នៅថ្ងៃទី២២ ខែតុលា ឆ្នាំ២០២៥ ពុទ្ធសាសនិកជនមកពីតាមបណ្ដារាជធានី-ខេត្តនានា បានជួបជុំគ្នាប្រារព្ធពិធីបុណ្យកឋិនទានសាមគ្គី ដង្ហែចូលវត្តវិសុទ្ធិមគ្គ ស្រុកអង្គរធំ ខេត្តសៀមរាប ដើម្បីបង្ហាញនូវកម្លាំងសាមគ្គីដ៏រឹងមាំរបស់ប្រជាពលរដ្ឋខ្មែរ ក្នុងការគាំទ្រទាំងពុទ្ធចក្រ និងអាណាចក្រ ព្រមទាំងលើកទឹកចិត្តដល់វីរកងទ័ពដែលកំពុងឈរជើងការពារនៅតំបន់ព្រំដែន។
តំណាងអាចារ្យ និងគណៈកម្មការគ្រប់គ្រងវត្ត បានលើកឡើងថា បើទោះបីជាកម្ពុជានៅមានបញ្ហាព្រំដែនបន្តិចបន្តួចជាមួយប្រទេសថៃក្ដី ក៏ពុទ្ធបរិស័ទយ៉ាងច្រើនកុះករបានរួបរួមគ្នាធ្វើបុណ្យកឋិនទានសាមគ្គី ដែលជាបុណ្យប្រពៃណីសាសនាដ៏យូរលង់មួយ។ ការជួបជុំគ្នានេះ គឺជាការបង្ហាញពីបេះដូងមហាគ្រួសារខ្មែរ ក្នុងឆន្ទៈរួបរួមសាមគ្គី ដើម្បីឧទ្ទិសមគ្គផលជូនដល់ព្រលឹងបុព្វបុរស និងវីរកងទ័ពដែលបានពលីជីវិតការពារបូរណភាពទឹកដី ព្រមទាំងបួងសួងសុំសេចក្ដីសុខសន្តិភាពជូនជាតិ និងលើកតម្លៃវប្បធម៌ប្រពៃណីព្រះពុទ្ធសាសនា។
តំណាងអ្នកគ្រប់គ្រងវត្ដ ក៏បានសម្ដែងនូវអារម្មណ៍រំភើបរីករាយយ៉ាងខ្លាំង ដែលបានឃើញពលរដ្ឋមានសទ្ធាជ្រះថ្លាចំពោះវិស័យព្រះពុទ្ធសាសនា។ ពួកគាត់បានបន្តថា បច្ច័យដែលបានពីបុណ្យកឋិនទានសាមគ្គីនេះ នឹងយកទៅកសាងវត្ត និងមួយចំណែកទៀត នឹងយកទៅចែកជូនដើម្បីលើកទឹកចិត្តដល់វីរកងទ័ពដ៏អង់អាចក្លាហាន ដែលកំពុងការពារព្រំដែន ព្រមទាំងជួយដល់ប្រជាពលរដ្ឋភៀសសឹកផងដែរ។
សូមរំលឹកថា បុណ្យកឋិនទាន គឺជាពិធីបុណ្យដ៏សំខាន់មួយដែលមានតែក្នុងព្រះពុទ្ធសាសនាប៉ុណ្ណោះ ហើយជាទានដែលមានកំណត់ពេលវេលាច្បាស់លាស់ ហៅថា «កាលទាន»។ រយៈកាលនៃការទទួលកឋិនទាន គឺអាចធ្វើបានតែក្នុងរយៈពេលមួយខែ ចាប់ពីថ្ងៃ ១រោច ខែអស្សុជ រហូតដល់ថ្ងៃ ១៥កើត ខែកត្តិក។ វត្ដអារាមដែលទទួលបានអង្គកឋិនទាន ត្រូវតែមានព្រះភិក្ខុដែលបានគង់ចាំព្រះវស្សាអស់ត្រីមាស (៣ខែ) បានត្រឹមត្រូវយ៉ាងហោចណាស់មួយអង្គ ទើបអាចទទួលក្រាលគ្រងអង្គកឋិននោះបាន៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
