សមត្ថកិច្ចនគរបាលខេត្តសៀមរាប បានឲ្យដឹងថា កាលពីថ្ងៃទី៣១ ខែកក្កដា ឆ្នាំ២០១៩ ម្សិលមិញនេះ មនុស្សចំនួន៣នាក់ ដែលជាប់សង្ស័យពាក់ព័ន្ធនឹងករណីគ្រឿងញៀន រួមទាំងវត្ថុតាង ត្រូវបាននគរបាលប្រឆាំងគ្រឿងញៀនខេត្តសៀមរាប បញ្ជូនខ្លួនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ បន្ទាប់ពីកម្លាំងការិយាល័យប្រឆាំងគ្រឿងញៀនខេត្តសៀមរាប សហការជាមួយកម្លាំងអធិការដ្ឋាននគរបាលស្រុកពួក និងកម្លាំងអធិការដ្ឋាននគរបាលក្រុងសៀមរាប ចុះបង្ក្រាបបទរក្សាទុក ជួញដូរ ចាត់ ចែងនិង ប្រើប្រាស់ដោយខុសច្បាប់នូវសារធាតុញៀន នៅចំនុចបន្ទប់ ជួលភូមិចុងកៅស៊ូ សង្កាត់ស្លក្រាម ក្រុងសៀមរាប និង នៅភូមិអូរតាប្រាក់ ឃុំពួក ស្រុកពួក កាលពីវេលាម៉ោង០៩និង៤០នាទី នាថ្ងៃទី៣០ ខែកក្កដា ឆ្នាំ២០១៩ ។
ឃាត់ខ្លួនជនសង្ស័យទាំង០៣នាក់នេះ រួមមាន ៖ ១- ឈ្មោះ ហូ វ៉ៃ ភេទប្រុស ឆ្នាំកំណើត១៩៩១ មុខរបរលក់ទូរស័ព្ទដៃ មានទីលំនៅភូមិកំពង់តាយ៉ង ឃុំពួក ស្រុកពួក ជាប់សង្ស័យពាក់ព័ន្ធនឹងករណីរក្សាទុកជួញដូរ និងប្រើប្រាស់ ហើយមានសារធាតុញៀនក្នុងខ្លួន , ២- ឈ្មោះ ស្រ៊ុយ ហោ ភេទប្រុស ឆ្នាំកំណើត១៩៨២ មុខរបរលក់ការ៉េម មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ជាប់សង្ស័យពាក់ព័ន្ធនឹងករណីចាត់ចែងនិងប្រើប្រាស់ ហើយមានសារធាតុ ញៀនក្នុងខ្លួន និង ៣- ឈ្មោះ ស៊ុន ដារិទ្ធ ភេទប្រុស ឆ្នាំកំណើត១៩៩៤ មុខរបរគ្មាន មានទីលំនៅភូមិខ្នារ សង្កាត់ជ្រាវ ក្រុងសៀមរាប ជាប់សង្ស័យពាក់ព័ន្ធនឹងករណីរក្សាទុកនិងប្រើប្រាស់ ហើយមានសារធាតុញៀនក្នុងខ្លួន។
ក្នុងប្រតិបត្តិការនេះ កងកម្លាំងនគរបាលជំនាញ បានដកហូតវត្ថុតាងមានម្សៅមេតំហ្វេតាមីន ប្រភេទទឹកកក ចំនួន០១កញ្ចប់ ស្មើនឹងទំងន់១,៩ក្រាមទាំងសំបក , ទូរស័ព្ទដៃចំនួន០៣គ្រឿង , ឧបករណ៍ប្រើប្រាស់គ្រឿងញៀនមួយចំនួន៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
