របាយការណ៍ ប្រព័ន្ធផ្សព្វផ្សាយ ក្នុងស្រុកបានឲ្យដឹងថា ប្រទេសជប៉ុន បានធ្វើការតវ៉ាយ៉ាងខ្លាំង បន្ទាប់ពីប្រទេសកូរ៉េខាងជើង បានបាញ់មីស៊ីលរបស់ខ្លួន នៅពេលដែលខ្លួនមើលឃើញថា វាជាការរំលោភលើដំណោះស្រាយ របស់ក្រុមប្រឹក្សាសន្តិសុខរបស់អង្គការសហប្រជាជាតិ។
ទីភ្នាក់ងារសារព័ត៌មានក្យូដូបានចុះផ្សាយថា ទីក្រុងតូក្យូបានធ្វើការតវ៉ា ទៅកាន់ប្រទេសកូរ៉េខាងជើង តាមរយៈបណ្តាញការទូតមួយនៅក្នុងទីក្រុងប៉េកាំង ពាក់ព័ន្ធនឹងករណីនេះ កាលពីសប្តាហ៍មុន។
សូមជម្រាបថា កាលពីថ្ងៃព្រហស្បតិ៍សប្ដាហ៍មុន ប្រទេសកូរ៉េខាងជើងបានបាញ់មីស៊ីលចំនួន ២ គ្រាប់ពីឆ្នេរខាងកើតរបស់ខ្លួន ចូលទៅសមុទ្រខាងកើត ដែលជាការព្រមាន ដល់ប្រទេសកូរ៉េខាងត្បូង ចំពោះការធ្វើសមយុទ្ធយោធារួមគ្នា ជាមួយសហរដ្ឋអាមេរិក និងការទិញអាវុធពីសហរដ្ឋអាមេរិក។
ទីក្រុងសេអ៊ូលបានសម្តែងនូវ“ ក្តីបារម្ភយ៉ាងខ្លាំង” ចំពោះការបាញ់មីស៊ីលរបស់កូរ៉េខាងជើង ដែលត្រូវបានគេជឿជាក់ថា ជាប្រភេទមីស៊ីលផ្លោងរយៈចម្ងាយខ្លីប្រភេទថ្មី ដែលកូរ៉េខាងជើងត្រូវបានហាមឃាត់មិនឱ្យប្រើប្រាស់បច្ចេកវិទ្យាមីសីលផ្លោងនេះ ក្រោមដំណោះស្រាយ របស់អង្គការសហប្រជាជាតិ៕
ដោយ ឈូក បូរ៉ា
