ទីភ្នាក់ងារចិនស៊ិនហួ ចេញផ្សាយនៅថ្ងៃចន្ទ ទី១៩ ខែសីហាបានឲ្យដឹងថា រថយន្តដឹកជញ្ជូនទំនិញ ដែលមិនមានមនុស្សបើកបរ ប្រើប្រាស់បច្ចេកវិទ្យាអ៊ិនធឺណេតឥតខ្សែ 5G បានចាប់ផ្តើមដំណើរការហើយ នៅទីក្រុងណានជីងរដ្ឋធានី នៃខេត្តជាំងស៊ូភាគខាងកើតប្រទេសចិន កាលពីចុងសប្តាហ៍មុននេះ។
រថយន្តធុនតូចពណ៌ស ដែលមានកម្ពស់ប្រហែល ០.៥ម៉ែត្រ ត្រូវបានដាក់ដំណើរការនៅក្នុងតំបន់ Jiangbei New ដោយក្រុមហ៊ុន Suning ដឹកជញ្ជូនដែលជាក្រុមហ៊ុនបុត្រសម្ព័ន្ធ របស់ក្រុមហ៊ុនអេឡិចត្រូនិចយក្ស Suning ដើម្បីគាំទ្រដល់សេវាកម្មលក់រាយ បែបឆ្លាតវៃរបស់ក្រុមហ៊ុន។
តាមការបញ្ជាក់របស់លោក Ling Yunfei ប្រធានក្រុមហ៊ុនដឹកជញ្ជូននេះ បានបញ្ជាក់ដែរថា ការបើកបរដោយខ្លួនឯង របស់រថយន្តគ្មានមនុស្សបើកនេះ ត្រូវបានធ្វើឱ្យប្រសើរឡើងយ៉ាងខ្លាំង ដោយក្នុងនោះវាបានបច្ចុប្បន្ន មានសមត្ថភាពក្នុងឆ្លងកាត់ភ្លើង សញ្ញាចរាចរណ៍ដោយខ្លួនឯង និងល្បឿនលឿនជាងមុនជាមធ្យមពី៨ គីឡូម៉ែត្រក្នុងមួយម៉ោងទៅដល់ ១៥ គីឡូម៉ែត្រក្នុងមួយម៉ោង។ វាក៏អាចកំណត់ឃើញឧបសគ្គនៅចម្ងាយ ១០០ ម៉ែត្រ និងការចៀសចេញពីឧបសគ្គទាំងនោះផងដែរ ៕
ប្រភព៖ដើមអំពិល
ប្រែសម្រួល: ស៊ុន លី
