នារសៀលថ្ងៃទី២៩ ខែតុលា ឆ្នាំ២០២៥ អង្គកឋិនទានសាមគ្គី វត្តពោធិបន្ទាយជ័យ ក្រុងសៀមរាប ទទួលថវិកាជាង ១ម៉ឺនដុល្លារ សម្រាប់ទ្រទ្រង់ចតុបច្ច័យ និងបន្តកសាងសមិទ្ធផលនានានៅក្នុងវត្ត។
ព្រះតេជគុណ សូរ សាន ព្រះគ្រូចៅអធិការវត្ត មានថេរដីកាឱ្យដឹងថា បច្ច័យដែលប្រមូលបានពីអង្គកឋិនទាននៅពេលនេះ គឺទុកសម្រាប់ទ្រទ្រង់ចង្ហាន់ប្រចាំថ្ងៃដល់ភិក្ខុសាមណេរក្នុងវត្តមានជាង ៧០ អង្គ ក្រោយគង់ចាំព្រះវស្សាអស់រយៈពេលបីខែ។ មួយផ្នែកទៀត បែងចែកសម្រាប់ផ្គត់ផ្គង់ដល់សមណសិស្សដែលនិមន្តមកសិក្សារៀនសូត្រ និងស្នាក់នៅទីនេះ ហើយមួយផ្នែកទៀត លៃលកយកទៅបន្តសាងសង់ កែលំអសមិទ្ធផលក្នុងវត្ត ជាពិសេស សាងសង់របងវត្ត សាងសង់ផ្លូវចូលវត្ត និងទីសេនាសនៈសម្រាប់ព្រះសង្ឃគង់នៅ។
ចំណែក ព្រះតេជគុណ រឹត ស៊ីធីម ព្រះគ្រូសូត្រស្តាំ មានថេរដីកាថា បុណ្យកឋិនសាមគ្គីក៏បង្ហាញអំពីការរួបរួមគ្នាជាធ្លុងមួយ របស់ពុទ្ធបរិស័ទចំណុះជើងវត្ត ឬញាតិញោមមកពីគ្រប់ទិសទី ក្នុងការចូលរួមចំណែកកម្លាំងកាយចិត្ត និងថវិកាដោយមិនប្រកាន់វណ្ណៈ ឬនិន្នាការណាមួយឡើយ។ នេះបង្ហាញពីឆន្ទៈ និងស្មារតីសាមគ្គីភាពរវាងបុគ្គល គ្រួសារ និងសង្គមជាតិ ក្នុងការទ្រទ្រង់ព្រះពុទ្ធសាសនា ឱ្យបានចម្រើនរុងរឿង និងគង់វង្សយូរអង្វែង ផ្ដល់កម្លាំងកាយ ចិត្ត ដល់ព្រះភិក្ខុសង្ឃ ដែលជាសាសនទាយាទបន្តអាយុព្រះពុទ្ធសាសនា និងដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
