លោក Sim Tze Tzin អនុរដ្ឋមន្ត្រីក្រសួងកសិកម្ម និងឧស្សាហកម្ម ម៉ាឡេស៊ី មានប្រសាសន៍ថា រដ្ឋាភិបាលនឹងមិនអនុញ្ញាតឱ្យនាំចូលម្ទេសក្រហម ពីប្រទេសវៀតណាមទៀតឡើយ រហូតដល់ចុងឆ្នាំនេះ ។
លោកបាននិយាយថា នេះគឺដោយសារតែសំណាកម្ទេសក្រហមពីប្រទេសវៀតណាម ត្រូវបានគេរកឃើញថា មានដែនកំណត់សំណល់ អតិបរមា (MRL) ដែលលើសពីកម្រិតដែលបានអនុញ្ញាត។
យោងតាមសារព័ត៌មាន New Straits Times ចេញផ្សាយកាលពីដើមសប្ដាហ៍នេះ បានឱ្យដឹងថា ក្រសួងបានធ្វើការ ជូនដំណឹងទៅអាជ្ញាធរវៀតណាម ឱ្យចាត់វិធានការសមស្រប និងរាយការណ៍ ពីវិធានការបង្ការ ដែលនឹងត្រូវអនុវត្ត ដើម្បីធ្វើឲ្យប្រទេសម៉ាឡេស៊ី ដកការហាមឃាត់ នៃការនាំចូលនេះវិញ។
ក្រសួងក៏បានកំណត់ លក្ខខណ្ឌអនាម័យ និងជីគីមី សម្រាប់ការនាំចូលម្ទេស ស្រស់ពីប្រទេសវៀតណាម ដូចជាតម្រូវឱ្យមាន វិញ្ញាបនប័ត្រ សម្រាប់ការអនុវត្តកសិកម្មល្អ និងជំរុញការដាំ និងផលិតម្ទេសក្នុងស្រុក ដែលគ្មានថ្នាំសម្លាប់សត្វល្អិត និងមានគុណភាពល្អ ដើម្បីឆ្លើយតបនឹងតម្រូវការ ក្នុងស្រុក។
លោកបាននិយាយថា ក្រសួងតាមរយៈ នាយកដ្ឋានសេវាកម្ម អធិការកិច្ច និងធានា ម៉ាឡេស៊ី (Maqis) កំពុងត្រួតពិនិត្យជានិច្ច នូវការនាំចូលផលិតផល កសិកម្ម ជាពិសេសពី ប្រទេសវៀតណាម៕
ប្រភព៖ដើមអំពិល
ប្រែសម្រួលៈ ណៃ តុលា
