នាព្រឹកថ្ងៃទី២០ ខែសីហា ឆ្នាំ២០១៩ ក្រសួងផែនការ បានរៀបចំបើកវគ្គបណ្តុះបណ្តាលមួយ ស្តីពីការបញ្ជ្រាបយេនឌ័រ ក្នុងផែនការនិងសិ្ថតិ និង ផ្សព្វផ្សាយអនុសញ្ញា (ស៊ី.ដ) នៅមន្ទីរផែនការ ខេត្តសៀមរាប ដោយមានការចូលរួមពីសំណាក់លោក លោកស្រី ជាប្រធានមន្ទីរ អនុប្រធានមន្ទីរ មន្ត្រីរាជការនៃមន្ទីរផែនការ មកពីបណ្តាខេត្តជុំវិញបឹងទន្លេសាប ទាំង៩ខេត្ត សរុបចំនួន៦០នាក់ ក្រោមអធិបតីភាពឯកឧត្តម លេង ផាលី រដ្ឋលេខាធិការក្រសួងផែនការ និង លោកជំទាវ ហង់ លីណា ប្រតិភូរាជរដ្ឋាភិបាល ទទួលបន្ទុកអគ្គនាយកវិទ្យាស្ថានជាតិស្ថិតិ ។
លោកជំទាវ ហង់ លីណា បានបញ្ជាក់ថា ឆ្លងតាមការអនុវត្តអនុសញ្ញា(ស៊ី.ដ)ច្បាប់ជាតិ អនុសាសន៍ បទបញ្ជា និង វិធានការទាក់ទងការលើកកម្ពស់ស្ថានភាព តួនាទី សុខមាលភាពសង្គមស្ត្រីកម្ពុជា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ លើការកសាងសមត្ថភាពចំពោះមន្ត្រីរាជការជាស្ត្រី នៅថ្នាក់រដ្ឋបាលក្រោមជាតិ ដោយបានជំរុញឲ្យស្ត្រី ក្លាយជាអ្នកដឹកនាំ នៅថ្នាក់ខេត្ត ក្រុង ស្រុក ឃុំ សង្កាត់ ខណៈបច្ចុប្បន្ននេះ ស្ត្រីយើងក្លាយជាថ្នាក់ដឹកនាំ ចាប់ថ្នាក់រដ្ឋមន្ត្រី រដ្ឋលេខាធិការ អនុរដ្ឋលេខាធិការ អភិបាលខេត្ត អភិបាលស្រុក ថ្នាក់ដឹកនាំមន្ទីរ ថ្នាក់ការិយាល័យ រួមទាំងមេឃុំសង្កាត់ និងភូមិទៀតផង ហើយក្នុងអនុសាសន៍ទាំង១១ចំណុចរបស់សម្តេចតេជោហ៊ុន សែន នាយករដ្ឋមន្ត្រីនៃកម្ពុជា ដើម្បីឲ្យស្ត្រីក្លាយជាអ្នកដឹកនាំ ត្រូវពិនិត្យទៅលើសមត្ថភាព និង ត្រូវមានការកសាងសមត្ថភាពស្ត្រីមានលទ្ធភាពក្លាយជាអ្នកដឹកនាំ ។
ឯកឧត្តម លេង ផាលី រដ្ឋលេខាធិការក្រសួងផែនការ មានប្រសាសន៍ថា យេនឌ័រ ជាបញ្ហាដ៏ចម្បងមួយ ដែលរាជរដ្ឋាភិបាល និង ប្រជាជាតិនៅលើសកលោក បានកំពុងផ្តោតការ យកចិត្តទុកដាក់ខ្ពស់ ហើយរាជរដ្ឋាភិបាលកម្ពុជាបានចាត់ថា ការចូលរួមស្មើភាពគ្នារបស់ស្ត្រីនិងបុរស ក្នុងដំណើរអភិវឌ្ឍន៍ គឺត្រូវការចាំបាច់ និងធ្វើឲ្យសេដ្ឋកិច្ចកាន់តែមានការរីកចម្រើន និង សមភាពក្នុងសង្គម ហើយបញ្ហាយេនឌ័រនេះ ក៏ត្រូវបានកំណត់ជាបញ្ហាអាទិភាពមួយរបស់រាជរដ្ឋាភិបាលកម្ពុជា ក្នុងផែនការយុទ្ធសាស្ត្រចតុកោណ និង ផែនការយុទ្ធសាស្ត្រអភិវឌ្ឍន៍ជាតិ ដែលត្រូវអនុវត្តដោយក្រសួង ស្ថាប័ននានារបស់រាជរដ្ឋាភិបាល ។
ឯកឧត្តម លេង ផាលី មានប្រសាសន៍បន្ថែមថា តាមអនុសាសន៍របស់ប្រមុខរាជរដ្ឋាភិបាលកម្ពុជា មន្ត្រីរាជការជាស្ត្រី ក្នុងក្រសួងផែនការ រាជធានី ខេត្ត ក៏ត្រូវបានតម្លើងឋានៈ ប្រគល់នូវតួនាទីជាបន្តបន្ទាប់ផងដែរ ដូច្នេះដើម្បីសម្រេចនូវគោលដៅទាំងនេះ គឺត្រូវមានកិច្ចខិតខំប្រឹងប្រែងរួមគ្នា ក្នុងការពង្រឹងសមត្ថភាពដល់មន្ត្រីរាជការជាស្ត្រី និង ផ្តល់ឱកាសក្នុងការទទួលបានបទពិសោធន៍នានាក្នុងការងារជាមួយគ្នា និង ធ្វើការផ្សព្វផ្សាយពីការបញ្ជ្រាប យេនឌ័រដល់មន្ត្រីរាជការ ដូច្នេះ តាមរយៈនៃវគ្គបណ្តុះបណ្តាលនេះ យើងជឿជាក់ថា នឹងធ្វើឲ្យមន្ត្រីថ្នាក់ដឹកនាំទាំងអស់ ទទួលបានចំណេះដឹងថ្មីៗស៊ីជម្រៅ សំខាន់បងប្អូនស្ត្រី ព្រមទាំងនឹងយកចំណេះដឹងទាំងនេះទៅធ្វើការផ្សព្វផ្សាយបន្តដល់មន្ត្រីតាមអង្គភាពខ្លួន ក្នុងការលើកកម្ពស់សមត្ថភាពរបស់ខ្លួនបន្ថែមទៀត ដើម្បីរួមចំណែកអភិវឌ្ឍន៍ប្រទេសជាតិ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
