ឥណ្ឌាកំពុងកែច្នៃទូរថភ្លើងរ៉ាប់ម៉ឺនកំណាត់ ឲ្យទៅជាបន្ទប់សង្គ្រោះអ្នកជំងឺ COVID-19 បានរាប់សែននាក់
នៅចំពោះមុខការរីករាលដាលនៃ COVID-19 ឥណ្ឌាបានចាប់ផ្តើមកែច្នៃទូរថភ្លើងរហូតដល់២០,០០០កំណាត់ ដើម្បីធ្វើជាកន្លែងទុកអ្នកជំងឺ COVID-19។ នេះបើតាមការដកស្រង់ ការផ្សាយចេញពីទីភ្នាក់ងារព័ត៌មានស៊ីនហួរ នៅព្រឹកថ្ងៃពុធ ទី០១ ខែមេសា ឆ្នាំ២០២០។ ក្រសួងគ្រប់គ្រងបណ្តាញរថភ្លើងរបស់ប្រទេសឥណ្ឌា បានឲ្យដឹងថា ទូរថភ្លើងចំនួន ២ម៉ឺនទូនេះអាចផ្ទុកគ្រែអ្នកជំងឺបានរហូតដល់ទៅ៣២០,០០០គ្រែ ខណៈកិច្ចការកែច្នៃ៥,០០០ទូដំបូងត្រូវបានផ្តើមរួចជាស្រេច។ ទូចំនួន៥,០០០ទូដែលកែច្នៃរួច នឹងមានសមត្ថភាពផ្ទុកបាន៨០,០០០គ្រែ ដោយក្នុងមួយទូត្រូវគេរំពឹងថា អាចមាន១៦គ្រែ។ ...
