នៅរសៀលថ្ងៃទី២១ ខែកុម្ភៈ ឆ្នាំ២០២៥នេះ នៅសណ្ឋាគារបុរីអង្គរខេត្តសៀមរាប ឯកឧត្ដម ហួត ហាក់ រដ្ឋមន្រ្ដីក្រសួងទេសចរណ៍ បានអញ្ជើញជួបសំណេះសំណាលជាមួយមគ្គុទេ្ទសក៍ទេសចរណ៍តំបន់សៀមរាប ដោយមានការចូលរួមពី លោក ង៉ូវ សេងកាក់ អភិបាលរងខេត្ត ប្រតិភូអមដំណើរ និងបងប្អូនមគ្គុទេ្ទសក៍ទេសចរណ៍ជាច្រើនរូបទៀត។
ឯកឧត្ដម ហួត ហាក់ មានប្រសាសន៍ថា វិស័យទេសចរណ៍មានភាពរីកចម្រើនទៅមុខបាន អាស្រ័យទៅលើសសរស្ដម្ភនៃកិច្ចសហប្រតិបត្ដិការ ដូចជា ការបើកកិច្ចសហប្រតិបត្ដិការជាមួយអន្ដរក្រសួងស្ថាប័ន ថ្នាក់ជាតិ និងថ្នាក់ជាតិ ពីព្រោះវិស័យទេសចរណ៍ជាវិស័យមួយដែលពាក់ព័ន្ធគ្រប់ផ្នែក។ បើកកិច្ចសហប្រតិបត្ដិការថ្នាក់ក្រោមជាតិ ដែលក្នុងនោះរដ្ឋបាលរាជធានីខេត្ដទាំង២៥ ក្រសួងទេសចរណ៍ត្រូវធ្វើការជាមួយជាប់ជានិច្ចដើម្បីរំលេចចេញនូវសក្ដានុពលវិស័យទេសចរណ៍នៅតាមបណ្ដាខេត្ដនីមួយៗ។
ឯកឧត្តមបន្តថា ស្របពេលជាមួយគ្នានោះ ត្រូវបើកកិច្ចសហប្រតិការជាមួយវិស័យឯកជនទាំងជាតិ និងអន្ដរជាតិ ជាប្រតិបត្ដិករក្នុងវិស័យទេសចរណ៍។ ទី៤.បើកកិច្ចសហប្រតិបត្ដិការជាមួយអន្ដរជាតិ ជាមួយដៃគូអភិវឌ្ឍន៍ បើកកិច្ចសហប្រតិបត្ដិការជាមួយឯកអគ្គរាជទូតកម្ពុជាប្រចាំនៅបរទេស។ កិច្ចសហប្រតិបត្ដិការជាមួយមេឌៀ សារព័ត៌មាន បណ្ដាញសង្គម ដែលជាអំណាច ទី៤.ក្នុងការជួយផ្សព្វផ្សាយសក្ដានុពលវិស័យទេសចរណ៍ និងត្រូវសហការជាមួយប្រជាពលរដ្ឋដែលរាប់បញ្ចូលទាំងភ្ញៀវជាតិ និងអន្ដរជាតិ ដែលលើកឡើងពីបញ្ហាផ្សេងៗដើម្បីឱ្យក្រសួងធ្វើការដោះស្រាយបានទាន់ពេលវេលាទាក់ទងនឹងវិស័យទេសចរណ៍។
លោក ង៉ូវ សេងកាក់ អភិបាលរងខេត្ដ បានឱ្យដឹងថា មគ្គុទ្ទេសក៍ទេសចរណ៍ដែលបានស្នើសុំអាជ្ញាបណ្ណមានចំនួន ៥.២០៦នាក់ ដែលនៅក្នុងខេត្ដសៀមរាប បែងចែកមគ្គុទេ្ទសក៍ទៅតាមភាសាដែលមាន ១២ភាសា ដែលមគ្គុទេ្ទសក៍មានច្រើនជាងគេ គឺមគ្គុទ្ទេសក៍ភាសាអង់គ្លេស។ តាមរយៈការអនុវត្ដការងារប្រចាំថ្ងៃមគ្គុទ្ទេសក៍ទេសចរណ៍ក៏បានចូលរួមចំណែកយ៉ាងសកម្មក្នុងចលនាការងារសង្គមមួយចំនួនទាក់ទងនឹងបរិស្ថាន ការជួយដល់ប្រជាពលរដ្ឋក្រីក្រនៅមូលដ្ឋានដែលបានពីភ្ញៀវទេសចរ។
លោកអភិបាលរងខេត្ដ ក៏បានសូមសំណូមពរដល់មគ្គុទ្ទេសក៍ដែលមិនទាន់បានរៀបចំឯកសារស្នើសុំបណ្ណ ប.ស.ស សូមឱ្យប្រធានសមាគមត្រូវជំរុញសមាជិករបស់ខ្លួនដើម្បីស្នើសុំនៅការិយាល័យរដ្ឋបាលខេត្ត នឹងរៀបចំចាត់ចែងជូនសម្រាប់យើងនៅពេលដែលយើងមានជំងឺផ្សេងៗអាចសម្រួលក្នុងការដោះស្រាយជីវភាពរបស់ខ្លួន៕
អត្ថបទ៖ លោក អោត រត់
កែសម្រួល៖លោក អ៊ុន ណារាជ្យ
