នៅថ្ងៃទី២៨ ខែតុលា ឆ្នាំ២០២៥ មន្ទីរកិច្ចការនារីខេត្តសៀមរាប បានបើកកិច្ចប្រជុំត្រៀមរៀបចំយុទ្ធនាការទិវាក្មេងស្រីអន្តរជាតិ ក្រោមប្រធានបទ “ភាពជាអ្នកក្លាហានដឹកនាំរបស់ក្មេងស្រីដើម្បីទាំងអស់គ្នា” ដោយមានការចូលរួមពីសំណាក់ថ្នាក់ដឹកនាំមន្ទីរអង្គភាពពាក់ព័ន្ធ និងអង្គការជាដៃគូជាច្រើនរូបផងដែរ។
លោកស្រី ក្រង់ ស៉ីថាវី ប្រធានមន្ទីរកិច្ចការនារីខេត្តសៀមរាប បានលើកឡើងថា ទិវាអន្តរជាតិនេះរៀបចំឡើងក្នុងគោលបំណងលើកកម្ពស់សិទ្ធិរបស់ក្មេងស្រី តាមរយៈការបង្ហាញនូវវឌ្ឍនភាព បញ្ហាប្រឈម និងទិសដៅ ព្រមទាំងដាក់ចេញវិធានការដោះស្រាយបញ្ហាប្រឈមនានា ដែលរារាំងសក្ដានុពល និងសុខុមាលភាពរបស់ពួកគេ ដើម្បីសម្រេចបាននូវគុណភាពជីវិតកាន់តែប្រសើរឡើងនាពេលអនាគត។ ទិវានេះក៏រួមចំណែកជំរុញការប្ដេជ្ញាចិត្តជាសកលក្នុងការបញ្ឈប់ការរើសអើង អំពើហិង្សា និងភាពខុសគ្នាផ្នែកសេដ្ឋកិច្ច ដែលប៉ះពាល់ដល់ក្មេងស្រី ព្រមទាំងបង្កើនភាពអង់អាច និងសក្ដានុពលរបស់ពួកគេ តាមរយៈការកៀរគរនិងលើកទឹកចិត្តឱ្យអ្នកពាក់ព័ន្ធទាំងអស់បន្តគាំទ្រ ផ្ដល់ឱកាស និងយកចិត្តទុកដាក់វិនិយោគលើក្មេងស្រីឱ្យកាន់តែច្រើន។
លោកស្រីប្រធានមន្ទីរបន្តថា យុទ្ធនាការនេះក៏ជាការលើកកម្ពស់ការយល់ដឹង និងលុបបំបាត់រាល់បញ្ហាប្រឈមទាក់ទងនឹងយេនឌ័រ ដែលក្មេងស្រីកំពុងតែប្រឈមនៅទូទាំងពិភពលោក ដូចជា ការរៀបអាពាហ៍ពិពាហ៍វ័យក្មេង ការបាត់បង់ឱកាសទទួលបានការអប់រំ និងអំពើហិង្សា។ ជាមួយគ្នានេះ វាក៏ជាការជំរុញការចូលរួមរបស់ក្មេងស្រីក្នុងសង្គម សេដ្ឋកិច្ច វប្បធម៌ សាសនា និងបរិបទឌីជីថល ដោយមិនបោះបង់នរណាម្នាក់ឱ្យនៅឯកា។
លោកស្រីបានបញ្ជាក់ថា សម្រាប់ខេត្តសៀមរាប យុទ្ធនាការទិវាក្មេងស្រី ក្រោមប្រធានបទ “ភាពជាអ្នកក្លាហានដឹកនាំរបស់ក្មេងស្រីដើម្បីទាំងអស់គ្នា” គ្រោងនឹងរៀបចំឡើងនាងខែវិច្ឆិកាខាងមុខនេះ ដោយមានកម្មវិធីពិសេសមួយគឺ «ការជិះកង់ដើម្បីក្មេងស្រីនិងដើម្បីទាំងអស់គ្នា» ជាមួយសាធារណៈជន និងយុវជននៅជុំវិញក្រុងសៀមរាប។ ក្នុងន័យនេះ លោកស្រីបានសំណូមពរដល់មន្ទីរ-អង្គភាព អង្គការដៃគូ ព្រមទាំងបងប្អូនប្រជាពលរដ្ឋទាំងអស់ សូមចូលរួមផ្សព្វផ្សាយ និងគាំទ្រនូវគំនិតផ្ដួចផ្ដើមនានាដែលលើកស្ទួយភាពជាអ្នកដឹកនាំ ភាពក្លាហាន និងសក្ដានុពលរបស់ក្មេងស្រី ដើម្បីឱ្យពួកគេអាចចូលរួមយ៉ាងសកម្មក្នុងការសម្រេចចិត្ត និងការអភិវឌ្ឍសង្គមជាតិ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
