នៅព្រឹកថ្ងៃទី ០៩ ខែ ឧសភា ឆ្នាំ២០១៩ ប្ដីប្រពន្ធអនិកជនខ្មែរ រស់នៅសហរដ្ឋអាមេរិក បានឧបត្ថម្ភអំណោយសប្បុរសធម៌ ជូនដល់ជនទីទ័លក្រ ជនពិការ ជនរស់នៅជាមួយមេរោគអេដស៍ និងសិស្សានុសិស្សរស់នៅក្នុងភូមិសំរោង ឃុំលាងដៃ ស្រុកអង្គរធំ ខេត្តសៀមរាប ដើម្បីជួយសម្រួលដល់ការលំបាក។
ស្ថិតក្នុងបរិវេណវត្តព្រះអង្គប្រមោល ស្ថិតនៅភូមិសំរោង ឃុំលាងដៃ លោក ជា សុវណ្ណ និង ភរិយា ដែលជាអនិកជនខ្មែរ អស់រយៈពេល១០ឆ្នាំមកហើយនោះ បាននិយាយថា អំណោយទាំងនេះ លោកមិនបានត្រៀមទុកជាមុនឡើយ ហើយនេះក៏ជាទឹកចិត្តរបស់លោកឪពុកអ្នកម្ដាយរបស់លោកផងដែរ ដើម្បីជាការចែករំលែកទៅដល់ជនទីទ័កក្រ ខ្វះខាតក្នុងជីវភាពប្រចាំថ្ងៃ។
លោក ឡុង រដ្ឋារក្ស អភិបាលស្រុកអង្គរធំ បានសម្តែងនូវអំណរគុណ និងកោតសរសើរចំពោះ ទឹកចិត្តសប្បុរសធម៌ របស់លោក ជា សុវណ្ណា និង ភរិយា រួមទាំងក្រុមគ្រួសារ ទោះបីក្រុមគ្រួសារលោកបានឃ្លាតទៅឆ្ងាយពីមាតុ ប្រទេសរបស់ខ្លួនក៏ពិតមែន តែទឹកចិត្តស្មារតីរបស់លោកក៏នៅតែផ្សាភ្ជាប់នឹងប្រជាជាតិខ្លួន។
លោកអភិបាលស្រុកបានចាត់ទុកសកម្មភាពសប្បុរសធម៌នេះ ថាជាការយកអសារនិងជួយទុក្ខធុរៈគ្នា គឺសបញ្ជាក់ឱ្យឃើញច្បាស់ពីអត្ថចរិក ប្រពៃណីទំនៀមទំលាប់ របស់បងប្អូនខ្មែរយើងទោះបីនៅជិតនៅឆ្ងាយក្តីតែងតែជួយយកអាសារគ្នា និងស្រឡាញ់រាក់ទាក់ ញញឹមដាក់គ្នាមិនដែលដាច់។
ឆ្លៀតឱកាសនោះ លោកអភិបាលស្រុកបានសំណូមពរ ដល់ម្ចាស់អំណោយ សូមឲ្យបន្តនូវសកម្មភាពសប្បុរសធម៌នេះជាបន្តទៀត ជាពិសេសជួយចែករំលែកទៅកាន់ បណ្តាភូមិឃុំ ផ្សេងៗទៀតទៅតាមលទ្ឋភាព ទន្ទឹមនឹងនោះ លោកក៏បានផ្តាំផ្ញើដល់ប្រជាពលរដ្ឋទាំងអស់ ឲ្យយកចិត្តទុកដាក់ចំពោះបញ្ហាសុខភាព អនាម័យ ព្រមទាំងធ្វើការណែនាំដល់សិស្សានុសិស្ស ឲ្យត្រូវចេះធ្វើអនាម័យ បរិស្ថាននៅតាមសាលារៀន និង ខិតខំរៀនសូត្រ ឲ្យក្លាយជាកូនល្អ សិស្សល្អ ពលរដ្ឋល្អទៅអនាគត ។
អំណោយដែលផ្តល់ជូនបងប្អូនទាំង៥០គ្រួសារនាឱកាសនោះ ក្នុងមួយគ្រួសារទទួលបាន អង្ករ ២៥គ.ក ,សារុង១ , ក្រមា ១ , មីចេង ១ថង មី១កេស , ទឹកត្រី ១យូរ , ទឹកស៊ីអ៊ីវ ១យូរ , ទឹកដោះគោខាប់ ១កំប៉ុង និង ថវិកា ៥ម៉ឺនរៀល ។ សិស្សានុសិស្ស ៣៦២នាក់ម្នាក់ៗ សៀវភៅសរសេរ ២ក្បាល ,ប៊ិក ១ ខ្មៅដៃ១ និង ប្រាក់៤ពាន់រៀល និង លោកគ្រួ អ្នកគ្រូ១២នាក់ ម្នាក់ៗ ២ម៉ឺនរៀល សរុបចំនួន ៤៥០០ដុល្លារអាមេរិក។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
