ក្នុងយុទ្ធនាការ “និយាយថាទេចំពោះព័ត៌មានក្លែងក្លាយ – Say No to Fake News” របស់មន្ទីរព័ត៌មានខេត្តសៀមរាប នៅថ្ងៃទី២៨ ខែតុលា ឆ្នាំ២០២៥នេះ លោក សុខ ណារ៉េត អភិបាលស្រុកក្រឡាញ់ បានលើកឡើងថា ស្របពេលប្រព័ន្ធផ្សព្វផ្សាយឌីជីថលកាន់តែរីកចម្រើន យុវជនក៏កំពុងក្លាយជាក្រុមដែលងាយនឹងទទួលឥទ្ធិពលពីព័ត៌មានក្លែងក្លាយ ខណៈជនខិលខូចនៅតែបន្តធ្វើសកម្មភាពញុះញង់ និងលាបពណ៌លើរាជរដ្ឋាភិបាលដើម្បីទាញយកផលប្រយោជន៍នយោបាយ និងអាជីវកម្មផ្សេងៗ។
លោក សុខ ណារ៉េត បានគូសបញ្ជាក់ថា ព័ត៌មានក្លែងក្លាយបានក្លាយជាបញ្ហាប្រឈមមួយនៅលើបណ្ដាញសង្គម។ មិនត្រឹមតែប៉ុណ្ណោះ បច្ចុប្បន្នពិភពលោកកំពុងប្រឈមនឹងបញ្ហាភូមិសាស្ត្រនយោបាយ និងសេដ្ឋកិច្ច ទន្ទឹមនឹងត្រូវប្រឈមមុខចំពោះការបញ្ចេញព័ត៌មានក្លែងក្លាយ ដែលនាំឱ្យប៉ះពាល់ដល់កិច្ចប្រឹងប្រែងការពារសន្តិភាព និងស្ថេរភាពពិភពលោក។ លោកថាការផ្សព្វផ្សាយព័ត៌មានក្លែងក្លាយប្រើប្រាស់ប្រព័ន្ធឌីជីថលថ្មីៗ បានប៉ះពាល់ និងបង្កើតឱ្យមានអំពើហិង្សា, ការស្អប់ខ្ពើម, ការរើសអើង, ការមាក់ងាយរំខានដល់ភូមិសាស្រ្តនយោបាយ សង្គមជុំវិញពិភពលោក និងប៉ះពាល់ដល់ទំនាក់ទំនងសង្គម។
លោកបន្តថា ស្របពេលជាមួយគ្នានេះដែរ បញ្ញាសិប្បនិម្មិត (AI) ក៏ត្រូវបានគេយកទៅប្រើប្រាស់បង្កើតជាព័ត៌មានដែលមានចរិតបំភាន់ បំពុលសង្គម និងងាយបោកប្រាស់ប្រជាពលរដ្ឋផងដែរ។ លោកក៏បានសង្កត់ធ្ងន់ថា ការប្រយុទ្ធប្រឆាំងព័ត៌មានក្លែងក្លាយ គឺជានិន្នាការសកល។ លោកអភិបាលស្រុក ក៏បានថ្លែងអំណរគុណដល់ក្រសួងព័ត៌មានដែលបានដាក់ចុះយន្តការ និងវិធានការប្រយុទ្ធប្រឆាំងព័ត៌មានក្លែងក្លាយគ្រប់ទម្រង់ ដោយប្រើប្រាស់យុទ្ធសាស្ត្រ «៣ ប» គឺ៖ បញ្ជ្រាប បន្សាប និងបង្ក្រាប។
លោក យឿន ចាន់ អនុប្រធានទទួលបន្ទុករួមមន្ទីរព័ត៌មានខេត្តសៀមរាប បានបង្ហាញថា គោលបំណងនៃយុទ្ធនាការនេះគឺ ដើម្បីលើកកម្ពស់ការយល់ដឹងសាធារណៈ អំពីគ្រោះថ្នាក់ និងផលវិបាកនៃព័ត៌មានក្លែងក្លាយ។ កាត់បន្ថយព័ត៌មានក្លែងក្លាយឱ្យមកនៅកម្រិតអប្បបរមា និងធានាសន្តិសុខព័ត៌មាន តាមរយៈការធ្វើឱ្យប្រាកដថា ប្រជាពលរដ្ឋទទួលបានព័ត៌មានប្រកបដោយគុណភាព និងសុវត្ថិភាព។ បញ្ជ្រាបជូនអាជ្ញាធរមូលដ្ឋាន និងប្រជាពលរដ្ឋ ឱ្យបានដឹងពីផលប៉ះពាល់របស់ព័ត៌មានក្លែងក្លាយ និងជំរុញការចូលរួមប្រយុទ្ធប្រឆាំងព័ត៌មានក្លែងក្លាយនៅតាមមូលដ្ឋានរបស់ខ្លួន៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
