្រចំនួន ៧០នាក់ នៅក្នុងសាលាបឋមសិក្សា និងអនុវិទ្យាល័យនានា ក្នុងស្រុកអង្គរធំ បានទទួលអំណោយជាកង់ និងសម្ភារៈសិក្សា ពីព្រះសង្ឃក្នុងក្រុងសៀមរាប និងសប្បុរសជនសមាគមសង្រ្កោះជីវិតប្រទេសសឹង្ហបុរី ដោយក្នុងម្នាក់ទទួលបាន៖ កង់ចំនួន១ សៀវភៅ២ក្បាល ប៊ិច២ដើម និងថវិកាមួយចំនួន។
លោក ហ្កូ តុងហុង (Goh Tung Hong) ប្រធានសមាគមសង្រ្គោះជីវិត នៃប្រទេសសឹង្ហបុរី បានឲ្យដឹងថា សមាគមសង្រ្គោះជីវិត គឺជាសមាគមដែលមានសកម្មភាពជួយសង្រ្គោះអ្នកដែលមានជីវភាពខ្វះខាត ទីទ័លក្រ ដែលកំពុងជួបបញ្ហាប្រឈមនានា ដោយមិនប្រកាន់ពូជសាសន៍ និន្នាការ ឬបក្សនយោបាយណាមួយឡើយ គឺបម្រើតែចលនាមនុស្សធម៌នៅលើពិភពលោកតែប៉ុណ្ណោះ។ ក្នុងនាមលោកជាប្រធានសមាគម លោកនឹងបន្តកៀគរសប្បុរសជនជាបន្តទៀត ដើម្បីបន្តជួយដល់ប្រជាពលរដ្ឋ និងសិស្សានុសិស្សកម្ពុជា ដែលមានជីវភាពខ្វះខាតនៅតាមមូលដ្ឋានផ្សេងៗទៀត។
លោកស្រី ឈន សុគន្ធា អភិបាលរងស្រុកអង្គរធំ បានថ្លែងអំណរគុណចំពោះព្រះមន្ត្រីសង្ឃ រួមនឹងសប្បុរសជននៃសមាគមសង្រ្គោះជីវិត ដែលបានផ្តល់អំណោយយកមកចែកជូនដល់ប្អូនៗសិស្សានុសិស្សដែលមានជីវភាពក្រីក្រដែលកំពុងសិក្សានៅតាមសាលាបឋមសិក្សា និងអនុវិទ្យាល័យនានា ក្នុងស្រុកអង្គរធំនាពេលនេះ។ ការផ្ដល់នេះដែរ គឺដើម្បីឱ្យប្អូនៗដែលមានផ្ទះនៅឆ្ងាយពីសាលារៀនហើយអាចជិះធ្វើដំណើរមកសាលារៀនបានទាន់ពេលវេលា។ ដូចនេះលោកស្រី ក៏បានផ្តាំផ្ញើ ណែនាំ និងជំរុញដល់ប្អូនៗសិស្សានុសិស្សទាំងអស់ ត្រូវខិតខំប្រឹងប្រែងរៀនសូត្រ និងជៀសឲ្យផុតពីអំពើអបាយមុខផ្សេងៗ ខំកសាងខ្លួនជាកូនល្អ សិស្សល្អ មិត្តល្អ និងពលរដ្ឋល្អ និងសូមឲ្យជៀសចេញឲ្យឆ្ងាយពីគ្រឿងញៀន ល្បែងពាលា ត្រូវសិក្សាស្វែងយល់ និងគោរពច្បាប់ចរាចរណ៍ ពីព្រោះក្មួយៗទាំអអស់ គឺជាសរសរស្តម្ភដ៏រឹងមាំក្នុងការអភិវឌ្ឍសង្គមជាតិ ដែលជាអ្នកកសាង និងអភិវឌ្ឍប្រទេសជាតិបន្តវេន។
ក្នុងឱកាសនោះដែរ ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក មានសង្ឃដីកាថា កិច្ចការសាសនាមានការរីកចម្រើនទៅបាន គឺត្រូវបានពឹងផ្អែកលើសុខសន្តិភាពហើយការលើកកម្ពស់ដល់វិស័យព្រះពុទ្ធសាសនា គឺត្រូវតែមានការចូលរួមពីសំណាក់ប្រជាពុទ្ធបរិស័ទ្ធ ដែលជាពុទ្ធសាសនិកជន ប្រកបដោយការអប់រំផ្លូវកាយ ផ្លូវចិត្ត ឲ្យឆ្ពោះទៅភាពស្ងប់ស្ងាត់ និងអាធ្យាស្រ័យដល់អ្នកដ៍ទៃ។ ដោយកត្តាសន្តិភាពនេះហើយ ដែលធ្វើឱ្យជីវភាពរស់នៅរបស់ប្រជាពុទ្ធបរិស័ទមានការរីកចម្រើន ព្រមទាំងបានបរិច្ចាគនូវទ្រព្យធនផ្ទាល់ខ្លួនក្នុងការចូលរួមកសាងទីវត្តអារាម មន្ទីរពេទ្យ សាលារៀន ផ្លូវថ្នល់ ស្រះទឹក អណ្តូងទឹកនានាផងដែរ។
ព្រះគ្រូបន្តថា ព្រះពុទ្ធសាសនា ពិតជាដើរតួនាទីយ៉ាងសំខាន់ក្នុងការអប់រំទាំងផ្លូវកាយនិងផ្លូវចិត្ត និងការអប់រំចិត្តឲ្យចេះស្រឡាញ់ សាមគ្គីគ្នា និងជួយគ្នាទៅវិញមក ហើយចំពោះសម្ភារៈសិក្សា និងថវិកាដែលព្រះអង្គរបានចូលរួមជាមួយសមាគមសង្រ្គោះជីវិតនៃប្រទេសសឹង្ហបូរី ដើម្បីចែកជូនដល់សិស្សានុសិស្សនាពេលនេះ គឺបានមកពីសទ្ធាជ្រះថ្លា របស់ប្រជាពុទ្ធបរិស័ទទីជិតឆ្ងាយ និងសប្បុរសជនក្នុងនិងក្រៅប្រទេស។ ហើយចំពោះការផ្តល់កង់ និងសំភារៈសិក្សាដល់សិស្សានុសិស្សនាពេលនេះ គឺជាការបង្ហាញពីការចូលរួម និងគិតគូរ ព្រមទាំងការចែករំលែកពីគ្នាទៅវិញទៅមកនៅក្នុងសង្គមផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល ៖ លោក អ៊ុន ណារាជ្យ
