នៅព្រឹកថ្ងៃទី៣១ ខែកក្កដា ឆ្នាំ២០១៩នេះ លោកស្រី យូ សុភា អភិបាលរងខេត្ត និង ជាប្រធានលេខាធិការដ្ឋាន នៃគណៈ កម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានដឹកនាំក្រុមការងារ ចុះសួរសុខទុក្ខ និង នាំយកថវិកាចំនួន ៦០ម៉ឺនរៀល រួមនឹងទឹកដោះគោចំនួន០១កេស ដែលបានមកក្រុមការងាររបស់លេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្ស មន្ត្រីសាលាខេត្ត និងអង្គការដៃគូពាក់ព័ន្ធ ជូនដល់ស្ត្រីដែល រគ្រោះដោយអំពើហិង្សាក្នុងគ្រួសារ ដែលកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប ។
លោកស្រី យូ សុភា មានប្រសាសន៍ថា នេះមិនមែនជាលើកទី១ទេ ដែលក្រុមការងារបានមកសួរសុខទុក្ខជនរងគ្រោះនោះ គឺក្រុមការងារបានអញ្ជើញមកជាបន្តបន្ទាប់ ចាប់តាំងពីថ្ងៃកើតហេតុ ហើយក៏មានតំណាងក្រុមការងារ ក៏ដូចជាអង្គការដៃគូ ពិសេសអង្គការលីកាដូរ , មន្ទីរកិច្ចការនារីខេត្ត , មន្ទីរសង្គមកិច្ចនិងយុវនីតិសម្បទាខេត្ត , ស្នងការដ្ឋាននគរបាលខេត្ត និងអាជ្ញាធរស្រុកស្វាយលើ ហើយនៅក្នុងឱកាសនេះ សូមថ្លែងអំណរគុណចំពោះក្រុមគ្រូពេទ្យទាំងអស់ដែលតែងតែសហការ យកចិត្តទុកដាក់ពោះអ្នកជំងឺទូទៅ ទាំងកម្លាំងកាយចិត្ត ពិសេសស្ត្រីដែលរងគ្រោះដោយអំពើហិង្សាខាងលើ និង អំណរគុណដល់ក្រុមការងារ និងអង្គការដៃគូទាំងអស់ ដែលតែងតែចូលរួមឧបត្ថម្ភជាថវិកា សម្ភារ និងវេលាក្នុងការចុះមកសួរសុខទុក្ខ ដល់ជនរងគ្រោះ ដែលជាការបង្ហាញអំពីការយកចិត្តដាក់ខ្ពស់ ការចែករំលែក ក្នុងពេលមានអាសន្ន ក្នុងនាមជាប្រជាពលរដ្ឋខ្មែរតែមួយ ។
សូមបញ្ជាក់ថា ករណីអំពើហិង្សាក្នុងគ្រួសារនេះ បានកើតឡើងកាលពីថ្ងៃទី១៦ ខែមិថុនា ឆ្នាំ២០១៩ នៅភូមិសង្កែរឡាក់ ឃុំខ្នងភ្នំ ស្រុកស្វាយលើ ដោយស្ត្រីរងគ្រោះជាប្រពន្ធ ត្រូវបានជនង្ស័យជាប្តីកាប់ចំនួន០២ខ្វែវ ចំក្បាលធ្វើឲ្យរងរបួសធ្ងន់ធ្ងរ បច្ចុប្បន្នស្ត្រីរងគ្រោះឈ្មោះ ង៉ោ លាំ អាយុ៣៨ឆ្នាំ កំពុងសម្រាកព្យាបាលជំងឺ នៅមន្ទីរពេទ្យបង្អែកខេត្តសៀមរាប ដោយមានការយកចិត្តទុកខ្ពស់ពីសំណាកគ្រូពេទ្យផងដែរ ៕
អត្ថបទ និង រូបថត ៖ ក្រុមការងារលេខាធិការដ្ឋានប្រយុទ្ធប្រឆាំងអំពើជួញដូរមនុស្សខេត្តសៀមរាប
កែសម្រួលអត្ថបទ ៖ លោក លីវ សាន្ដ
