ទូរទស្សន៍CNN ចេញផ្សាយនៅថ្ងៃទី១៤ ខែសីហានេះថា ក្នុងស្ថានភាពកំពុងបន្តវឹកវរ នៅឡើយ ក្នុងទីក្រុងហុងកុង មន្ត្រីចិន បានធ្វើការច្រានចោលសំណើ របស់អាមេរិក ដែលសុំធ្វើការចូលចតនាវាកងទ័ពជើងទឹកអាមេរិកចំនួន ២ គ្រឿង ក្នុងដំណើរទស្សនកិច្ចនៅកំពង់ផែទីក្រុងមួយនេះ នាប៉ុន្មានសប្តាហ៍ខាងមុខនេះ ។
លោក Nate Christensen អ្នកនាំពាក្យ នៃកងនាវាចរប៉ាស៊ីហ្វិក របស់កងនាវាចរ អាមេរិកបានប្រាប់ទូរទស្សន៍ CNN ថា រដ្ឋាភិបាលចិនបានបដិសេធ សំណើសម្រាប់ការធ្វើទស្សនកិច្ច ទៅកាន់ទីក្រុងកំពង់ផែហុងកុង ដោយនាវា ប្រភេទUSS Green Bay និង USS Lake Erie ដែលគ្រោងនឹងមកដល់ នៅប៉ុន្មានសប្តាហ៍ខាងមុខនេះ ។
គួរឲ្យដឹងដែរថាតាមអ្វី ដែលអាមេរិកចង់បាននោះ គឺនាវាចម្បាំង USS Green Bay ចង់ធ្វើដំណើរទៅដល់ទីក្រុងហុងកុង នាថ្ងៃទី១៧ខែសីហាខាងមុខ ខណៈដែលនាវាបំពាក់មីស៊ីល USS Lake Erie នឹងអាចទៅដល់ទីក្រុងនេះដែរ ក្នុងខែកញ្ញា ៕
ប្រភព៖ដើមអំពិល
ប្រែសម្រួល:ស៊ុនលី
