អាជ្ញាធរខេត្តសៀមរាប បានលើកឡើងថា ការងារគាំពារ និងអភិវឌ្ឍន៍កុមារតូច ត្រូវបានចាត់ទុកជាកិច្ចការដ៏មានសារៈសំខាន់ និងជាអាទិភាពខ្ពស់របស់រាជរដ្ឋាភិបាល ដែលបានឆ្លុះបញ្ចាំងយ៉ាងច្បាស់នៅក្នុងគោលនយោបាយជាតិ ជាពិសេសគឺផ្នែកមួយនៃ “យុទ្ធសាស្ត្របញ្ចកោណ ដំណាក់កាលទី១” ក្នុងការកសាងធនធានមនុស្សប្រកបដោយគុណភាព។
ក្នុងកិច្ចប្រជុំស្ដីពីការរៀបចំកិច្ចប្រជុំវិភាគទិន្នន័យស្ថានភាពកុមារតូច សម្រាប់រៀបចំផែនការគាំពារ និងអភិវឌ្ឍន៍កុមារតូចរយៈពេល ៣ឆ្នាំ (២០២៦-២០២៨) របស់រដ្ឋបាលខេត្តសៀមរាប នៅថ្ងៃទី៣០ ខែតុលា ឆ្នាំ២០២៥នេះ លោកស្រី ម៉ននី រង្សី អភិបាលរងខេត្ត និងជាប្រធានក្រុមការងារកិច្ចគាំពារ និងអភិវឌ្ឍន៍កុមារតូចខេត្ត បានបញ្ជាក់ថា កិច្ចការនេះគឺតបទៅនឹង «ផែនការជាតិស្ដីពីការគាំពារ និងអភិវឌ្ឍន៍កុមារ ២០២៦-២០២៨»។ ខេត្តសៀមរាបមានទស្សនៈ និងគោលបំណងចូលរួមយ៉ាងសកម្មក្នុងការងារកសាងធនធានមនុស្សប្រកបដោយគុណភាពនេះ ដោយចាប់ផ្ដើមពីក្រុមអាយុ ០ ដល់ ៦ឆ្នាំ។ លោកស្រីយល់ឃើញថា នេះជាការវិនិយោគដ៏ធំធេងសម្រាប់កុមារ និងអនាគតរបស់ពួកគេ ក៏ដូចជាផលប្រយោជន៍ចំពោះក្រុមគ្រួសារ និងសង្គមជាតិទាំងមូល។
លោកស្រីបានបញ្ជាក់ទៀតថា ប្រសិនបើកុមារក្នុងរយៈពេលពី ០ ដល់ ៦ឆ្នាំ បានទទួលសេវារួមផ្សំទាន់ពេលវេលាចំនួន៥ វិស័យសំខាន់ៗរួមមាន៖ ១. សុខភាព, ២. អាហារូបត្ថម្ភ, ៣. ការចូលរៀនដំបូង, ៤. សុវត្ថិភាព និងការការពារ, និង ៥. ការថ្នាក់ថ្នមដោយវិជ្ជមាន ពីអាណាព្យាបាល នោះកុមារទាំងនោះនឹងមានឱកាសបណ្ដុះបញ្ញាស្មារតីឈ្លាសវៃ និងសុខភាពរាងកាយមាំទាំ ដើម្បីត្រៀមទទួលចំណេះដឹង វិជ្ជាជីវៈ ជំនាញថ្មីៗ ជាគ្រឹះសំខាន់ដើម្បីក្លាយខ្លួនជាកម្លាំងចលករដ៏មានគុណភាពសម្រាប់ប្រទេសជាតិ។
លោកស្រីបន្ថែមថា ដោយសារតម្រូវការរបស់កុមារតូចមានលក្ខណៈពហុវិស័យ ហេតុដូច្នេះការងារអភិវឌ្ឍន៍កុមារតូចតម្រូវឱ្យមានការចូលរួមពីគ្រប់ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ រួមទាំងអាណាព្យាបាលផងដែរ។ លោកស្រីបានសង្កត់ធ្ងន់ពីសារៈសំខាន់នៃកិច្ចប្រជុំវិភាគស្ថានភាពនាពេលនេះថា គឺជាមូលដ្ឋានគ្រឹះដ៏ចាំបាច់សម្រាប់រៀបចំ ផែនការគាំពារ និងអភិវឌ្ឍន៍កុមារតូចរយៈពេល ៣ឆ្នាំ (២០២៦-២០២៨) ឱ្យបានចំគោលដៅ និងត្រូវតាមតម្រូវការជាក់ស្ដែងនៅថ្នាក់មូលដ្ឋាន។ ដូច្នេះ លោកស្រីបានអំពាវនាវដល់អស់លោក លោកស្រីថ្នាក់មន្ទីរវិស័យពាក់ព័ន្ធ ត្រូវបញ្ចេញឱ្យអស់លទ្ធភាពក្នុងការពិភាក្សា វិភាគទិន្នន័យ និងផ្ដល់យោបល់គ្រប់ជ្រុងជ្រោយ។ ដើម្បីឱ្យការអនុវត្តផែនការនេះសម្រេចបានជោគជ័យ លោកស្រីបញ្ជាក់ថា គឺចាំបាច់ត្រូវមានការចូលរួមគាំទ្រពីដៃគូអភិវឌ្ឍន៍ អង្គការមិនមែនរដ្ឋាភិបាល មន្ទីរជំនាញ និងជាពិសេសអាជ្ញាធរក្នុងតំបន់ ឬអ្នកពាក់ព័ន្ធជាច្រើនទៀត៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
