ប្រធានក្រុមការងាររាជរដ្ឋាភិបាលចុះមូលដ្ឋានឃុំបឹងមាលា ខេត្តសៀមរាប បានជំរុញដល់ក្រុមការងារទាំងអស់ ត្រូវបន្តកិច្ចសហការគ្នាយ៉ាងសកម្ម ដើម្បីដោះស្រាយបញ្ហាប្រឈម ក្ដីកង្វល់ និងសំណូមពរនានារបស់ប្រជាពលរដ្ឋនៅក្នុងមូលដ្ឋានឱ្យបានឆាប់រហ័ស និងមានប្រសិទ្ធភាព ស្របតាមជំនាញនីមួយៗ។
ក្នុងកិច្ចប្រជុំត្រៀមរៀបចំវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានឃុំបឹងមាលា នារសៀលថ្ងៃទី២៧ ខែតុលា ឆ្នាំ២០២៥ ឯកឧត្តម ស៊ឹម ស៊ូយុង រដ្ឋលេខាធិការក្រសួងអធិការកិច្ច និងជាប្រធានក្រុមការងារ បានលើកឡើងថា ពេលរៀបចំវេទិកាសាធារណៈ ក្រុមការងារត្រូវក្ដាប់ឱ្យបាននូវបញ្ហាប្រឈម ក្ដីកង្វល់ និងសំណូមពររបស់ពលរដ្ឋដែលបានលើកឡើង ហើយត្រូវព្យាយាមដោះស្រាយជូនពួកគាត់ទៅតាមវិស័យនីមួយៗឱ្យបានល្អប្រសើរ ឆាប់រហ័ស និងទទួលបានប្រសិទ្ធភាព ក្នុងន័យជំរុញសេវាសាធារណៈឱ្យកាន់តែខិតជិតពួកគាត់ និងការអភិវឌ្ឍន៍នៅក្នុងមូលដ្ឋាន។
ឯកឧត្តម បានសង្កត់ធ្ងន់លើការបន្តកិច្ចសហការគ្នាខ្ជាប់ខ្ជួន និងត្រឹមត្រូវ ដើម្បីឱ្យពលរដ្ឋមានការជឿទុកចិត្តលើការអនុវត្តការងាររបស់ក្រុមការងារ។ ក្នុងនោះ ក៏ត្រូវចុះពង្រឹងការងាររដ្ឋបាលនៅមូលដ្ឋាន តាមរយៈការត្រួតពិនិត្យ តាមដាន និងគាំទ្រអនុវត្តកម្មវិធី គម្រោង និងផែនការសកម្មភាពនានា ព្រមទាំងលើកកម្ពស់គណនេយ្យភាពរបស់រដ្ឋបាលឃុំ ក្នុងការផ្ដល់សេវាសាធារណៈ និងការអភិវឌ្ឍនៅតាមមូលដ្ឋានឱ្យមានប្រសិទ្ធភាព។ ឯកឧត្តមសង្ឃឹមថា ក្រោយរៀបចំវេទិកាសាធារណៈនៅពេលខាងមុខរួច ក្រុមការងារនឹងអនុវត្តតួនាទីយ៉ាងសកម្ម ដើម្បីឆ្លើយតបទៅនឹងបញ្ហាប្រឈមនិងសំណូមពររបស់ពលរដ្ឋក្នុងមូលដ្ឋាន។
សូមជម្រាបថា ក្នុងកិច្ចប្រជុំនាពេលនេះដែរ ក្រុមការងារក៏បានពិភាក្សាលើបញ្ហាប្រឈមមួយចំនួនក្នុងមូលដ្ឋានឃុំបឹងមាលា ដើម្បីត្រៀមដោះស្រាយជូនប្រជាពលរដ្ឋក្នុងវេទិកាសាធារណៈ ដែលបញ្ហាទាំងនោះរួមមាន៖ បញ្ហាចំណាកស្រុក បញ្ហាផលិតផលកសិផលរបស់កសិករធ្លាក់ថ្លៃ និងរដូវប្រាំងខ្វះទឹកប្រើប្រាស់ សម្រាប់ធ្វើកសិកម្មផងដែរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
