លោក នង វុត្ថា នាយកសាលាអន្តរជាតិ ALA មានប្រសាសន៍ថា ការវិនិយោគលើវិស័យអប់រំ បើកបង្រៀនសិស្ស បើមានឆន្ទៈថា វាមិនមែនជាការធ្វើមុខជំនួញនោះ ទើបអាចបម្រើឲ្យវិស័យអប់រំបាន ដែលស្ថិតក្រោមគោលនយោបាយរបស់រាជរដ្ឋាភិបាល គឺអប់រំដើម្បីទាំងអស់គ្នា ទាំងអស់គ្នាដើម្បីវិស័យអប់រំ ព្រោះថាការបង្រៀនក្មេងតូចៗ វាមានសារៈសំខាន់ខ្លាំងណាស់ក្នុងការកសាងគ្រឹះនៃសមត្ថភាពសិក្សារបស់សិស្ស ដែលទាមទារឲ្យមានការជ្រើសរើសសាលានិងគ្រូបង្រៀនប្រកបដោយគុណភាព ដើម្បីឆ្ពោះទៅអនាគតប្រកបដោយផ្លែផ្កា លើការកសាងធនធានមនុស្ស ហើយការបង្រៀនសិស្សប្រកបដោយគុណភាព វាមិនត្រឹមតែជាការកសាងអនាគតល្អសម្រាប់សិស្សប៉ុណ្ណោះទេ តែគឺជាការកសាងធនធានពលរដ្ឋល្អ និង មានអត្ថន័យធំធេងជាងនេះ គឺសង្គមជាតិទទួលបានធនធានមនុស្សពិតប្រាកដ ដើម្បីចូលរួមអភិវឌ្ឍប្រទេសរបស់ខ្លួន ។
លោកនាយកសាលាបានបញ្ជាក់ទៀតថា សាលាអន្តរជាតិ ALA បានបំពេញនូវលក្ខខណ្ឌការងារគតិយុត្តិ បានបំពេញលក្ខណវិនិច្ឆ័យនិងគុណវឌ្ឍន៍ ដែលតម្រូវដោយក្រសួងអប់រំយុវជននិងកីឡា ហើយសាលាបានទទួលអាជ្ញាបណ្ណទាំងកម្មវិធីសិក្សាជាតិ និងកម្មវិធីសិក្សាអន្តរជាតិដោយគ្មានអណត្តិ ដែលនេះ គឺដោយសារសាលា មានសកម្មភាពប្រកបដោយគុណវឌ្ឍន៍ បំពេញបានស្របតាមគោលនយោបាយរបស់ក្រសួង និងគោលនយោបាលរបស់រាជរដ្ឋាភិបាល ដោយមានកិច្ចសហការជាមួយការិយាល័យអប់រំក្រុង និង មន្ទីអប់រំយុវជននិងកីឡាខេត្ត ហើយលោកពិតជាមានមោទនភាពក្រៃលែង ដែលអាណាព្យាបាល មាតាបិតាសិស្ស បានរួមសហការ និងផ្តល់ជំនឿទុកចិត្តចំពោះគុណភាពអប់រំរបស់សាលាអន្តរជាតិ ALA ។
លោក នង វុត្ថា មានប្រសាសន៍បែបនេះ ក្នុងឱកាសប្រគល់ប័ណ្ណសរសើរដល់សិស្សពូកែ និង ចែកជូនរង្វាន់លើកទឹកចិត្តដល់សិស្សមួយចំនួនទៀត របស់សាលាអន្តរជាតិ ALA កាលពីពេលថ្មីៗនេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
ព័ត៌មានជាតិ ថ្មីៗ
