ក្នុងជំនួបរវាងថ្នាក់ដឹកនាំខេត្តសៀមរាប និងប្រតិភូសភាពាណិជ្ជកម្មខេត្តហ្វូចៀន នៃសាធារណរដ្ឋប្រជាមានិតចិន នារសៀលថ្ងៃទី ៣០ ខែ កក្កដា ឆ្នាំ២០១៩ នៅសាលាខេត្តសៀមរាប អ្នកវិនិយោគចិនបានចាប់អារម្មណ៍ទៅលើវិស័យទេសចរណ៍ និង ការកែច្នៃកាកសំណល់សំរាម ទៅជាថាមពលអគ្គិសនី ។
មានប្រសាសន៍ក្នុងជំនួបនេះ អ្នកស្រី ហ័ង តាឆីង (Huang Danqing) ប្រធានសភាពាណិជ្ជកម្ម និង ជាប្រធានក្រុមហ៊ុន រុងហួយ ហ្វូចៀន គ្រុប (Ronghui Fujian Group Co.,Ltd) បានបញ្ជាក់ថា លោកស្រី បានចាប់អារម្មណ៍ ទៅលើការរីកចម្រើនខេត្តសៀមរាប ដែលជាខេត្តដ៏មានសក្តានុពលលើវិស័យទេសចរណ៍ ក្នុងឱកាសនេះ អ្នកស្រី ក៏បានដឹកនាំសមាជិកប្រតិភូស្ត្រី និងជាប្រធានក្រុមហ៊ុន ចំនួន ២២ មកធ្វើការសិក្សាស្វែងយល់អំពី អំពីស្ថាភាព ភូមិសាស្ត្រ និង សក្តានុពលរបស់ខេត្តមួយនេះ ក្នុងគោលដៅធ្វើជាដៃគូរ ក្នុងវិស័យពាណិជ្ជកម្មរវាងប្រទេសទាំងពីរផងដែរ។
ឆ្លៀតក្នុងឱកាសនោះ អ្នកស្រី ហ័ង តាឆីង បានអញ្ជើញ ឯកឧត្តម អភិបាលខេត្តសៀមរាប ទៅបំពេញទស្សនកិច្ចនៅ ខេត្តហ្វូចៀន និងសិក្សាអំពីបច្ចេកទេស ក្នុងការកែច្នៃសំរាមធ្វើជាថាមពលអគ្គិសនី ដោយអ្នកស្រីបានបញ្ជាក់ថា ក្នុងមួយថ្ងៃ អ្នកបច្ចេកទេសនៅទីនោះ បំលែងសំរាម ៨០០តោន ទៅជាថាមពលអគ្គិសនី ហើយក្នុង១តោនសំរាមផលិតថាមពលបាន ១៥០គីឡូវ៉ាត ។
ជាការបញ្ជាក់បន្ថែមពីសក្ដានុពលរបស់ខេត្ត ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា ការរីកចម្រើនវិស័យទេសចរណ៍ក្នុងខេត្តសៀមរាប បានទាក់ទាញភ្ញៀវទេសចរណ៍មានការកើនឡើងជារៀងរាល់ឆ្នាំ ក្នុងនោះភ្ញៀវទេសចរណ៍ចិនស្ថិតក្នុងលំដាប់លេខ១។ ក្រៅពីសក្តានុពលនៃតំបន់ប្រាសាទបុរាណ ខេត្តមួយនេះក៏បានរៀបចំតំបន់រមណីយដ្ឋានធម្មជាតិ អេកូទេសចរណ៍ធម្មជាតិ និង កសិទេសចរណ៍ ដើម្បីពន្យារការស្នាក់នៅរបស់ភ្ញៀវទេសចរឲ្យមានរយៈពេលវែង។ ដោយឡែក នៅក្នុងពិធីបុណ្យសំខាន់ៗថ្នាក់ជាតិ និងអន្តរជាតិ បន្ទប់ស្នាក់ប្រមាណ ១ម៉ឺនបន្ទប់ នៅតែមិនទាន់បំពេញតម្រូវការរបស់ភ្ញៀវទេសចរជាតិ និងអន្តរជាតិបាននៅឡើយ។
ឯកឧត្តមអភិបាលខេត្ត ក៏បានថ្លែងអំណរគុណចំពោះគណៈប្រតិភូ ដែលចំណាយពេលមកសិក្សាស្វែងយល់ពីសក្តានុពលវិនិយោគនៅខេត្តសៀមរាប និងស្វាគមន៍ដល់សហគ្រិនទាំងឡាយ ដែលមានបំណងមកវិនិយោគទុននៅខេត្តប្រវត្តិសាស្ត្រមួយនេះ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
