រដ្ឋបាលខេត្តសៀមរាប នៅព្រឹកថ្ងៃទី២៧ ខែធ្នូ ឆ្នាំ២០២៣នេះ បានរៀបចំសិក្ខាសាលាឆ្លុះបញ្ចាំង ស្តីពីការអនុវត្តការងារគណនេយ្យភាពសង្គម ឆ្នាំ២០២៣ ជូនដល់អាជ្ញាធរពាក់ព័ន្ធជុំវិញខេត្ត ដើមី្បធ្វើការពិភាក្សា និងពិនិត្យ អំពីវឌ្ឍនភាពនៃការអនុវត្តការងារកន្លងមក លើការផ្តល់សេវាកម្រិតឃុំ/សង្កាត់ នៃក្រុង/ស្រុកទាំង១២ ។
លោក នាក់ ណេរ៉ុន អភិបាលរងខេត្ត មានប្រសាសន៍ថា ការរៀបចំអង្គសិក្ខាសាលានេះ គឺដើម្បីផ្តល់ឱកាសឲ្យអ្នកពាក់ព័ន្ធទាំងអស់ជួបពិភាក្សាគ្នា និងពិនិត្យមើលអំពីវឌ្ឍនភាពនៃការអនុវត្តការងារគណនេយ្យភាពសង្គមទាំងផ្នែកផ្គត់ផ្គង់ ផ្នែកតម្រូវការ និងដោះស្រាយនូវបញ្ហានានា ដែលបានកើតមាន ដើម្បីធ្វើឱ្យប្រសើរឡើងនូវការអនុវត្តសកម្មភាពការងារគណនេយ្យភាពសង្គម ដែលអនុវត្តលើការផ្ដល់សេវាកម្រិត។
លោក នាក់ ណេរ៉ុន បានគូសបញ្ជាក់ថា សិក្ខាសាលាឆ្លុះបញ្ចាំងប្រចាំឆ្នាំនេះ ស្របពេលដែលរដ្ឋបាលខេត្តសៀមរាប បានធ្វើសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅអនុវត្តបន្ត ឆ្នាំ២០២៤ ដោយបានផ្តោតសំខាន់ពីគណនេយ្យភាពសង្គមផងដែរ។ ម៉្យាងទៀតអង្គសិក្ខាលសាលានេះ ពិតជាមានសារៈសំខាន់ដល់ស្ថាប័ន អង្គភាពពាក់ព័ន្ធ ដែលជាផ្នែកផ្គត់ផ្គង់នៃការងារគណនេយ្យភាពសង្គម ដើម្បីជាមូលដ្ឋានក្នុងការពង្រឹងការអនុវត្តការងារគណនេយ្យភាពសង្គម តាមរយៈការផ្សព្វផ្សាយ និងជួយគាំទ្រដល់ផ្នែកតម្រូវការឲ្យយល់ច្បាស់ និងចូលរួមក្នុងកិច្ចការងារនេះ។
ក្នុងនាមរដ្ឋបាលខេត្ត លោកក៏សូមថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំនៃរដ្ឋបាលក្រុង/ស្រុក មន្ទីរ/អង្គភាព ទីចាត់ការចំណុះសាលាខេត្ត អង្គការទស្សនៈពិភពលោក អង្គការសុខភាពគ្រួសារអន្តរជាតិប្រចាំខេត្តសៀមរាប និង មន្រ្តីបង្គោលគណនេយ្យភាពសង្គមថ្នាក់ខេត្ត/ក្រុង/ស្រុក និងអ្នកពាក់ព័ន្ធទាំងអស់ ដែលបានចូលរួមសហការជាមួយរដ្ឋបាលខេត្ត ក្នុងការអនុវត្តការងារគណនេយ្យភាពសង្គម ចាប់តាំងពីដំណាក់កាលទី១ និងដំណាក់កាលទី២ ដែលកិច្ចការងារនេះ ជាផ្នែកមួយនៃការងារកំណែទម្រង់ និងការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ លោកបានផ្តាំផ្ញើដល់សិក្ខាកាមទាំងអស់ ត្រូវចូលរួមឲ្យបានផុសផុលលើកកិច្ចពិភាក្សា ធ្វើឲ្យអង្គសិក្ខាសាលាទទួលបាននូវធាតុចូល និងទទួលបានលទ្ធផលផ្លែផ្កាតាមការគ្រោងទុក៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
