ខេត្តសៀមរាប គ្រោងនឹងដាក់ចេញនូវគម្រោងរថយន្តក្រុងអគ្គិសនី (E-Bus) និងប្រព័ន្ធបច្ចេកវិទ្យាគ្រប់គ្រងការដឹកជញ្ជូនឆ្លាតវៃ ដើម្បីសម្រេចឱ្យបាននូវប្រព័ន្ធដឹកជញ្ជូនសាធារណៈមួយប្រកបទៅដោយចីរភាព និងប្រសិទ្ធភាពខ្ពស់ ដែលការអនុវត្តគម្រោងក្នុងដំណាក់កាលនេះ គឺផ្តោតសំខាន់ទៅលើខ្សែរថយន្តក្រុង ដែលរត់ឆ្លងកាត់តាមដងវិថីសំខាន់ៗក្នុងទីក្រុងសៀមរាប និងមានចម្ងាយសរុបប្រមាណ ៥០គីឡូម៉ែត្រ។
ក្នុងកិច្ចប្រជុំក្រុមការងារបច្ចេកទេសអន្តរក្រសួង ជាមួយរដ្ឋបាលខេត្តសៀមរាប ស្ដីពីការរៀបចំអភិវឌ្ឍគម្រោងប្រព័ន្ធដឹកជញ្ជូនសាធារណៈតាមរថយន្តក្រុងអគ្គិសនី (E-Bus) ក្នុងក្រុងសៀមរាប តាមយន្តការភាពជាដៃគូរវាងរដ្ឋ និងឯកជន នៅថ្ងៃទី២០ ខែមីនា ឆ្នាំ២០២៥នេះ លោក លី សារី អភិបាលរងខេត្តសៀមរាប បានលើកឡើងថា គម្រោងសិក្សារៀបចំប្រព័ន្ធដឹកជញ្ជូនសាធារណៈតាមរថយន្ដក្រុងអគ្គិសនីក្នុងក្រុងសៀមរាប ចាប់ផ្ដើមសិក្សាបុរេសមិទ្ធិលទ្ធភាពដោយអគ្គនាយកដ្ឋានដឹកជញ្ជូនផ្លូវគោក សហការជាមួយវិទ្យាស្ថានអភិវឌ្ឍបៃតង (GGGI) និងទទួលបានការសម្របសម្រួល និងគាំទ្រពីរដ្ឋបាលខេត្តសៀមរាប និងអាជ្ញាធរពាក់ព័ន្ធក្នុងខេត្ត ក្នុងឆ្នាំ២០២១។
លោក លី សារី បន្តថា ក្រុមការងារនាយកដ្ឋានដឹកជញ្ជូនសាធារណៈក្រុង នៃក្រសួងសាធារណការ និងដឹកជញ្ជូន បានចុះសិក្សាកំណត់យកខ្សែរត់ចំនួន ៣ខ្សែ និងស្ថានីយរង់ចាំចំនួន ៣៣ទីតាំង ខ្សែរត់ទី១.ផ្លូវជាតិលេខ ៦ ទៅ-មក ចាប់ពីរង្វង់មូលព្រះបាទជ័យវរ្ម័នទី៧ (វិទ្យាល័យសម្ដេចឪ) រហូតដល់រង្វង់មូលផ្ការំដួល (ស្វាយធំ)ស្រុកប្រាសាទបាគង។ ខ្សែរត់ទី២.ផ្លូវក្រវ៉ាត់ក្រុង ចាប់ពីស្ដុបចុងកៅស៊ូ រត់តាមបណ្ដោយវិថីឈ្នះៗ (ផ្លូវវាងក្រុង) រហូតដល់ស្ដុបឈ្នះៗ (ស្ដុបសាលាគ្រួស) និងបន្ដតាមវិថីសម្ដេចក្រឡាហោម ស ខេង រហូតដល់រុក្ខវិថីព្រះសីហនុ និងបត់តាមស្ដុបគន្ធបុប្ផាមកតាមបណ្ដោយវិថីសម្ដេចវិបុលបញ្ញាសុខ អាន រហូតដល់វង្វង់មូលព្រៃគុយ បន្ដឆ្ពោះទៅរង្វង់មូលផ្ការំដួល និងបន្ដតាមផ្លូវជាតិលេខ៦ រហូតដល់ស្ដុបចុងកៅស៊ូវិញ និងខ្សែរត់ទី៣.ផ្លូវស្របស្ទឹងសៀ មរាប ពីតំបន់ចុងឃ្នៀស រហូតដល់បុរីប្រឹមប្រិយ៍។
គួរឱ្យដឹងដែរថា ក្រៅពីគម្រោងរថយន្តក្រុងអគ្គិសនី (E-Bus) ដែលរត់ឆ្លងកាត់តាមដងវិថីសំខាន់ៗនៃក្រុងសៀមរាប កាលពីថ្ងៃទី១៥ ខែកុម្ភៈ ឆ្នាំ២០២៤កន្លងទៅ ខេត្តសៀមរាប ក៏បានដាក់ឱ្យដំណើរការសាកល្បងនូវគម្រោងដឹកជញ្ជូនសាធារណៈប្រើប្រាស់រថយន្តក្រុងចំនួន ១៥គ្រឿង ដែលចេញដំណើរទៅមក ពីក្រុងសៀមរាប ទៅក្រុងរុនតាឯកតេជោសែនផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
