វគ្គបណ្តុះបណ្តាលជំនាញ នៃគម្រោងកម្មវិធីអភិវឌ្ឍជំនាញ ហៅកាត់ថា SDP ដែលគាំទ្រថវិកាដោយអង្គការស្វីស ខនថាក់ នៅវិទ្យាស្ថានពហុបច្ចេកទេសចំនួន២កន្លែង នៅខេត្តសៀមរាប ដែលមានសិក្ខាកាមចំនួន៦៧នាក់ ជាយុវជន យុវនារី ងាយរងគ្រោះ នៃសហគមន៍ជនបទរបស់ខេត្តព្រះវិហារ ក្នុងនោះសិក្ខាកាមដែលបានទទួលការសិក្សានៅវិទ្យាស្ថានជាតិពហុបច្ចេកទេសអង្គរ ចំនួន៣២នាក់ និង សិក្ខាកាមដែលបានទទួលការសិក្សានៅវិទ្យាស្ថានពហុបច្ចេកទេសភូមិភាគតេជោ សែន សៀមរាប មានចំនួន៣៥នាក់ បានប្រកាសបញ្ចប់វគ្គបណ្តុះបណ្តាលជាផ្លូវការហើយ កាលពីនារសៀលថ្ងៃទី១៤ ខែសីហា ឆ្នាំ២០១៩ ម្សិលមិញនេះ ក្រោមអធិបតីភាពលោក នាក់ ណេរ៉ុន អភិបាលរងខេត្តសៀមរាប ។
វគ្គបណ្តុះបណ្តាលជំនាញនេះ មានរយៈពេល៦ខែ ដោយចែកចេញជាពីរផ្នែកគឺ ១. ការបណ្តុះបណ្តាលជំនាញរយៈពេល៤ខែ នៅក្នុងមជ្ឈមណ្ឌល និង ២. ការចុះកម្មសិក្សាបន្ថែមរយៈពេល២ខែ ហើយជាមួយនឹងការបិទបញ្ចប់វគ្គបណ្ដុះបណ្ដាលនេះ សិក្ខាកាមទាំង៦៧នាក់ ក៏ទទួលបានវិញ្ញាបនបត្រវិជ្ជាជីវៈម្នាក់មួយ លើជំនាញតម្លើងបណ្តាញអគ្គីសនី , សេវាកម្មជួសជុលបរិក្ខាត្រជាក់ , ជំនាញតម្លើងបណ្តាញបំពង់ទឹក , ជំនាញបដិសណ្ឋារកិច្ច និង ធ្វើម្ហូប ហើយសិក្ខាកាមទាំងអស់ដែលបានចូលរៀនវគ្គបណ្តុះបណ្តាលនេះ ត្រូវតែមានការយល់ព្រមពីមាតាបិតា អាណាព្យាបាល និង ត្រូវទទួលដឹងឮពីសំណាក់អាជ្ញាធរមូលដ្ឋានគ្រប់លំដាប់ថ្នាក់ផងដែរ ។
សូមបញ្ជាក់ថា វិទ្យាស្ថានជាតិពហុបច្ចេកទេសអង្គរ និង វិទ្យាស្ថានពហុបច្ចេកទេសភូមិភាគតេជោ សែន សៀមរាប បានចុះហត្ថលេខាលើកិច្ចព្រមព្រៀង អនុស្សរណៈនៃការយោគយល់គ្នា ដែលហៅកាត់ថា M.O.U ស្តីពីការទទួលបណ្តុះបណ្តាលជំនាញសម្រាប់យុវជននៅជនបទនិងងាយរងគ្រោះ កាលពីដើមខែតុលា ឆ្នាំ២០១៨កន្លងមក ដែលនៅក្នុង M.O.U នោះ បានកំណត់យកខេត្តគោលដៅចំនួន៣ គឺខេត្តក្រចេះ ស្ទឹងត្រែង និងខេត្តព្រះវិហារ ។
សម្រាប់វគ្គសិក្សាជំនាញដែលបានបញ្ចប់ទៅនេះ គឺជំហានគោលដៅសម្រាប់ខេត្តព្រះវិហារ ដែលយុវជន-យុវនារី ជាសិក្ខាកាមទាំងអស់នោះ ត្រូវបានយកមកពីបណ្តាមូលដ្ឋានជនបទនៃស្រុករវៀង , ស្រុកសង្គមថ្មី , ស្រុកជ័យសែន , ស្រុកត្បែងមានជ័យ និង ស្រុកឆែប ។
មានប្រសាសន៍ក្នុងឱកាសបិទវគ្គបណ្ដុះបណ្ដាលនេះ លោក នាក់ ណេរុន អភិបាលរងខេត្តសៀមរាប បានថ្លែងនូវការគាំទ្រ ចំពោះការខិតខំប្រឹងប្រែងរបស់មន្ត្រី បុគ្គលិក គ្រូបណ្តុះបណ្តាលរបស់វិទ្យាស្ថានពហុបច្ចេកទេសទាំង២ រួមទាំងដៃគូសហការដទៃទៀតផងដែរ ដូចជាអង្គការស្វីស ខនថាក់ ប្រចាំកម្ពុជា បណ្តាក្រុមហ៊ុន-សហគ្រាស វិស័យឯកជនមួយចំនួនទៀត ដែលបានរួមចំណែកយ៉ាងធំធេងជួយដល់សិក្ខាកាម បើកវគ្គបណ្តុះបណ្តាលនេះ ។
លោក នាក់ ណេរុន ក៏បានសម្ដែងនូវការកោតសរសើរផងដែរ ចំពោះសិក្ខាកាមទាំងអស់ ដែលបានសម្រេចចិត្តដ៏ត្រឹមត្រូវ ដើរតាមគោលនយោបាយរបស់រាជរដ្ឋាភិបាល លើវិស័យអភិវឌ្ឍន៍ធនធានមនុស្ស ក្រេបជញ្ជក់យកចំណេះដឹង ផ្នែកមុខជំនាញវិជ្ជាជីវៈ ដើម្បីទៅប្រើប្រាស់ ប្រកបមុខរបរដោយខ្លួនឯង ដោះស្រាយជីវភាពគ្រួសារ បង្កើនសេដ្ឋកិច្ចសង្គម ដែលនេះគឺជាគំរូដ៏ល្អ ក្នុងនាមជាយុវជន បានប្រើប្រាស់ពេលវេលាដ៏មានតម្លៃ ឲ្យមានប្រយោជន៍សម្រាប់អនាគតរបស់ខ្លួន ស្របតាមទ្រឹស្តីដែលក្រសួងការងារ បានកំណត់ថា ជំនាញពិត ចំណូលខ្ពស់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
