ទូកប្រណាំងចំនួន ២៦ នឹងចូលរួមប្រកួតលក្ខណៈមិត្តភាពតាមបណ្ដោយដងស្ទឹងសៀមរាប ក្នុងកម្មវិធីផ្សារទឹក និងជិះទូកកម្សាន្ត ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៥ នៅខេត្តសៀមរាប ដែលគោលបំណងសំខាន់នៃកម្មវិធីនេះ គឺដើម្បីរឹតបន្តឹងសាមគ្គីភាពក្នុងចំណោមយុវជន និងលើកកម្ពស់កីឡាប្រពៃណីខ្មែរ។
ក្នុងកិច្ចប្រជុំគណៈកម្មការបច្ចេកទេសរៀបចំការប្រណាំងទូកមិត្តភាពសៀមរាបផ្ទះខ្ញុំ នៅថ្ងៃទី៣០ ខែតុលា ឆ្នាំ២០២៥នេះ ឯកឧត្តម គុជ លីណា ប្រធានគណៈកម្មការបច្ចេកទេស មានប្រសាសន៍ថា កម្មវិធីប្រណាំងទូកមិត្តភាពនេះ គឺជាផ្នែកមួយដ៏សំខាន់នៃព្រឹត្តិការណ៍ទាំងមូល ដែលត្រូវបានរៀបចំឡើងដើម្បីជំរុញការចូលរួមរបស់យុវជនក្នុងសកម្មភាពសង្គម និងការលើកស្ទួយកីឡាប្រពៃណីខ្មែរ។ សម្រាប់ការប្រណាំងទូកមិត្តភាពមិនត្រឹមតែជាការកម្សាន្តបែបវប្បធម៌ប៉ុណ្ណោះទេ តែថែមទាំងជាវេទិកាដ៏សំខាន់សម្រាប់យុវជនបង្ហាញសមត្ថភាព កម្លាំង និងស្មារតីក្លាហាន ពង្រឹងការងារជាក្រុម ធ្វើឱ្យសហគមន៍កាន់តែរឹងមាំ និងមានអត្តសញ្ញាណជាតិខ្លាំងក្លា។
ឯកឧត្តមបានបន្ថែមថា ព្រឹត្តិការណ៍នេះក៏នឹងជួយកសាងទំនាក់ទំនងដ៏រឹងមាំរវាងយុវជនគ្រប់ភូមិ សង្កាត់ និងស្រុក នៅក្នុងខេត្តសៀមរាប តាមរយៈការលើកស្ទួយស្មារតីស្រឡាញ់ប្រទេសជាតិ និងការថែរក្សាប្រពៃណីខ្មែរ។ ការចូលរួមរបស់យុវជន គឺជាកម្លាំងដ៏សំខាន់ក្នុងការជ្រៀតចូលកាត់បន្ថយអំពើអាក្រក់ បង្កើនការយល់ចិត្តរវាងគ្នា និងជំរុញភាពជាឯកភាពក្នុងសង្គម។ ការណ៍នេះនឹងជួយជំរុញឱ្យខេត្តសៀមរាប ក្លាយជាទីក្រុងវប្បធម៌ និងទេសចរណ៍ដែលមានអត្តសញ្ញាណពិសេសលើឆាកពិភពលោក។
សូមបញ្ជាក់ថា ក្រៅពីកម្មវិធីប្រណាំងទូកមិត្តភាពសៀមរាប-ផ្ទះខ្ញុំ ដើម្បីអបអរសាទរព្រះរាជពិធីបុណ្យអុំទូក រដ្ឋបាលខេត្តក៏មានកម្មវិធីជាច្រើនទៀត ដូចជា៖ កម្មវិធីជិះទូកកម្សាន្ត និងប្រណាំងក្រឡោ កម្មវិធីប្រគំតន្ត្រីស្គរដៃ, កម្មវិធីស្ដង់ពិព័រណ៍ និងម្ហូបអាហារ, ផ្សារបណ្ដែតទឹក និង Street Food, កម្មវិធីប្រដាល់គុនខ្មែរ និងល្ខោនបាសាក់ និងពិធីបណ្ដែតប្រទីប សំពះព្រះខែ និងអកអំបុកជាដើម៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
