នៅថ្ងៃទី០៧ ខែមីនា ឆ្នាំ២០២៥ រដ្ឋបាលស្រុកបន្ទាយស្រី រៀបចំពិធីអបអរសាទរខួបលើកទី១១៤ ទិវាអន្តរជាតិ ៨មីនា ឆ្នាំ២០២៥ក្រោមប្រធានបទ “ស្តីពី “សមភាព និងភាព អង់អាច ចំពោះស្ត្រី និងក្មេងស្រីគ្រប់រូប” ក្រោមវត្តមានឯកឧត្តម សែម រតនា ប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី និងលោកជំទាវ ដោយមានការអញ្ជើញចូលរួមពី ឯកឧត្តម លោកជំទាវ ក្រុមការងាររាជរដ្ឋាភិបាលចុះមូលដ្ឋាន ប្រធានក្រុមប្រឹក្សាស្រុក អភិបាលស្រុក និងមន្ត្រីរាជការក្នុងមូលដ្ឋាន សិស្សានុសិស្ស និងបងប្អូនប្រជាពលរដ្ឋជាច្រើនរូប។
លោក រិន ឡូត អភិបាលស្រុកបន្ទាយស្រី បានលើកឡើងថា ការជ្រើសរើសយកប្រធានបទសកលស្តីពី “សមភាព និងភាពអង់អាច ចំពោះស្ត្រី និងក្មេងស្រីគ្រប់រូប” ជាការរំលេចអំពីសក្តានុពល និងភាពចាំបាច់ នៃការលើកកម្ពស់ការចូលរួម និងភាពជាតំណាងរបស់ស្ត្រី សមភាព ភាពអង់អាច ចំពោះស្ត្រី និងក្មេងស្រីគ្រប់រូប ប្រកបដោយ ប្រសិទ្ធភាព និងសុវត្ថិភាព ព្រមទាំងបានឆ្លើយតបនឹងបរិបទនៃការវិវត្តរបស់សង្គមជាតិ។
លោកអភិបាលស្រុកបន្ទាយស្រី បន្ថែមថាក្រោមការយកចិត្តទុកដាក់ពីប្រមុខរាជរដ្ឋាភិបាល បានដាក់ចេញនូវវិធានការជាក់លាក់ជាច្រើន ក្នុងការបញ្ជ្រាបយេនឌ័រ និងបង្កើនតួនាទីស្ត្រី ក្នុងវិស័យសាធារណៈ និងនយោបាយ ក្នុងនោះស្រុកបន្ទាយស្រី មានចំនួនស្ត្រីជាថ្នាក់ដឹកនាំ ក្នុងជួរមន្រ្តីរាជការនៃរដ្ឋបាលស្រុក ថ្នាក់ដឹកនាំក្នុងវិស័យនយោបាយ នៃរដ្ឋបាលស្រុក រដ្ឋបាលឃុំ កងកម្លាំងប្រដាប់អាវុធ នាយិកា និងគ្រូបង្រៀន សរុប២៩៦នាក់។
ព័ត៌មានជាតិ ថ្មីៗ
ជាមួយគ្នានេះដែរ ឯកឧត្តម សែម រតនា ប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី មានប្រសាសន៍ថាស្ត្រីជាកម្លាំងចលករដែលមិនអាចខ្វះបាន ក្នុងការលើកកម្ពស់ជីវភាពគ្រួសារ និងសង្គមជាតិ ដែលរួមចំណែកធ្វើឱ្យសេដ្ឋកិច្ចមានកំណើនខ្ពស់។ ក្របខណ្ឌគោលនយោបាយជាតិ គាំពារសង្គម សម្រាប់កែទម្រង់ ការអភិវឌ្ឍន៍ ប្រព័ន្ធការគាំពារសង្គម ដើម្បីរក្សាឱ្យបាននូវ សន្តិសុខប្រាក់ចំណូល កាត់បន្ថយនូវភាពរងគ្រោះផ្នែកសេដ្ឋកិច្ច និងហិរញ្ញវត្ថុ របស់ប្រជាជន ព្រមទាំងលើកកម្ពស់ សុខុមាលភាព សមធម៌ សាមគ្គីភាព នៃសុខដុមរម្យនា នៅក្នុងសង្គមជាតិទាំងមូល។
ឯកឧត្តម សែម រតនា បន្តថារាជរដ្ឋាភិបាល បានយកចិត្តទុកដាក់ និងលើកកម្ពស់ការចូលរួមរបស់ស្ត្រី ក្នុងការធ្វើសេចក្តីសម្រេចចិត្ត ទាំងក្នុងវិស័យសាធារណៈ និងនយោបាយ ឱ្យស្ត្រីបានចូលរួមគ្រប់ដំណើរការ នៃកិច្ចអភិវឌ្ឍន៍សង្គម ប្រកបដោយស្មើភាពជាមួយបុរស។ ជាក់ស្ដែងក្នុងយុទ្ធសាស្ត្របញ្ចកោណដំណាក់កាលទី១ និងក្របខណ្ឌគោលនយោបាយ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ ស្ត្រី និងក្មេងស្រី ដែលជាការអនុវត្តនូវសិទ្ធិ ការលើកកម្ពស់ឋានៈតួនាទី ការទទួលបានកាលានុវត្តភាព និង ជម្រើសនានា នៅក្នុងការរស់នៅ និងលើកកម្ពស់ស្ថានភាពសេដ្ឋកិច្ច សង្គមរបស់ខ្លួន និងគ្រួសារ រួមទាំងការ ទទួលបានលទ្ធភាពកាន់តែទូលំទូលាយសម្រាប់ការសិក្សា អប់រំ ការអភិវឌ្ឍន៍ជំនាញវិជ្ជាជីវៈ ការប្រកបមុខរបរ ការងារ និងអាជីវកម្មជាដើម៕
អត្ថទបទ និងរូបភាព ៖លោក ធន់ ពូថេ
កែសម្រួល៖ លោក ហាំ ម៉េងហួត
