នៅព្រឹកថ្ងៃទី៣១ ខែកក្កដា ឆ្នាំ២០១៩នេះ មន្ត្រីការិយាល័យការពារផ្លូវច្បាប់នៃមន្ទីរកិច្ចការនារីខេត្ត សហការជាមួយរដ្ឋបាលសាលាស្រុកជីក្រែង បានរៀបចំធ្វើវេទិកាផ្សព្វផ្សាយ “ អនុសញ្ញាស្ដីពី ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ” ដល់អាជ្ញាធរ និងប្រជាពលរដ្ឋនៅក្នុងឃុំពង្រក្រោម ស្រុកជីក្រែង ក្រោមអធិបតីភាព លោកស្រី ងិន សារិន អនុប្រធានមន្ទីរកិច្ចការនារីខេត្តសៀមរាប លោក តេង វណ្ណា ជំទប់ទី១ឃុំពង្រក្រោម និងលោក គឹម ធី នាយប៉ុស្តិ៍រដ្ឋបាលពង្រក្រោម ក្រុមប្រឹក្សាឃុំ អ្នកទទួលបន្ទុកកិច្ចការស្ត្រី និងកុមារឃុំ ជំនួយការឃុំ មេភូមិ អនុភូមិ ប្រជាការពារភូមិ និងប្រជាពលរដ្ឋមកពីគ្រប់ភូមិនៅក្នុងឃុំពង្រក្រោម សរុប ១១១ នាក់ ក្នុងនោះស្រី ៥៨ នាក់ ។
តាមការឲ្យដឹងពី លោកស្រី ងិន សារិន អនុប្រធានមន្ទីរកិច្ចការនារីខេត្ត លោកបានមានប្រសាសន៍ គោលបំណងនៃវេទិការនៅថ្ងៃនេះគឺដើម្បីបង្កើនការយល់ដឹងអំពីអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ) ដើម្បីផ្តល់ការធានានូវការទទួលបានសិទ្ធិមនុស្ស និងសេរីភាពជាមូលដ្ឋាន ដោយស្មើភាពគ្នាជាមួយបុរស ហើយអនុសញ្ញាស៊ី-ដ ជាអនុសញ្ញាអន្តរជាតិ ជាសិទ្ធិស្ត្រីពិសេសមួយដោយឡែក ដែលធ្វើឱ្យស្ត្រីទទួលបានសិទ្ធិពេញលេញនៅក្នុងសកលលោក ក៏ដូចនៅក្នុងប្រទេសកម្ពុជា ។
លោកស្រីបន្តថា ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ) ជាមូយដ្ឋានគ្រិះក្នុងការទទួលបានសមភាពពេញលេញ ការមិនរើសអើង និងកាតព្វកិច្ចរបស់រដ្ឋភាគីក្នុងការធានាសិទ្ធិស្ត្រី អនុសញ្ញាស៊ី-ដ បានចូលជាធរមាននៅថ្ងៃទី៣ ខែកញ្ញា ឆ្នាំ១៩៨១ បច្ចុប្បន្នមានរដ្ឋភាគីចំនួន១៨៥ ដែលបានចុះហត្ថលេខា និងផ្ដល់សច្ចាប័ន បានយកអនុសញ្ញានេះទៅអនុវត្ត នៅក្នុងនោះប្រទេសកម្ពុជា បានចុះហត្ថលេខានៅថ្ងៃទី២២ ខែកញ្ញា ឆ្នាំ១៩៩២ ហើយផ្ដល់សច្ចាប័ននៅថ្ងៃទី១៥ ខែតុលា ឆ្នាំ១៩៩២ យកមកអនុវត្តដោយឥតលក្ខខណ្ឌ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល ៖អ៊ុន ណារាជ្យ
