អាជ្ញាធរខេត្តសៀមរាប បានណែនាំឱ្យស្រុកចំនួន៣ រួមមានស្រុកក្រឡាញ់ ស្រុកពួក និងស្រុកអង្គរជុំ ត្រៀមរៀបចំវេទិកាផ្សព្វផ្សាយ ស្ដីពីឱកាសទទួលបានការងារ និងការបណ្ដុះបណ្ដាលជំនាញវិជ្ជាជីវៈ ជូនដល់បងប្អូនប្រជាពលរដ្ឋ យុវជនក្រុមគោលដៅ ជាពិសេសអ្នកដែលទើបត្រឡប់មកពីប្រទេសថៃ តាមរយៈកិច្ចសហការជាមួយវិទ្យាស្ថានជាតិពហុបច្ចេកទេសអង្គរ វិទ្យាស្ថានពហុបច្ចេកទេសភូមិភាគតេជោសែន និងមជ្ឈមណ្ឌលការងារខេត្ត ក្នុងន័យដើម្បីជំរុញឱកាសការងារឱ្យកាន់តែកៀកពួកគាត់។
ក្នុងកិច្ចប្រជុំផ្សព្វផ្សាយឱកាសការងារ និងបណ្ដុះបណ្ដាលជំនាញវិជ្ជាជីវៈដល់បងប្អូនប្រជាពលរដ្ឋ និងជ្រើសរើសកម្លាំងពលកម្មសម្រាប់សហគ្រាស គ្រឹះស្ថានដែលកំពុងមានតម្រូវការកម្លាំងពលកម្ម នៅថ្ងៃទី៨ ខែកក្កដា ឆ្នាំ២០២៥នេះ លោក ឌី រ៉ាដូ អភិបាលរងខេត្ត បានបង្ហាញថា គិតចាប់ពីថ្ងៃទី១៦ ខែមិថុនា ដល់ថ្ងៃទី៧ ខែកក្កដានេះ មានប្រជាពលរដ្ឋត្រឡប់មកពីប្រទេសថៃ ចូលមកខេត្តសៀមរាប មានចំនួនសរុប ៥ ៧៥៤នាក់ ហើយបច្ចុប្បន្នក្រុមការងារខេត្ត កំពុងសម្របសម្រួលបងប្អូនប្រជាពលរដ្ឋក្នុងការដឹកជញ្ជូន ពីតាមច្រកព្រំដែនរហូតដល់គេហដ្ឋាន។
ព័ត៌មានជាតិ ថ្មីៗ
លោក ឌី រ៉ាដូ បានឱ្យដឹងថា គិតមកទល់ពេលនេះ អាជ្ញាធរខេត្ត អង្គការដៃគូរ រួមនឹងស្ថាប័នផ្សេងៗ ក៏បានត្រៀមខ្លួនរួចជាស្រេចក្នុងការជួយសម្របសម្រួលស្វែងរកការងារ និងផ្ដល់ជំនាញវិជ្ជាជីវៈមួយដែលសមស្រប ជូនដល់បងប្អូនពលករយើងដែលទើបត្រឡប់មកពីក្រៅប្រទេស តាមរយៈការចែកខិត្តប័ណ្ណ និងផ្ដល់ព័ត៌មានការងារជូនពួកគាត់ទាំងនៅច្រកព្រំដែន និងនៅខេត្តសៀមរាប ធ្វើយ៉ាងណាមានភាពងាយស្រួលក្នុងការរកបានការងារពេលមកដល់ស្រុកកំណើតវិញ។
លោកអភិបាលរងខេត្ត បន្តថា ក្នុងន័យបង្កភាពងាយស្រួលក្នុងការជំរុញឱកាសការងារ ឱ្យកាន់តែកៀកប្រជាពលរដ្ឋ លោកបានណែនាំដល់បណ្ដាស្រុកគោលដៅខាងលើ ត្រៀមសហការរៀបចំវេទិកាផ្សព្វផ្សាយពីឱកាសទទួលបានការងារ និងការបណ្ដុះបណ្ដាលជំនាញវិជ្ជាជីវៈ ជូនដល់ពួកគាត់ឱ្យកាន់តែច្បាស់ និងងាយស្រួល ជំរុញអ្នកមានជំនាញឱ្យឆាប់ទទួលបានការងារធ្វើ និងអ្នកដែលចង់ចាប់ជំនាញងាកមកសិក្សាជំនាញមួយដែលច្បាស់លាស់សម្រាប់ជួយដល់សេដ្ឋកិច្ចគ្រួសារ៕
អត្ថបទ និងរូបភាព៖ លោក អ៊ុន ណារាជ្យ
