នៅព្រឹកថ្ងៃទី២៣ ខែមីនា ឆ្នាំ២០២៥នេះ លេខាធិការដ្ឋានជាតិកម្ពុជាសម្រាប់កិច្ចសហប្រតិបត្តិការមេគង្គ-ឡានឆាង បានការគាំទ្រពីស្ថានទូតនៃសាធារណរដ្ឋប្រជាមានិតចិនប្រចាំទីក្រុងភ្នំពេញ បានរៀបចំកម្មវិធីទិវារត់កម្សាន្តអបអរសាទរ សប្តាហ៍នៃកិច្ចសហប្រតិបត្តិការមេគង្គ-ឡានឆាងឆ្នាំ២០២៥ (MLC Week Fun Run 2025) ដើម្បីកៀងងគរថវិកាជូនដល់មន្ទីរពេទ្យគន្ធបុប្ផា និងដើម្បីមិត្តភាព សាមគ្គីភាព តាមរយៈស្មារតីកីឡាក្នុងចំណោមបណ្តាប្រទេសសមាជិក ដោយមានប្រតិភូ និងអ្នកចូលរួមប្រមាណ ៥០០នាក់។
ឯកឧត្តមបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មាធិការផ្តល់យោបល់លើគោលនយោបាយពាណិជ្ជកម្ម បានចាត់ទុកព្រឹត្តិការណ៍នេះ ថាជាអត្តសញ្ញាណមួយនៃបណ្តាប្រទេសសមាជិកមេគង្គ-ឡានឆាង ដែលមានគោលបំណងជំរុញមិត្តភាព និងសាមគ្គីភាព ក្នុងចំណោមប្រទេសសមាជិក ក៏ដូចជាលើកកម្ពស់ការយល់ដឹងអំពីសារៈសំខាន់នៃក្របខណ្ឌកិច្ចសហប្រតិបត្តិការមេគង្គ-ឡានឆាង ដល់សាធារណជនគ្រប់រូប។
ឯកឧត្តមបណ្ឌិតមានប្រសាសន៍ថា កម្មវិធីនេះមិនមែនត្រឹមតែជាសក្ខីភាពនៃភាពជោគជ័យរួមគ្នា និងសមិទ្ធផលដ៏ធំធេងនៃភាពជាដៃគូប្រកបដោយបរិយាបន្ននៅក្នុងក្របខណ្ឌមេគង្គ-ឡានឆាងប៉ុណ្ណោះទេ ប៉ុន្តែនេះជាឱកាសដ៏ល្អមួយ ដើម្បីលើកកម្ពស់ការផ្លាស់ប្តូររវាងប្រជាជន និងប្រជាជន មិត្តភាព និងសាមគ្គីភាពតាមរយៈស្មារតីកីឡាក្នុងចំណោមបណ្តាប្រទេសសមាជិកមេគង្គ-ឡានឆាងទាំងអស់។
ព័ត៌មានជាតិ ថ្មីៗ
ឯកឧត្តមក៏បានបង្ហាញនូវភាពជឿជាក់ថា ព្រឹត្តិការណ៍នាឆ្នាំនេះ នឹងធ្វើឱ្យចំណងសាមគ្គីភាព កិច្ចសហប្រតិបត្តិការ និងមិត្តភាពរវាងប្រទេសមេគង្គ-ឡានឆាងកាន់តែមានភាពរឹងមាំ ហើយកិច្ចសហប្រតិបត្តិការនេះ នឹងនៅតែបន្តជាវេទិកាអនុតំបន់ពាក់ព័ន្ធមួយ ដើម្បីគាំទ្រពហុភាគីនិយម និងដោះស្រាយនូវតម្រូវ ការចាំបាច់របស់ប្រទេសសមាជិកមេគង្គ-ឡានឆាង តាមរយៈមូលនិធិពិសេសមេគង្គ-ឡានឆាង។
សូមជម្រាបថា តាមរយៈព្រឹត្តិការណ៍នេះ ប្រមូលបានថវិកាចំនួន ៧ ៦៨២ដុល្លារ ហើយឯកឧត្តមបណ្ឌិតសភាចារ្យ សុក ស៊ីផាន់ណា និងថ្នាក់ដឹកនាំគណៈប្រតិភូ បាននាំយកថវិកាប្រគល់ជូនដល់នាយកមន្ទីរពេទ្យគន្ធបុប្ផាសៀមរាបផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
