ដោយមានកំហឹងខ្លាំង ចំពោះទណ្ឌកម្មសហរដ្ឋអាមេរិក លើប្រេងឆៅ ប្រទេសអ៊ីរ៉ង់ នាពេលថ្មីៗនេះ តាមសេចក្តីរាយការណ៍ បានបែរទៅរក ការនាំចេញប្រេងសាំង និងឧស្ម័នធម្មជាតិ ក្នុងគោលបំណងជំរុញបង្កើន សន្ទុះសេដ្ឋកិច្ចរបស់ខ្លួន ។
យោងតាមសេចក្តី រាយការណ៍មួយ ដែលចេញផ្សាយដោយទីភ្នាក់ងារ សារព័ត៌មាន UPI នៅថ្ងៃទី៣០ ខែកក្កដា ឆ្នាំ២០១៩ បានឲ្យដឹងថា ប្រទេសអ៊ីរ៉ង់បានប្រកាសនៅថ្ងៃចន្ទម្សិលមិញនេះថា ខ្លួននឹងនាំចេញប្រេងសាំង ១ម៉ឺនតោន ទៅប្រទេសអាហ្វហ្គានីស្ថាន ហើយនេះគឺជាលើកទីមួយ ដែលប្រទេសនេះ លក់ប្រេងសាំងទៅឲ្យប្រទេសដទៃ ។
គួរបញ្ជាក់ថា សមត្ថភាពចម្រាញ់ប្រេង របស់ប្រទេសអ៊ីរ៉ង់ នាពេលថ្មីៗនេះ បានកើនឡើង ស្របពេលដែលប្រទេសនេះ បានក្លាយជា មានឯករាជ្យផ្នែកថាមពលកាន់តែខ្លាំង ហើយពីមុនសហរដ្ឋអាមេរិក បានដាក់ទណ្ឌកម្មលើការនាំចូលប្រេងសាំងរបស់ប្រទេសអ៊ីរ៉ង់ ប៉ុន្តែបានលើកលែងវិញ នៅពេលមានកិច្ចព្រមព្រៀងនុយក្លេអ៊ែឆ្នាំ២០១៥ ក្រោមរដ្ឋបាលរបស់លោក បារ៉ាក់ អូបាម៉ា៕
ប្រែសម្រួល៖ប៉ាង កុង
